Salmos 22 - La'aqtaqa Ñim Lo'onatac 'Enauacna 2013

Da atamnaxac qataq da ño'oxonnataxanaxac

¹ 'Am Ñatamnaxala', 'am Ñatamnaxala', ¿ta'ainco' ye aỹem qoca'ai? ¿Qataq ta'ainco' ye 'am qaỹoqtaique da yaqto' aỹem 'anca'alaxatec? ¿Qataq ta'ainco' ye saishet da 'aua'axaỹalo naua ỹa'aqtaqa da 'am ñeỹeeto'ot?

² 'Am Ñatamnaxala', ye na'a'q 'am seỹaxaatega qalaq aỹem sa 'auasateguet qataq ye pe, qaica ca ñemataxac da 'am seỹaxaatega.

³ Qalaxaye 'am qui'itta, qataq 'am nta'a, maye 'am ỹo'oxoreetac na Israel le'ecpi.

⁴ So qarta'alpi 'am pe'etega co'ollaxa, 'am pe'etega co'ollaxa ỹoqo'oye 'ausouec somayepi.

⁵ 'Am iỹaxanot co'ollaxa da 'autauan, nache 'ausouec somayepi, somayepi ỹataqta 'am pe'etega co'ollaxa, qaq ỹoqo'oye saishet da 'auauo'o ca la'aloxo.

⁶ Qalaxaye aỹem choche aỹem qoche'l, qaq saishet da aỹem shiỹaxaua, na shiỹaxauapi qalaq choche aỹem ỹe'eetac.

⁷ Qaq na aỹem ilota'a qalaq aỹem ỹe'eetac, qataq iqapiaxattac ana lqa' da aỹem isheueetac, qataq iraxaatac na lqaic,

⁸ nache 'eeta': «De'era, pe'etega naxa Ñim Nataxala', qaq 'onaxaic da anac qome Ñimaye da nca'alaxatec, cha'aye ỹataqta lauotaxat damaye, qaq no'on da nacheñi Ñimaye da isouec.»

⁹ Qalaxaye nache 'am co'ollaxa da 'auo'ot da ỹañoxoc, aỹem 'auachegoxottoigui na lauel aso ỹate'e, nache sootaleguete 'anqa'en naua lhuaxaye asomaye.

¹⁰ Qaq co'ollaq saxanaxa da sañiguiñi, qalaq nache 'eetai' da aỹem 'anteltega, qataq co'ollaq ñaq sootaigui na lauel aso ỹate'e, nache nale'ena da 'am Ñatamnaxala'.

¹¹ Qaq saishet qome da aỹem qaỹoqtaique 'anqa'en, cha'aye mashe sa qaỹapeque da ỹaquicoxo, qalaq qaica ca aỹem itauan.

¹² Qataq aỹem coleesop na ñepa'aguenaxauapi, 'eeta'am na huaca yeloxoic, maye lma' ye Basán,

¹³ qataq 'eeta'am da lchec ca llon da desoqo, nache ỹauachigui na alap da aỹem nqapaxanot.

¹⁴ Qataq sheeta'am ca 'etaxat da qaicorec, naua ipi'ineqa qalaq huesoguilo, qaq añi iquiyaqte qalaq 'eeta'am aca dapic lapa da quiguiñi.

¹⁵ Qaq na aỹap qalaq ỹataqta daqaqta, 'eeta'am ca chaic maye nhuo' lapo', ñi ỹachaxat qalaq lapaqot na ñaquiaq. Qataq ỹataqta aỹem 'alaroigui na 'alhua da seleu.

¹⁶ Qaq so qalota qauemaicpi qalaq 'eeta'am na pioxoppi da aỹem coleesop, nache aỹem nanaxachigui, nache icolaxatta'ape naua ihua'q qataq naua ichel.

¹⁷ Nache ishet da ñaloqten 'enauac na ipi'inecpi. Qaq na ñepa'aguenaxauapi qalaq ỹataqta aỹem ilotagui.

¹⁸ Qataq qanallichiguilo soua aỹogo, da yaqto' qaỹaỹaten negue't ca taỹoto soomaye.

¹⁹ Qalaxaye 'am Nataxala', saishet qome da 'am qaỹoqtaique, cha'aye nache 'am ỹa'añaxac, qataq sa 'anaỹaloxon qome da 'auanac da aỹem 'autauan.

²⁰ Qataq 'anca'alaxateeguesop qome ca ỹeelonec de'era ñachaalataxac, qataq saishet da 'aua'aqta'a da aỹem ỹalauat ne'ena pioxoppi.

²¹ Qataq aỹem 'anca'alaxateeguesop qome naua ala'api na llonpi, qataq aỹem 'eltaxaneguet ana lcouepi ne'ena huacapi.

²² Qaq aỹem sa'axatem qome da 'are'enaxat na ỹaqaỹañicpi, qataq 'am sho'oxoreetac qom lapoota'a't namayepi.

²³ Qaq qami' maye huo'o naq 'enec qanqa'eñi Ñim Nataxala', ¡qavio'oxoyiñi qome Ñimaye! Qami' maye qauachegoqoiguet so Jacob, ¡qavio'oxoyiñi qome Ñimaye! Qami' maye qauachegoqoiguet so Israel, ¡qanatamñiỹot qome Ñimaye!

²⁴ Cha'aye Ñimaye saishet da huo'o ca ỹo'otan, huo'otaq da sa iqocha'a da nque'eenaxac ca choxoraq, qataq saishet da nqañoxocheesop camaye, nda'a't da hua'axaỹa camaye da iỹaxanaique ca ntaunaguec.

²⁵ Qaq nache 'am sachegoxotchigui da ỹo'oxonnataxanaxac, da salectaigui ca lta'araic laponaxac na shiỹaxauapi, nache ỹauaachigui ñaqa'en na huo'o naq 'enec naqa'en 'am, da sepacchiguilo naua ỹa'aqtaqa maye 'am sanoto co'ollaxa.

²⁶ Qaq deque'e qome na choxoraqpi nache ivitta'a da comaraxaicpi, qataq ỹo'oxoren qome Ñim Nataxala' na nmittaique Ñimaye, huaña nache qaỹoqtrec naua vi'iye da nachaalataxac.

²⁷ Qaq tachigui lauel qome Ñim Nataxala' nache ỹe'eguelaxa Ñimaye 'enauac na ỹotta'a't shiỹaxauapi maye neta'alo naua loga'te ana 'alhua. Qataq 'enauac na llalaqpi na ỹotta'a't shiỹaxauapi da ỹa'aldoto qome naua l-llecte Ñimaye.

²⁸ Cha'aye Ñim Nataxala' nacheñi Ñim Nta'a, qaq Ñimaye nacheñi ñi ilotague' na ỹotta'a't shiỹaxauapi.

²⁹ Qaq ỹa'aroto naua l-llecte qataq natamnot Ñimaye 'enauac na qaica ca iuena'a, qataq 'enauac na taỹa'a da ỹe'eguelaxaigui ana 'alhua, cha'aye namayepi saishet da maiche ỹo'ot da qaỹoqtec da lca'alaxa.

³⁰ Qaq ca ỹalaqpi qalaq natameetacot qome Ñim Nataxala', qataq nache 'eetai' qome da da'aqtaxaatapeguem cam naỹauo shiỹaxauapi,

³¹ qaq ca dalaxaic maye ñiguiñipi qome, qalaq qaỹa'aqtaxaatapeguem de'era ỹaỹamaqchiguiñi lo'onataxanaxac Ñimaye.