Salmos 31 - La'aqtaqa Ñim Lo'onatac 'Enauacna 2013

Ỹataqta qaipi'iỹa'a Ñim Nataxala'

¹ 'Am Nataxala', 'am she'eguenot da aỹem 'ampaxattalec, saishet qome da 'auauota'a da ỹa'aloxo, cha'aye no'on da 'arataxac, ỹoqo'oye aỹem 'anca'alaxatec qome.

² Ñaq aỹem 'aua'axaỹa qome, nache sa 'anaỹaloxon da aỹem 'anca'alaxatec. Cha'aye nache qoneta'am ca coma' da aỹem 'ampaxattalec, cha'aye 'am ỹe'eguenaxala' qataq ica'alaxaqui.

³ Cha'aye nache qoneta'am ca coma' qataq ca nỹec maye ỹe'eguenaxaqui. Aỹem 'auaueca'aguet qataq aỹem 'ampaxattalec, qaq ñaq 'auo'ot da llo'oxoyec da 'are'enaxat.

⁴ Ñaq aỹem 'anca'alaxateeguesop aca nqoina maye aỹem qaỹaqataxaata'aguet, cha'aye nache 'am maye aỹem 'ampaxattalec.

⁵ Qaq nagui 'am sanem da 'aulo'ogue dam saqcha'a ica'alaxa, ñaq aỹem 'anca'alaxatec, 'Am Nataxala', 'Am Atamnaxala' maye 'am 'eesa.

⁶ Aỹem ỹataqta saỹemec na natameetacot na atamnaxala'pi maye qaica ca naigui. Qalaxaye aỹem 'am sacheto'ot da ñaquitaxac 'Am Nataxala'.

⁷ Da 'arsoxoyec ỹo'ot da ñetonaxac qataq da ỹamaicỹaxac, cha'aye 'am ỹataqta 'auauaachigui da ỹaquicoxo, qataq 'auaỹateeta na ñeque'eenaxacpi.

⁸ Qataq saishet da aỹem 'aỹa'aneguet co'ollaxa da lhuaqỹaxac na ñepa'aguenaxauapi, nachaqrata da aỹem 'auapiaxanaxanaxaatelec yem huo'o da nlagaqa'.

⁹ 'Am Nataxala', ñaq aỹem 'auchoxoren qome, cha'aye aỹem sootapoigui da iuogoxo. Da ñiqui'ic ỹataqta nquigaxattrañi naqa'en naua ỹa'ai'te qataq da ỹo'ocỹaxac qataq da ñachaalataxac.

¹⁰ Da ñiqui'ic qataq da ñenoinaxac, qalaq imetrauo nataqa'en naua vi'iye da ñachaalataxac. Qataq da ỹaquicoxo ỹataqta imeuo naqa'en da ỹa'añaxac, qataq naua ipi'ineqa mashe sara'añeeguelo.

¹¹ Qaq 'enauac na ñepa'aguenaxauapi, ỹo'ot da aỹem qaỹa'aguelec, qataq aỹem ne'eetapigui na iuoreuapi, qataq ỹataqta aỹem ñi'iỹa na ñauattonaxauapi co'ollaxa, ỹataqta datauec da aỹem ila'aguet da huaña na nqa'aic.

¹² Ỹataqta imauec da aỹem qaicoua'ai, 'eeta'am da mashe seleu. Qataq sheeta'am peta'a ana naco'oña da aỹem dolachigui.

¹³ Qataq aỹem huo'o da sa'aqtega na shiỹaxauapi da nsoxootega't, 'eeta': «Huo'o da ncolanaxa 'enauaque naua laỹel.» Qataq namayepi 'eeta'am da 'oonolec ỹale da huaxaỹa't da aỹem npa'agueetega, da nshetaique da nqat da ñachaalataxac.

¹⁴ Qalaxaye aỹem, 'Am Nataxala', ỹataqta 'am sepe'etega, nache sheeta': «Nache 'am maye 'Am Ñatamnaxala'.»

¹⁵ Da ñachaalataxac huetaigui na 'arhuaq, ỹoqo'oye aỹem 'anca'alaxateeguesop qome na ñepa'aguenaxauapi maye aỹem icaatac.

¹⁶ Ñaq 'anamata'a qome ne'ena 'aramaxashec, maye 'aralamaxat, nache 'auchoxoren, qataq aỹem 'anca'alaxatec, souaxat da 'arsoxoyec.

¹⁷ 'Am Nataxala', saishet qome da 'aua'aqta'a da qaỹo'ot ca ỹa'aloxo, nacherata da 'auo'ot ca la'aloxo na qauemaicpi, nache ỹe'emaqtom 'anqa'en da huetangui aca huachiqui.

¹⁸ Qataq 'aviaxanegueta naua shepecaiqa la'aqtaqa, cha'aye da detaqtega na no'on da lataxac, qalaq na'amaqten qataq sansatte' naua la'aqtaqa.

¹⁹ Ỹataqta lta'araic da 'arqouagaxanaqtaic, maye 'auqataxaatai' da 'aỹa'anem na ỹataqta 'am quetague', qataq ỹauaachigui 'anqa'en na shiỹaxauapi, da 'aỹa'anoigui na ỹataqta 'am pe'etega.

²⁰ Qaq de'era saqcha'a 'arataxac nachera da ishet da ỹoxooñi namayepi, qataq 'anca'alaxateeguesop na qauem 'eetapeeguesat na shiỹaxauapi, cha'aye ỹataqta 'ampaxattalec namayepi, souaxat da lsheunaxanaxac ne'ena mpa'aguenaxauapi.

²¹ Ỹataqta qaỹo'oxoren qome Ñim Nataxala', souaxat da lsoxoyec, cha'aye ỹataqta lta'araic da aỹem ỹo'otec co'ollaq souaigui da ñiqui'ic.

²² Cha'aye can souaigui da ñiqui'ic, nache sheeta': «Yo'oqta da aỹem 'auo'orauec», qalaxaye co'ollaq 'am seỹaxanot da aỹem 'autauan, qalaq 'am 'aua'axaỹa da iỹaxanaxac.

²³ Ỹataqta ỹauotec Ñim Nataxala' 'enauac na quetague' Ñimaye. Ñim Nataxala' ỹataqta ntela'a na huesota da lataxac, qaq na na'amqaanaxaicpi, qalaq ỹanem da nhuaxanaguec.

²⁴ Qaq ỹataqta na'añaxat qataq qaramchigui qome da lquiyaqteỹaxac, 'enauac nam pe'etega Ñim Nataxala'.