Salmos 2 - La'aqtaqa Ñim Lo'onatac 'Enauacna 2013

Da lo'onataxanaxac ca nta'a maye nca'aguishec

¹ ¿Ta'ainco' ye lliỹa't na ỹotta'a't shiỹaxauapi, qataq na nhuo' le'ecpi da lapaqtapiguiñi da ỹo'ot na qaica ca naigui?

² Na nta'alpi qataq na nataxala'pi ana 'alhua, qalaq huaxaỹa't qome da dataỹa'aguet Ñim Nataxala', qataq ca nta'a maye lca'aguishec Ñimaye.

³ Nache 'eeta': «Ñaq ñeqataq na lcoñetaxanaxatpi Ñimaye, ñaq ñesoxoueeguesop na laqtaxanaxatpi.»

⁴ Qaq Ñim neto'ot na piguem choche lashetac qome, Ñim Nataxala' qalaq ỹe'enai' qome namayepi.

⁵ Ime qome, nache dalemata nache iquichoqchet, nache irolec da lta'araic lalemataic da 'enapega, 'eeta':

⁶ «Mashe sogote da sauo'o ñi nta'a da ilo'ogue añi Sión, añim qui'itta ñeqasoxonaxa.»

⁷ Qaq aỹem sa'axatec qome da lhuennataxac Ñim Nataxala', cha'aye Ñimaye aỹem 'enapega, 'eeta': «'Am, nache 'am ỹalec, aỹem 'am seco'oic na na'a'q.

⁸ Qaq aỹem 'auỹaxanot qome, nache 'am sanem na ỹotta'a't shiỹaxauapi da yaqto' 'aralamaxatpi, qataq ivira'alo qome naua loga'te ana 'alhua da 'am sanem da 'aralamaxat.

⁹ Nache 'aurolec qome aca 'arashelte lcat, da 'anlaxaañi na nta'alpi nache ỹataqta 'aulaxachigui, 'eeta'am 'anqa'en aca naco'oña 'alhua.»

¹⁰ Qaq qami' nta'alpi ỹataqta qauennataxañi qome, qataq qami' nataxala'pi ana 'alhua, ỹataqta qanañañiiguet qome da napaxaguenataxanaxac.

¹¹ Qataq da qauo'onataxañiỹot Ñim Nataxala', qalaq ỹataqta huo'o naq 'enec qanqa'eñi, qataq ỹataqta qauamaichiguiñi da qavio'oxoyiñi Ñimaye.

¹² Qataq qavio'oxoyiñi Ñim Nataxala', yaqto' saishet da dalemata, cha'aye saiuena'a da dalemata nache qaullivi da huangui na nqa'aic, cha'aye da lalemataic ishet da nque'elaxatta da 'eroigui. ¡Qaq ỹataqta machiguiñi qome ca nmittaique da ltelaxanaqtaic Ñimaye!