Salmos 3 - La'aqtaqa Ñim Lo'onatac 'Enauacna 2013

Da 'eetec da qanatamnot Ñim Nataxala'

¹ 'Am Nataxala', ỹataqta qalota na ñepa'aguenaxauapi, qataq qalota na aỹem dataỹa'aguet,

² qataq qalota na aỹem detaqtega, 'eeta': «Ñim Lo'onatac 'Enauacna saishet da nca'alaxatec qome ñimaye.»

³ Qalaxaye 'Am Nataxala', qoneta'am aca npaqtaxanaqte da aỹem 'ampaxattalec, qataq nache 'am da 'auo'ot da ỹo'oxoyec, qataq nache 'am da aỹem 'aua'añaqchettac.

⁴ Ỹataqta ña'axannec da iỹaxanaxac, da seỹaxanot da aỹem itauan Ñim Nataxala', qaq Ñimaye aỹem ỹasateguet co'ollaq huetasheguema na pa'asheguem añim qui'itta nqasoxonaxa.

⁵ Qaq ỹoqo'oye da choche ñenaañi nache so'oche, qaq da ime qaltaq ñelouec, cha'aye Ñim Nataxala' aỹem ỹanem da ltaunaxanaxac.

⁶ Saishet da she'etega ca qalota alleppi, maye aỹem coleesop da huotaique da aỹem iloquiaxan.

⁷ 'Anachaañi 'Am Nataxala', ñaq aỹem 'anca'alaxatec 'Am Ñatamnaxala', ñaq 'aunoxo'n qome na lanoqo na ñepa'aguenaxauapi qataq 'auacagaxa't qome, naua lhue na qauemaicpi.

⁸ 'Am Nataxala', nache 'am maye 'auca'alaqtaxan, ñaq 'anamaxa qome ca 'archoxonnataxanaxa na 'aralamaxat nhuo' le'ecpi.