Salmos 39 - La'aqtaqa Ñim Lo'onatac 'Enauacna 2013

Da achaalataxac saqaỹauec

¹ Aỹem iuennataxac co'ollaxa da ỹataqta selo'ogue da no'on ỹataxac, yaqto' saishet da huo'o ca ỹasouaxashet souaxat ca 'enapec ñi ỹachaxat, qataq sauo'o so lcoñetaxat na aỹap da ñaq salectaigui na qauemaicpi.

² Nache se'enaxat da qaicaua naua ỹa'aqtaqa, nache ỹataqta qaica ca ñasaxauec ỹa'aqtac, ivira'a na no'on lataxac saishet da sa'axat, qalaxaye da ñiqui'ic ỹataqta nquictauec.

³ Añi iquiyaqte ỹataqta napaqhuec naqa'en ana itogue, qaq souaxat da seuennataxaateguelec de'era, nache so norec 'eroigui naqa'en aỹem, nache ishet da ñasaxauec da ỹa'aqtac, 'eeta':

⁴ «'Am Nataxala', aỹem 'auaỹaanaxanaxanec ca 'eetec qome cam ỹoga't, qataq chalcate' vi'iye da ñeca'altauec, yaqto' saỹateeta da ỹataqta saqaỹauec da ñachaalataxac.

⁵ Cha'aye ỹataqta saqaỹauec da ñachaalataxac maye aỹem 'aỹa'anem, ỹoqo'oye ỹataqta qaica ca naigui da ñachaalataxac da 'am hueto'ot. Cha'aye ye loga't 'enauac na shiỹaxauapi 'eeta'am da 'oonolec qanaue'c naua na'a'che.

⁶ 'Enauac na shiỹaxauapi da jec qalaq 'eeta'am na lpaqal. Qaica ca naigui da lapoosheguem da lsallaxa, cha'aye sa ỹaỹaten chaq negue't ca no'ona'aguet qome damaye.

⁷ Qaq nagui, 'Am Nataxala', ¿negue'tom ca lỹa seuattaique? Ye da ñaquitaxac 'am sacheto'ot.

⁸ Ñaq aỹem 'anca'alaxateeguesop qome ne'ena ỹasouaxashetpi, saishet qome da 'aua'aqta'a da aỹem ne'eetapigui na qaica ca ỹaỹaanapec.»

⁹ Aỹem se'enaxat da qaicaua naua ỹa'aqtaqa, nache ỹataqta qaica ca ñasaxauec ỹa'aqtac, cha'aye nache 'am maye 'auo'ot de'era.

¹⁰ Ñaq 'axaañi qome da aỹem 'auaxaatac, cha'aye da lhuaxanaxanaxa'c naua 'arhua'q mashe aỹem nlaxatchiguiñi.

¹¹ 'Am, da 'aviraxato'ot ca shiỹaxaua, qalaq 'auo'ot da nhuaxanaguec souaxat na qauem maye ỹo'ottac, qataq 'eeta'am na 'alhua da dolachigui 'anqa'en ca ỹataqta lauotaxat camaye, cha'aye 'enauac na shiỹaxauapi da imeuo, 'eeta'am da 'oonolec qanaue'c naua na'a'che.

¹² «'Am Nataxala', ñaq 'aua'axaỹa da ñatamnaxac, ñaq 'auqoche'eguet da iỹaxanaxac, saishet da sa 'aua'axaỹa da ñenoinaxac cha'aye 'eeta'am 'anqa'en aỹem ca ỹaqa'a ca chegaqa'ague, sheeta'am ca qoỹo maye chochaq queta, sheeta'am co'ollaxa som sachegoxoguetpi.

¹³ A'aye qome da 'arayeloxo da aỹem 'aulotagui, yaqto' cara'acolec da ñañaxaayishegue'm naua ỹa'a'che, llaxatemallaxa da ñaq saxanaxa da seleu.»