Salmos 24 - La'aqtaqa Ñim Lo'onatac 'Enauacna 2013

Ñim Nta'a maye huo'o da llo'oxoyec

¹ Ñim Nataxala' lalamaqte 'enauac ana 'alhua, qataq 'enauac nam huetalec anamaye, qataq nam netalecpi anamaye.

² Cha'aye Ñimaye lapaxañi co'ollaxa so lo'oxonaxala' ana 'alhua, nache na'attalec naqa'en aso auaxai qataq na talapi.

³ ¿Qaq negue'tom ca ishet da huenotsheguema añi qasoxonaxa maye lalamaqte Ñim Nataxala'? ¿Qataq negue'tom ca ishet da hueta'a añi qui'itta atamnaxaqui maye lalamaqte Ñimaye?

⁴ Qomye nachecata ca qui'itte' naua lhua'q qataq ỹaỹamaqta da lquiyaqteỹaxac, qataq saishet da natameetacot na nqolacpiolec, qataq saishet da ỹanot ca la'aqtac nam saq 'en atamnaxala'pi.

⁵ Qaq camaye nacheca ca talec ca lchoxonnataxanaxa Ñim Nataxala', Ñim Natamnaxala' maye lca'alaxaqui camaye, qataq ỹo'otec ca ỹaỹamaqchiguiñi lataxac.

⁶ Qaq 'era qome da 'eetec 'enauac na nmitaique Ñim Nataxala', nam ỹataqta nmittaique da nauane' Ñim Natamnaxala' so Jacob.

⁷ Ña nauatoiguilo qome qanqa'eñi naua togosha'aape laso'omi. Nache 'enauac qome da nauattaigui namayepi, yaqto' inoxoneuo na nta'a maye ỹo'oxoraic.

⁸ ¿Negue't que'eca nta'a maye ỹo'oxoraic? Qomye nacheñi Ñim Nataxala' maye 'amaqtaqaic qataq 'añaxaic, Ñim Nataxala' maye 'añaxaic da huo'o da alaataxac.

⁹ Ña nauatoiguilo qome qanqa'eñi naua togosha'aape laso'omi. Nache 'enauac qome nauattaigui namayepi, yaqto' inoxoneuo na nta'a maye ỹo'oxoraic.

¹⁰ ¿Negue't que'eca nta'a maye ỹo'oxoraic? Qomye nacheñi Ñim Nataxala' maye Qaica ca Ỹaqalanapec. Nacheñi ñi Nta'a maye ỹo'oxoraic.