Salmos 25 - La'aqtaqa Ñim Lo'onatac 'Enauacna 2013

Da atamnaxac da qaiỹaxanot Ñim Lo'onatac 'Enauacna

¹ 'Am Nataxala', 'am ỹalamaqtot ñaqa'en da ñatamnaxac,

² 'Am Ñatamnaxala', ỹataqta 'am sepe'etega, ỹoqo'oye saishet qome da 'auo'ot ca ỹa'aloxo. Saishet da 'aua'aqta'a da aỹem lashetac na ñepa'aguenaxauapi.

³ Qataq saishet qome da 'auo'ot ca la'aloxo na ỹataqta 'am pe'etega, Nacherata da 'auo'ot da la'aloxo na choche chegoqchiiya' da 'am dataỹa'aguet.

⁴ 'Am Nataxala', aỹem 'auachaxana qome na 'anqa'aicpi, qataq aỹem 'auapaxaguenec da 'eetec na salca'ague 'anqa'aicpi,

⁵ qataq aỹem 'auachaxana da llec da 'eesa lataxac, qataq aỹem 'auapaxaguen, cha'aye nache 'am Ñatamnaxala' qataq 'am ica'alaxaqui. Qataq nache 'am sepe'etega 'enauaque naua na'axa'te.

⁶ 'Am Nataxala', 'auennata'a qome da 'arsoxoyec qataq da 'arauotaxanaqtaic maye nache 'eetai' naxa da aỹem 'auachaxaatega.

⁷ Qataq saishet qome da 'auennatega na ỹasouaxashetpi, qataq na qauemsat maye so'ot co'ollaq ñaq aỹem nsoqolec, 'Am Nataxala', aỹem 'auennata'a qome, souaxat da lta'araic 'arsoxoyec qataq 'arauotaxanaqtaic.

⁸ Ñim Nataxala' ỹataqta soxoraic qataq no'on da lataxac, ỹoqo'oye ishet da ỹapaxaguenec da no'on ñecỹaxac na 'etaxaloxoicpi.

⁹ Qataq ỹauega da no'on ñecỹaxac na qaica ca la'amaqchec, qataq ỹapaxaguenec da llec na ỹaỹamaqchiguiñi lataxacpi.

¹⁰ Qaq 'enauac de'era llecỹaxac Ñim Nataxala' huetaigui da lsoxoyec qataq da 'eesa lataxac, da yaqto' talec nam ipacchigui da naỹamaxataxac qataq na lamaxasoxonaxacpi Ñimaye.

¹¹ 'Am Nataxala', souaxat da huo'o naq 'enec 'anqa'en da 'are'enaxat, nache 'auapalaxat qome da lta'araic ỹasouaxashet.

¹² Ca ỹale da huo'o naq 'enec naqa'en Ñim Nataxala', nache Ñimaye ỹachaxana ca ỹataqta no'on nqa'aic da yaqto' quegue camaye,

¹³ qataq qaica ca iueetac naqa'en, qataq ca chegoxoguetpi camaye nache netalec qome na 'alhua.

¹⁴ Ñim Nataxala' ỹataqta nauochaxaua nam huo'o naq 'enec naqa'en Ñimaye, qataq ỹauattonaxanaxanec da naỹamaxataxac Ñimaye.

¹⁵ Da imeenaxanaxac qalaq nache 'eetai' naxa da salleto'ot Ñim Nataxala', cha'aye Ñimaye aỹem nca'alaxateeguesop naxa 'enauac na lcheeguesat.

¹⁶ Ñaq aỹem 'anamata'a qataq aỹem 'auchoxoren 'am Nataxala', cha'aye aỹem ñerauec qataq huo'o da ỹachetataic.

¹⁷ Qataq nquictauec da laquicoxo añi iquiyaqte, qaq no'on da aỹem 'anqateeguesop da iuogoxo.

¹⁸ Ñaq 'aula'a qome da ỹaquicoxo qataq da ñeque'eenaxac nache 'auapalaxat 'enauac na ỹasouaxashetpi.

¹⁹ Ñaq 'aula'a da ỹataqta nquictauec ye lcata na ñepa'aguenaxauapi, qataq ỹataqta sa la'axaic da lquiỹaxa da aỹem ilota'a.

²⁰ ¡Ñaq aỹem 'antela'a, qataq 'anca'alaxatec da ñachaalataxac! ¡Saishet da aỹem 'auasheneguet da ña'aloxonaxac, cha'aye nachaq 'amta da aỹem 'ampaxattalec!

²¹ Ñaq aỹem mpaxaalec qome da ño'oxonnataguec qataq da qaica ca sasouaxat, cha'aye ỹataqta 'am sacheto'ot da ñaquitaxac.

²² ¡'Am Ñatamnaxala', ñaq 'anca'alaxateeguesop qome na Israel le'ecpi 'enauac na nque'eenaxaguesat!