Salmos 4 - La'aqtaqa Ñim Lo'onatac 'Enauacna 2013

Da 'eetec da qaipi'iỹa'a Ñim Nataxala'

¹ 'Am Ñatamnaxala' qataq 'am ipaqtaxanaxat, ñaq aỹem 'auasateguet da 'am seỹaxanot, cha'aye co'ollaq huo'o so ñiqui'ic nache aỹem 'aỹa'anem da sasattec, ñaq aỹem 'auchoxoren qome qataq 'aua'axaỹa da ñatamnaxac.

² Qaq qami' maye qaupi'itaxañiitega da qami' 'amaqtaqaiqa, ¿che laguio' da qaỹa'axañiiñi da aỹem qaunogoqchichiitac? Qataq ¿che laguio' da qaỹa'axañiiñi da qanmichiitaique na qaica ca naigui?

³ Ña qauaỹachiñiita qome da Ñim Nataxala', ipactaique ca ỹale maye ỹataqta 'en da quetague' Ñimaye, qataq qauaỹachiñiita da Ñim Nataxala' aỹem ỹasateguet da seỹaxanot.

⁴ Da qaualematai qalaq saishet da qauauo'oi ca qarasouaxashichi, qaq qom qannañiitalec ca qarmala'ai ye pe nache qavi'imaqaitac, da qauennataxañiilec cam qarhuennataxaqui.

⁵ Qataq qaỹa'añiiuo qome aca qarachetaqtaxanaqche, maye chegoqchigui da ỹaỹamaqchiguiñi lataxac, qataq qaupi'iỹa'ai Ñim Nataxala'.

⁶ Qalota na 'eeta': «¿Negue'tom ca qomi' ỹachaxanalo ca ỹaỹamaqchiguiñi?» 'Am Nataxala', ñaq 'ano'onaxat qome da 'armeenaxanaxac da qomi' 'anamata'alo.

⁷ 'Am 'auachaigui co'ollaxa añi iquiyaqte da ỹamaicỹaxac, qaq saq 'ena'am ca hueto'ot na chochaq huañi trigo qataq na lataxa.

⁸ Da ñenaañi qalaq she'emaqtac, qataq sa qaỹaloq da so'oche, cha'aye 'Am Nataxala', aỹem 'aỹa'anem da qaica ca ñeraqtaique.