Salmos 26 - La'aqtaqa Ñim Lo'onatac 'Enauacna 2013

Da achaalataxac qui'itta

¹ 'Am Nataxala', ñaq aỹem 'auo'otec ca ỹaỹamaqchiguiñi lataxac, cha'aye da ñachaalataxac ỹataqta qui'itta. Qataq ỹataqta 'am sepe'etega 'Am Nataxala'.

² Ñaq aỹem 'anmit qataq aỹem 'avi'iguen, qataq 'aumeteeta qome na iuennataxacpi qataq da iquiyaqteỹaxac.

³ Aỹem ỹataqta ñetoueeta'ac da 'arsoxoyec, qataq shecteguelo naua 'eesora 'ara'aqtaqa.

⁴ Ỹataqta sa ỹauanago' da salectaigui na shepecaicpi, qataq saishet da sootaigui na na'amqaanaxaicpi.

⁵ Ỹataqta sequiỹa na laponaxacpi na qauemaicpi, qataq saỹauanago' da ñeso'oota'ai' na 'etaxaloxoicpi.

⁶ Ỹoqo'oye seỹote' naua ihua'q, maye qaica ca ỹasouaxa't, cha'aye sauotaique da secoleetacot añi nca'atoxonaxalate maye 'aralamaqte,

⁷ qataq ñelamaxaren da so'onaxan da 'am sho'oxoren, qataq sa'axatta da llo'oxoyec na 'auo'otpi.

⁸ 'Am Nataxala', aỹem ỹataqta sauotec añi atamnaxaqui maye 'aranataxaqui, yem hueta'a naxa da 'ayo'oxoyec

⁹ Ỹoqo'oye qom seleu nache saishet qome da aỹem 'aualecnoigui na 'etaxaloxoicpi, huo'otaq da ỹalecta'aguet da ñachaalataxac na laataxanaxaicpi,

¹⁰ nam shiỹaxauapi maye naua lhua'q nlaqchiguilo na qauem qataq ana ỹoxottañi nsheetenaqte.

¹¹ Qalaxaye aỹem da ñachaalataxac qui'itta, ỹoqo'oye aỹem 'anca'alaxatec qome qataq aỹem 'auchoxoren.

¹² Naua ỹapia'ate qalaq ỹaỹamaqchiguiñi da lapiaxa'c. Ỹoqo'oye sho'oxoren Ñim Nataxala' da salectaigui cam qalota shiỹaxauapi.