Salmos 34 - La'aqtaqa Ñim Lo'onatac 'Enauacna 2013

Da ño'oxonnataguec Ñim Nataxala'

¹ Aỹem sho'oxoreetac qome Ñim Nataxala' 'enauaque naua na'axa'te, qataq nache 'eetai' qome da sho'oxoreetac Ñimaye.

² Aỹem ỹataqta sho'oxoreetac qome Ñim Nataxala', qaq qom hua'aqa na choxoraqpi nache machiguiñi.

³ Sho'oxorenaq qome Ñim Nataxala', qataq llatetaq da le'enaxat Ñimaye.

⁴ Aỹem seỹaxanot co'ollaxa Ñim Nataxala', nache Ñimaye aỹem ỹasateguet, qataq aỹem isoueeguesop 'enauac na icolanaxasat.

⁵ Na ỹamato'ot Ñimaye nache ỹataqta nlaqchigui da ntonaxac, qataq saishet da hueto'ot ca na'aloxonaxac.

⁶ Qaq ne'ena choxoraq deỹaxan co'ollaxa, nache Ñim Nataxala' hua'axaỹa, nache isoueeguesop 'enauac da laquicoxo.

⁷ Qaq so lamaxashec piguem le'ec Ñim Nataxala', npaxattalec qataq nca'alaxatec, nam huo'o naq 'enec naqa'en Ñimaye.

⁸ Ñaq qavi'iguiñi Ñim Nataxala', yaqto' qauaỹachiñi da Ñimaye ỹataqta soxoraic. Qaq ỹataqta machiguiñi qome ca shiỹaxaua maye pi'iỹa'a Ñimaye.

⁹ Ñaq huo'o naq 'enec qanqa'eñi Ñim Nataxala', qami' maye qanañañiỹot Ñimaye, cha'aye qaica ca iueetac cam huo'o naq 'enec naqa'en Ñimaye.

¹⁰ Na sallaxanecpi qalaq ỹe'eguelaxa da choxoraq qataq nque'etaxangui na lqouaxa, qalaxaye nam nmitaique Ñim Nataxala', qalaq qaica ca iueetac.

¹¹ Ña qauanaqui qami' ỹalaqpi, ñaq aỹem qana'axaỹaxañiỹa, nache qami' sapaxagueneque da huo'o naq 'enec qanqa'eñi Ñim Nataxala'.

¹² Ca nshetaique da ỹauotec da nachaalataxac, qataq machiguiñi da huetaiguilo naua na'axa'te,

¹³ nache iuen da nllañi ñi lachaxat da sa nasaxauec ca qauem, qataq da sa nasaxauec ca natenataxanaxac.

¹⁴ Qataq ca'ai na qauemsat, nache ỹo'ot ca ỹaỹamaqchiguiñi, qataq nmitaique da nlagaxayec nache quegue.

¹⁵ Ñim Nataxala' ntela'a na shiỹaxauapi maye no'on da lataxac, qataq hua'axaỹa na natamnaxacpi.

¹⁶ Ñim Nataxala' dataỹa'aguet na ỹo'ottac na qauemsat, da yaqto' ỹapalaxat da le'enaxat namayepi da huetalec ana 'alhua.

¹⁷ Ñim Nataxala' ỹataqta hua'axaỹa da natamnaxac nam no'on da lataxac, qataq isoueeguesop 'enauac da laquicoxo.

¹⁸ Ñim Nataxala' saqaỹapeque naqa'en ca qaica ca la'añaxac da lquiyaqteỹaxac, qataq nca'alaxatec ca mashe qaica ca naquitaxac.

¹⁹ Ca shiỹaxaua no'on da lataxac qalota na ivireguet qauempi, qalaxaye Ñim Nataxala' isoueeguesop 'enauac namayepi.

²⁰ Qataq Ñimaye mpaxattalec 'enauac na lpi'inecpi camaye, nache qaica da huo'otaq 'oonolec ca qainoxon na lpi'inecpi camaye.

²¹ Qaq na qauemaicpi qalaq maiche ilem na qauempi maye ỹo'ottac. Qaq na nquiỹatega nam no'on da lataxac qalaq huo'o qome ca nhuaxanaguec.

²² Qalaxaye Ñim Nataxala', nca'alaxatec da nachaalataxac nam lamaxashecpi. Qataq nam pe'etega Ñimaye, saishet qome da huo'o ca nhuaxanaguec.