Salmos 40 - La'aqtaqa Ñim Lo'onatac 'Enauacna 2013

Machiguiñi ca pi'iỹa'a Ñim Nataxala'

¹ Aỹem ỹataqta semato'ot da ñaquitaxac Ñim Nataxala', qaq Ñimaye hua'axaỹa da iỹaxanaxac,

² nache aỹem nqateeguesop aso nshere, maye huetangui da nleuaxa qataq so nshaxa maye ỹataqta deshe, nache aỹem ỹapiaxanaxanaxaalec aso coma', qataq aỹem ỹanalec so nalochiguiñi 'alhua.

³ Nache ỹauo'o so dalaxaic ỹo'onec, som no'onec da qaỹo'oxoren Ñim Qanatamnaxala'. Qaq qalota so ỹauaachigui de'era, nache ỹataqta huo'o da lcolanaxa, nache ỹauo'o da naquitaxac Ñim Nataxala'.

⁴ Qaq machiguiñi qome ca shiỹaxaua maye pi'iỹa'a Ñim Nataxala', qaq saishet da nmitta'ai na qaica ca iren, qataq na natameetacot na saq'en atamnaxala'pi.

⁵ 'Am Nataxala' qataq Ñatamnaxala', ỹataqta qalota na ỹo'ot da na'aalaxa maye 'auo'ot co'ollaxa. Saishet da qaivi' da qanaloqten da 'arauotaxanaqtaic da shenaqta. Qaq huo'o da iyaxa da sa'axatec damaye, qalaxaye saishet da sevi' da sa'axat ye lcata.

⁶ Cha'aye 'am saishet da 'auamaateguet na nachetaqtaxanaxatpi, qataq ana nachetaqtaxanaqte ala na nañiguishec, qalaxaye 'am aỹem 'aua'axaỹaqchetec da saishet da 'auỹaxanaique ca nachetaqtaxanaxat qaỹavigaxatta, qataq aca nachetaqtaxanaqte da qaỹapalaxat ca nasouaxashet.

⁷ Qaq ỹoqo'oye aỹem shenapec: «Aỹem nagui soota'a ne'ena, cha'aye nache 'enapec ana nere maye ỹa'axa't da sheeta.

⁸ Qaq aỹem ỹataqta saỹamaxareeta da so'ot ca qonetapeguec 'Am Ñatamnaxala', qataq naua 'arapaxaguenataxanaxaco ỹataqta huetaiguilo ñaqa'en añi iquiyaqte.»

⁹ Qaq co'ollaq salectaigui so qalota shiỹaxauapi nache sa'axattac da nalochiguiñi lataxac, qaq 'Am Nataxala', ỹataqta 'auaỹateeta da saishet da ñe'emaxatta co'ollaxa.

¹⁰ Qataq saishet co'ollaxa da saq sa'axat da nalochiguiñi 'arataxac, nacherata da sa'axattapeguec da no'on 'arataxac qataq da 'arca'alaqtaxanaxac. Qataq saishet da soxooñi da 'arsoxoyec qataq da 'eesa lataxac, da salectaigui na qalota shiỹaxauapi.

¹¹ ¡Qaq 'am Nataxala', saishet qome da aỹem sa 'auashenem da 'archoxonnataxanaxa! ¡Qataq nache 'eetai' qome da aỹem mpaxattalec da 'arauotaxanaqtaic qataq da 'eesa lataxac!

¹² Cha'aye ỹataqta qalota na qauemsat maye aỹem coleesop, ỹoqo'oye saishet da sevi' da ñaloqten. Qataq aỹem loxonec na maiche so'ot qauempi, nache daqat naqa'en da imeenaxanaxac, ne'ena qauempi namaye napacalec ye lcata na ỹaue, nache qaica naqa'en ca la'añaxac añi iquiyaqte.

¹³ 'Am Nataxala', aỹem 'anqouaguec, ñaq 'auanac da aỹem 'anca'alaxatec. 'Am Nataxala', sa 'anaỹaloxon qome da 'auanac da aỹem 'autauan.

¹⁴ Ỹataqta huo'o qome da la'aloxo qataq sa ỹaỹaten ca 'eetec, na ỹauotaique da aỹem ỹalauat. Qataq dataueeguesop qome da la'aloxo na huotaique da aỹem ỹo'otec ca qauem.

¹⁵ Ỹataqta huo'o qome da la'aloxo souaxat da noxonaguec, qataq huetaiya' 'anqa'en na aỹem ỹe'eetacpi.

¹⁶ Qalaxaye ỹataqta huo'o qome da ntonaxac 'enauac na 'am nmittaique, qataq na naquita'a da 'arca'alaqtaxanaxac, nache 'eetai' qome da la'aqtac da 'eeta': «¡Ỹataqta lta'araic Ñim Nataxala'!»

¹⁷ Qaq aỹem maye aỹem choxoraq qataq huo'o da iuenaxanaxa, saishet qome da aỹem 'aucoua'ai 'Am Nataxala'. Cha'aye 'am maye aỹem 'autauaatac qataq aỹem 'anca'alaxatec, saishet qome da 'am qaỹaloqteguet, 'am Ñatamnaxala'.