Salmos 27 - La'aqtaqa Ñim Lo'onatac 'Enauacna 2013

Ñim Nataxala' aỹem icoỹattalec qataq ica'alaxa

¹ Ñim Nataxala', nacheñi ñi aỹem icoỹattalec qataq nacheñi ñi ica'alaxaqui, ỹoqo'oye ¿negue'tom ca she'etaique? ye Ñim Nataxala' nacheñi ñi mpaxattalec da ñachaalataxac, ỹoqo'oye ¿negue'tom ca aỹem icolanaqchet?

² Na qauemaicpi maye ñepa'aguenaxauapi, naxa da anac da yaqto' aỹem iloquiaxan qataq aỹem nlaxaañi, nache namayepi maiche quia'aqñi, qataq huañi.

³ Qaq na'aictaxa da qalota na alleppi aỹem coleesop, qalaxaye añi iquiyaqte saishet da ñi'i, na'aictaxa da naỹamaxaañi da aỹem iloquiaxan, qalaxaye aỹem she'emaqtac.

⁴ Qaq 'oonolec da seỹaxaatapegueua'a qataq 'oonolec da ñeqopittega da aỹem ỹami' Ñim Nataxala', qaq damaye 'eeta': sootaua'a añi atamnaxaqui maye lalamaqte Ñim Nataxala' 'enauaque naua na'axa'te da ñachaalataxac, da yaqto' ñatameetac da sootaigui añimaye, qataq da semeteetac da lyacỹaxac Ñimaye.

⁵ Yaqto' da ivita ca na'a'q maye huo'o da lqalaic, qalaq Ñim Nataxala' aỹem ipelteetalec, da sootaigui añi lalamaqte atamnaxaqui, da aỹem nca'alaxatec, qalaq aỹem ỹanalec aca coma'.

⁶ Nache ñapacalec naqa'en na ñepa'aguenaxauapi, maye aỹem coleesop, huaña nache savigaxat aca ỹachetaqtaxanaqte da huaigui añi atamnaxaqui, souaxat da ñetonaxac qataq so'onaxan da so'on ca ỹo'onec da sanot Ñim Nataxala'.

⁷ 'Am Nataxala', 'am seỹaxanot, ñaq 'aua'axaỹa qome da ñachoxonnaxac, ñaq aỹem 'auchoxoren, aỹem 'auasateguet.

⁸ Cha'aye da iuennataxac, 'eeta': «Ñaq 'anmitaique da yaqto' 'anauane' Ñim Nataxala'.» Qaq ỹoqo'oye 'am Nataxala', ỹataqta 'am ñimittaique da 'am ñauane'.

⁹ ¡Saishet qome da aỹem 'anqañoxocheesop! ¡Saishet da aỹem 'aumaqa'aguet souaxat da 'arayeloxo! Cha'aye nachaq 'amta da aỹem 'autauaatac, Qataq saishet qome da aỹem qoca'ai qataq saishet da saq aỹem 'ampaxattalec, cha'aye nache 'am Ñatamnaxala' qataq 'am ica'alaxaqui.

¹⁰ Qaq na'aictaxa ca ita'a qataq aca ỹate'e da aỹem ỹala't, qalaxaye 'am Nataxala' aỹem 'aulotague'.

¹¹ 'Am Nataxala', ñaq aỹem 'auachaxana da 'anqa'aicỹaxac qataq aỹem 'auauecteueegue ca no'on nqa'aic, souaxat na ñepa'aguenaxauapi.

¹² Qataq saishet qome da aỹem 'aỹa'aneguet, da maiche aỹem ỹoiqueetac na ñepa'aguenaxauapi, cha'aye namayepi mashe ỹauo'o na latenataxanaxanecpi da yaqto' aỹem npa'aguena.

¹³ Cha'aye aỹem ỹataqta saỹateeta da ñauane' qome da lchoxonnataxanaxa Ñim Nataxala' da ñaq soota'a ana 'alhua maye netalec nam huo'o da lca'alaxa.

¹⁴ ¡Qaq ỹoqo'oye ỹataqta 'aupi'iỹa'a qome Ñim Nataxala'! ¡Qataq ỹataqta 'ana'añaxat, saishet da 'auqalvi! ¡Aja', ỹataqta 'aupi'iỹa'a qome Ñim Nataxala'!