Salmos 30 - La'aqtaqa Ñim Lo'onatac 'Enauacna 2013

Qoỹanot da 'achecỹaxac Ñim Nataxala'

¹ 'Am Nataxala', 'am sanot da ỹo'oxonnataxanaxac, cha'aye aỹem 'anca'alaxatec, qataq sa 'auashenem na ñepa'aguenaxauapi da aỹem lashetac.

² 'Am Nataxala' maye 'Am Ñatamnaxala', 'am seỹaxanot co'ollaxa da aỹem 'autauan, nache 'am, aỹem 'anataren.

³ 'Am Nataxala', aỹem 'anca'alaxateeguesop co'ollaxa da nleuaxa, qataq aỹem 'aỹa'anem da ica'alaxa, da yaqto' saishet da seleu.

⁴ Qami' maye ỹataqta qoquiitegue da llecỹaxac Ñim Nataxala', ¡qauo'oñi qome na no'onecpi qavio'oxoyiñi da qui'itta le'enaxat Ñimaye!

⁵ Cha'aye da layeloxo Ñimaye sa qaỹauec, qalaxaye da no'on ltaunaxanaxac ivittec naqa'en da achaalataxac. Cha'aye da huo'o da noinaxac ye pe, qalaxaye ye lỹa na'a'q qaltaq huo'o da namaicỹaxac.

⁶ Qaq co'ollaq ñanomta da qaica ca aỹem iraxaatapigui', nache sheeta': «Qaica qome ca aỹem ỹayogottac.»

⁷ Qalaxaye 'Am Nataxala', de'era 'arqouagaxanaqtaic, ỹo'ot da qaica ca aỹem iraxaatapigui', qalaxaye co'ollaq aỹem 'anqañoxotaisop, nache aỹem ñesomaxaatapigui'.

⁸ Qaq nagui 'am seỹaxanot 'Am Nataxala' qataq 'am ñachoxonnot 'Am Nataxala'.

⁹ ¿Negue'tom ca 'araueguec da seleu da aỹem qairouga aca huachiqui? cha'aye na lsoche na 'alhua saishet da 'am ỹo'oxoren, huo'otaq da ỹa'axat da 'eesa 'arataxac.

¹⁰ ¡'Am Nataxala', ñaq aỹem 'aua'axaỹa qataq aỹem 'auchoxoren, 'Am Nataxala'! ¡Ñaq aỹem 'autauan!

¹¹ Cha'aye da ñenoinaxac nmeneguet 'anqa'en da ỹasotaxac, qataq 'anqa't soua ỹasouaxaqui' aỹogo nache aỹem 'aỹa'anguilo soua no'o'n aỹogo.

¹² Ỹoqo'oye 'Am Nataxala' maye 'Am Ñatamnaxala', aỹem saishet da nache 'eetai' da she'emaqtom, aỹem so'onaxan da yaqto' 'am sho'oxoren, qataq nache 'eetai' da 'am saatacot da ña'achecỹaxac.