Salmos 21 - La'aqtaqa Ñim Lo'onatac 'Enauacna 2013

No'onec souaxat da noxonaxanaxac

¹ 'Am Nataxala', ñi nta'a ỹataqta machiguiñi cha'aye 'aỹa'anem da la'añaxac, ñimaye ỹataqta ntootapigui' cha'aye 'aỹa'anem da loxonaxanaxac.

² 'Am 'aupacchigui da 'aỹa'anem na 'eetapeguecpi da lquiyaqteỹaxac, qataq saishet da 'aullapeguem na iỹaxanaiquepi.

³ Qataq da 'am ivireua'a, nache 'aỹa'anem da lta'araic nchoxonnataguec, qataq 'aỹa'anagui na lqaic aso naro'o oro.

⁴ Da 'am iỹaxanot da lca'alaxa, nache 'aỹa'anem, qataq da logoraic achaalataxac maye chochaq tatec.

⁵ Chegoqchigui da 'artaunaxanaxac, da ỹataqta lta'araic da la'añaxac, nache 'aỹa'anem da llo'oxoyec qataq huo'o naq 'enec.

⁶ Qataq 'aỹa'anem da chochaq tatec da nchoxonnataguec, qataq nlaqchigui 'anqa'en da ntonaxac da qoueta'aguet.

⁷ Qaq 'am nta'a, saishet qome da qouañi, cha'aye 'aupi'iỹa'a Ñim Nataxala', qataq 'aupi'iỹa'a da lsoxoyec Ñim qaỹoqotcheguemec.

⁸ Da la'añaxac na 'arhuaq iviralec qome 'enauac na 'ampa'aguenaxauapi, qataq na 'oic 'arhuaq iviralec qome na 'am nquiỹategapi,

⁹ qaq nache 'auachaigui aca nqatelaxanaxaqui maye 'ettaigui, qom ivita da 'anachaxan da yaqto' 'anmit 'enauacna. Ñim Nataxala', de'era lalemataic nmatchiguiñi qome namayepi ỹauota'a ca norec maye nlaxaañi 'enauacna.

¹⁰ Nache ỹapalaxat da yaqto' saishet da huetalec naqa'en ana 'alhua qataq saishet da ỹalecta'aguet na shiỹaxauapi, na llalaqpi qataq cam chegoxoguet namayepi.

¹¹ Qaq ỹoqo'oye na'aictaxa da huotaique da 'am na'aqchet, qataq da huotaique da huo'o ca 'am ỹo'otec, qalaxaye saishet da ỹañoxot,

¹² cha'aye 'auo'otec qome da datauec 'anqa'en, qom 'auauota'a ca 'archecnec da 'auareetagui namayepi.

¹³ Ñaq 'anachalataxaañi qome da 'ara'añaxac 'Am Nataxala', yaqto' so'onaq na no'onecpi da sho'oxorenaq da 'eetec da 'arauegaxanaxac.