Salmos 35 - La'aqtaqa Ñim Lo'onatac 'Enauacna 2013

Da atamnaxac da qaiỹaxanot Ñim Nataxala'

¹ 'Am Nataxala', ñaq 'auataỹa'aguet qome na aỹem dataỹa'aguetpi, ñaq 'aulogui' na aỹem iloquiaxaatacpi.

² Ñaq 'auacona aca 'arpaqtaxanaqte nache 'auanac da aỹem 'autauan,

³ ñaq 'auacona aca 'arataquiaxai nache 'auataỹa'aguet na aỹem icaatacpi, aỹem ñeshetaique da 'am sa'axaỹa da qoneta': «Nachaỹem 'arca'alaxaqui.»

⁴ Nache 'auo'otec da la'aloxo qataq saỹaỹaten ca 'eetec na huotaique da aỹem ỹalauat, nam huotaique da ỹauo'o ca aỹem ỹo'otec qauem,

⁵ nache 'eeta'am qome na 'auaqpi da ỹache na la'at, qom ỹasaxauec namayepi so lamaxashec piguem le'ec Ñim Nataxala'.

⁶ Nache napalñi qataq salvi so nqa'aic namayepi, qom icanapec namayepi so lamaxashec piguem le'ec Ñim Nataxala'.

⁷ Cha'aye qaica ca sasouaxat qalaq ỹauo'o aso lqoina da aỹem nqovin, qataq ỹauo'o aso lshere da ỹauotaique da aỹem ỹasaxangui.

⁸ Qaq ñaq ique'elaxat qome namayepi da qaica ca na'achecỹaxac, qataq maiche tangui qome aca maiche lqoina namayepi, qataq aca lshere maye ỹo'ot co'ollaxa namayepi.

⁹ Huaña nache samachiguiñi souaxat Ñim Nataxala', qataq ñetootapeguec da lca'alaqtaxanaxac Ñimaye.

¹⁰ Nache imauec qome da iquiyaqteỹaxac da sheeta': «¿Negue'tom ca 'eeta'am 'Am Nataxala'? Cha'aye 'anca'alaxatec na choxoraqpi, qataq na huo'o da lhuenaxanaxa, qataq 'anqateeguesop na napacalec da la'añaxac namayepi qataq nhuottac.»

¹¹ Nachaañi na saq'en na'aqtaxanaxanecpi, nache aỹem inattac denataxaateguec na saishet da saỹaten.

¹² Namayepi so'otec co'ollaxa da no'on qalaxaye namayepi aỹem ỹo'otec da qauem, qaq damaye ỹataqta huo'o naqa'en da ỹaquicoxo.

¹³ Qaq naxa da sano'on namayepi qalaq lta'araic da iuogoxo souaxat namayepi, nache saayiñi naua anogo sansatte' qataq ñeqouaqchet qataq nache shecto'ot da ñatameetapeguelec namayepi.

¹⁴ Nache choche shequeuotapigui' da ỹaquicoxo, qataq qaica ca ỹa'añaxac 'eeta'am da huo'otaq ileu aca ỹate'e, huo'otaq ca ñauochaxaua huo'otaq ca ỹalamaxat ỹaqaỹa.

¹⁵ Qalaxaye co'ollaq souañi, nache 'enauac namayepi da aỹem lashetac, 'eeta'am ca ỹaqa'a ca chegaqa'ague qataq da saqaỹauatton, nache ỹataqta ỹe'eguelaqtalec da aỹem saiyacnapec.

¹⁶ Ỹataqta aỹem saiyacnapec qataq aỹem ỹe'enai', da lmeenaxanaxac da aỹem ỹamato'ot qalaq huo'o da lquiỹaxa.

¹⁷ 'Am Nataxala', ¿chaq laguio' da ime, da choche 'aumeteetac de'era? Ñaq 'anca'alaxateeguesop da ñachaalataxac, dam 'oonolec ñachaalataxac, ne'ena llonpi maye desoqtac.

¹⁸ Yaqto' 'am sanem da ña'achecỹaxac da salectaigui na lapoota'a't shiỹaxauapi maye 'aralamaxatpi, qataq 'am sho'oxoreetac ỹauaachigui ñaqa'en na qalota shiỹaxauapi.

¹⁹ Saishet qome da aỹem ntootalec na ñepa'aguenaxauapi, qataq saishet da naquiaxaatalec ana la'aite nam choche aỹem nquiỹatega.

²⁰ Cha'aye namayepi saishet da anac da ỹo'ot ca nlagaxayec, nda'a't da lapaqtapiguiñi na latenataxanaxacpi, da npa'agueetague' na shiỹaxauapi maye lactapiguiñi da netalec ne'ena 'alhua,

²¹ ỹataqta ỹauachiguilo naua ala'api da aỹem ỹe'eetac nache, 'eeta': «¡Ña qauloỹa ñim seviraqta'a da seloqto'ot nagui!»

²² ¡Qaq ỹataqta 'auauaachigui de'era 'Am Nataxala'! ¡Qaq saishet qome da choche 'añe'emaxat! ¡Qataq saishet qome da aỹem qaỹoqtaique 'anqa'en!

²³ Ñaq 'anlouec 'Am Nataxala' qataq qoñisheguem 'Am Ñatamnaxala', Ñaq aỹem 'auo'otec ca ỹaỹamaqchiguiñi, aỹem 'aueelec.

²⁴ 'Am Nataxala', maye 'Am Ñatamnaxala', ñaq aỹem 'anmit, 'aupacchigui da nalochiguiñi lataxac da huo'o ca 'auo'ot, yaqto' saishet da aỹem lashetac namayepi.

²⁵ Qataq saishet qome da lhuennataxac, da 'eeta': «'Era da shenaqtapeguec» qataq da, 'eeta': «Ñimaye mashe qoroxonec.»

²⁶ Ñaq huo'o qome da la'aloxo qataq saỹaỹaten ca 'eetec, nam ntootalec de'era souaigui ỹachoxoyec, qataq huo'o nataqa'en da la'aloxo na ipi'itaxaatega da aỹem nataỹaña.

²⁷ Qalaxaye machiguiñi qome qataq ỹa'alaqtai' da ntonaxac nam ỹayeeta'a da aỹem ỹauaachigui da soxonaxan, qataq ỹe'eguelaxattalec da 'eeta': «¡Ñim Nataxala' ỹataqta 'amaqtaqaic, qataq ỹaỹamaxareeta da l-lagaxayec ne'ena lamaxashec!»

²⁸ Ỹoqo'oye ñi ỹachaxat ỹa'axat qome dam nalochiguiñi lataxac, ¡qataq 'enauaque naua na'axa'te da 'am sho'oxoreetac!