Salmos 36 - La'aqtaqa Ñim Lo'onatac 'Enauacna 2013

Da lchoxonnataxanaxa Ñim Lo'onatac 'Enauacna

¹ Da lhuennataxac ca 'etaxaloxoic, 'eeta': «Qaica ca 'enec Ñim Nataxala', na'aictaxa da huo'o ca ỹauaachigui.»

² Nache camaye ipi'itaxaatega da huo'o da ño'oxonnataguec, qataq saishet da deqaictega na qauemsat maye ỹo'ottac.

³ Qataq ỹataqta qauema naua la'aqtaqa qataq shepecaic, cha'aye deqat so no'on ntoonaxac, qataq ỹaxaañi da ỹo'ot da ỹaỹamaqchiguiñi.

⁴ Qataq da nnaatalec ca lmala', nache ỹaqataxaatapigui' da ỹo'ot na qauem, cha'aye saishet da ỹaxanec da qauem llecỹaxac, qataq saishet da ỹaxanec na qauemsat.

⁵ Qalaxaye 'Am Nataxala' da 'arauotaxanaqtaic iviro'ot na piguem, qataq da 'arsoxoyec ỹataqta iviro'ot na piguem.

⁶ Qataq da nalochiguiñi 'arataxac, 'eeta'am ana qaỹoqotcheguemec qasoxonaxapi, qataq naua 'alapaxayiñi lataxaco 'eeta'ama aso auaxai late'erai maye qaỹoqchiguingui. Qataq ỹataqta 'antela'a na shiỹaxauapi qataq na shiguiỹacpi 'Am Nataxala'.

⁷ Ỹataqta huo'o da llo'oxoyec da 'arauotaxanaqtaic, 'Am Atamnaxala', ỹoqo'oye na shiỹaxauapi deuaqtacoto naua 'araua't da yaqto' 'ampaxattalec.

⁸ Qataq ỹataqta machiguiñi namayepi souaxat na chochaq huañi nallec ye 'arma', qataq 'anỹomaxaatapigui namayepi som tala maye ỹataqta ama na le'ec,

⁹ cha'aye nache 'am hueto'ot da nca'alaxa, qataq na 'are'eraxa ỹo'ot da seloqtaigui na yo'oqchiguiñi.

¹⁰ Qataq 'aỹa'anem da 'arauotaxanaqtaic na 'am ỹauatton, qataq da ỹaỹamaqchiguiñi lataxac na shiỹaxauapi maye no'on da lataxac.

¹¹ Qaq sa 'auashenem qome da aỹem petapigui na ño'oxonnaxaicpi, qataq da aỹem nchegoxosheguem na qauemaicpi.

¹² Ñaq qauloỹa da 'eetec da huañi na qauemaicpi, namayepi huañi nache sa lỹa da nachaañi.