Salmos 32 - La'aqtaqa Ñim Lo'onatac 'Enauacna 2013

Qaỹapalaxat ca nasouaxashet

¹ Ỹataqta machiguiñi qome ca shiỹaxaua maye imauec da qaỹapalaxat na lasouaxashetpi qataq da lle'etaxaloxo.

² Ỹataqta machiguiñi ca shiỹaxaua maye saishet da qauem ca 'eetapeguec, qataq Ñim Nataxala' saishet da huo'o ca ỹasaxalec lasouaxashet.

³ Qaq co'ollaq saxanaxa da sa'axat na ỹasouaxashetpi, nache da ỹo'ocỹaxac taỹañicra souaxat da ỹachotaxac 'enauaque naua na'axa'te,

⁴ cha'aye ye na'a'q qataq ye pe, qalaq da 'arhuaqỹaxac huetalec da sheeta. Nache sheeta'am aca lauoxo maye daqaqtañi, souaxat na le'eraxa aso nala' da ivita ye cotap, qaq 'era da 'eetec da saỹañicra.

⁵ Qalaxaye 'am sa'axatem co'ollaxa na ỹasouaxashetpi, qataq saishet da 'am soxocheesop na qauem maye so'otpi, nache sheeta': «Aỹem sa'axatem na ỹasouaxashetpi Ñim Nataxala'.» Nache 'am 'auapalaxat 'enauac namayepi.

⁶ Qaq ỹoqo'oye da qanayeuaigui da que'eenaxac, nache na 'am quetague'pi 'am iỹaxanot, qaq na'aictaxa da ỹa'auat na 'etaxat qataq npaxaasheguem, qalaxaye saishet da ivitsheguema namayepi.

⁷ Qaq 'am nache 'am ỹe'eguenaxala', qataq aỹem 'ampaxattalec souaxat na lcheeguesat, qataq aỹem coleesop 'anqa'en da no'onaxanaxac maye naigui da aỹem huesochiguiñi.

⁸ Qaq Ñim Nataxala', 'eeta': «Aỹem 'am sanem qome na ỹapaxaguenataxanaxacpi, qataq na iqataxacpi qataq 'am sachaxana so nqa'aic maye ishet da qoquetegue. Qataq nache 'am salletagui qome.

⁹ Qaq saishet qome da qoneta'am na 'ashena huo'otaq na caaỹo, maye qaica ca ỹaỹaanapec nache iuen da qaỹauo'o ca nmiiguishec qataq naua lqueenaxanaqa'ate da yaqto' qanllañi, cha'aye da sa qoỹeetec de'era, nache saishet da qaipoteua'a.»

¹⁰ Qaq na qauemaicpi ỹataqta qalota qome na nqui'iguesat, qalaxaye da lsoxoyec Ñim Nataxala', ỹataqta coleesop na pi'iỹa'a Ñimaye.

¹¹ Qantoñiito'ot qome Ñim Nataxala', qami' shiỹaxauapi maye qami' soxoraicpi qataq qami' ỹo'oxoraiqa, qauamaichiguiñi qataq qauo'onaxañiitac souaxat da qantonaxaqui.