Salmos 20 - La'aqtaqa Ñim Lo'onatac 'Enauacna 2013

Da atamnaxac da qaiỹaxanaique ca ntaunaxanaxac

¹ Ñim Nataxala' 'am hua'axaỹa qom qouetapoigui da 'arhuogoxo, qataq 'am iueelec qome Ñim Natamnaxala' so Jacob.

² Qataq chegoqchiguiña ye lma' qui'itta da 'am namaxa qome ca 'antaunaguec, qataq chegoqchiguiña ye Sión da 'am ỹa'añaqchet.

³ Qataq Ñimaye ntoueeta'ac qome 'enauac ana 'arachetaqtaxanaqte, qataq ỹaỹamaxareeta da ỹaconeguet ca 'auavigaxat 'arachetaqtaxanaxat.

⁴ Qataq ipacchigui naqa'en 'enauac na qonetapeguecpi, qataq imeta naqa'en 'enauac na huotaique da 'auo'otpi.

⁵ Nache so'otaq ca qantonaxac souaxat da 'oxonaxanaxac, qataq ñauaxaỹaxanaxasheguem aca qara'anaxanaqte, souaxat da le'enaxat Ñim Qanatamnaxala'. Qaq Ñim Nataxala' 'am ỹanem qome 'enauac ca 'auỹaxaataique.

⁶ Nagui aỹem saỹateeta da Ñim Nataxala' dauegaxan naqa'en so lca'aguishec nta'a, qataq huaña ye qui'itta lma' na piguem da ỹasateguet, qataq ỹauota'a da lta'araic la'añaxac da dauegaxan naqa'en.

⁷ Huo'o na pe'etega ana nnotaxaqui maye nalaataxaqui, qataq huo'o na pe'etega na lalo caipi, qomi' qalaxaye sepia'aqtega Ñim Nataxala' maye Qanatamnaxala'.

⁸ Qaq namayepi ỹa'aldañi qome naua l-llecte, nache huañi, qomi' qalaxaye ñachaataqchiguiñi, saishet da souaqañi.

⁹ 'Am Nataxala', ñaq 'aỹa'anem da doxonaxan qome ñi nta'a, qataq qomi' 'auasategueta da 'am seỹaxanaqtacot.