Salmos 29 - La'aqtaqa Ñim Lo'onatac 'Enauacna 2013

Da la'añaxac qataq da llo'oxoyec Ñim Nataxala'

¹ Qavio'oxoyiñi qome Ñim Nataxala', qami' piguem le'ecpi: qavio'oxoyiñi da la'añaxac qataq da llo'oxoyec Ñim Nataxala',

² qavio'oxoyiñi da ỹo'oxoraic le'enaxat Ñim Nataxala' qavio'oxoyiñi Ñim Nataxala' da huaña ye 'onaxaic qataq qui'itta lanataqa'.

³ Da lavilỹaxac Ñim Nataxala' huetaigui da l-llimiaxa na 'etaxat aso auaxai. Ñim Lo'onatac 'Enauacna maye ỹo'oxoraic ỹo'ot na nalataxa, Ñim Nataxala', Ñimaye huetalec aso qalochiguiñi auaxai.

⁴ Da lavilỹaxac Ñim Nataxala' ỹataqta lta'araic da la'añaxac. Da lavilỹaxac Ñim Nataxala' ỹataqta lta'araic da llo'oxoyec.

⁵ Da lavilỹaxac Ñim Nataxala' huacaguec naqa'en ana lcouepi ana qo'oipaq pino. Ñim Nataxala' ỹataqta huacaguec naqa'en ana lcouepi ana qo'oipaq pino ye Líbano.

⁶ Qataq ỹataqta cholaxan naqa'en, ana qasoxonaxapi ye Líbano qataq ye Sirión 'eeta'am naqa'en da parenaxaatac na huaca no'onaxa le'ec qataq na huaca llalec.

⁷ Da lavilỹaxac Ñim Nataxala', nasaxauec na le'eraxa na norec.

⁸ Da lavilỹaxac Ñim Nataxala' ỹataqta ỹacholaxan naqa'en ye toolec 'alhua. Ñim Nataxala' ỹataqta cholaxan naqa'en ye toolec 'alhua ye Cades.

⁹ Da lavilỹaxac Ñim Nataxala' ỹataqta inoxon ana qo'oipaqpi le'enaxat encina, nache ỹataqta qaca naqa'en ana qo'oipaq na aviaq. Qaq huaña añi lalamaqte atamnaxaqui da 'enauac qaỹo'oxoreetac Ñimaye.

¹⁰ Ñim Nataxala' nacheñi ñi ilotague' na auot, Ñim Nataxala' nache 'eetai' da chochaq tatec da lo'onataxanaxac.

¹¹ Ñim Nataxala' ỹanem da la'añaxac na lalamaxat nhuo' le'ecpi, qataq ỹanem da nqouagaxa na lalamaxatpi qataq lactapiguiñi naqa'en.