Salmos 19 - La'aqtaqa Ñim Lo'onatac 'Enauacna 2013

Da llo'oxoyec Ñim Lo'onatac 'Enauacna ỹachaxan nam lo'onatacpi

¹ Na piguem, namaye ỹa'axattac da llo'oxoyec Ñim Lo'onatac 'Enauacna, qataq qomi' da'aqtaxaatapeguema 'enauac na lo'onatacpi Ñimaye.

² Ye 'oonolec na'a'q, qalaq maiche na'aqtaxaatague' ye lỹa na'a'q, qataq ye pe' qalaq maiche na'aqtaxaatague' ye lỹa pe.

³ Na'aictaxa da huo'otaq sa qaỹa'axaỹa na la'aqtacpi, qataq saishet da qaỹa'axaỹa da lavilỹaxac,

⁴ qalaxaye da lavilỹaxac dellimigui naqa'en ana 'alhua, qataq naua la'aqtaqa ivira'alo naua loga'te ana 'alhua, maye huaña da qaỹauo'o lma' co'ollaxa añi nala'.

⁵ Qaq aña'añi nala' 'eeta'am naxa ca auonaq da nnoxonec chegoqtoigui ca nỹec maye laronqa', ỹataqta machiguiñi 'eeta'am ca qomitaxaic da ivita da quegue so nqa'aic.

⁶ Qaq da nnoxoosheguem añi nala' nache jec, queto'ot na piguem nache ivitta'a ca loga't ana 'alhua, nache qaica ca ishet da 'eteguet na le'eraxa.

⁷ Naua lqataxaco Ñim Nataxala' ỹataqta ỹaỹamaqchiyiñi, cha'aye ỹan da dalaxaic achaalataxac. Da lamaxasoxonaxac Ñim Nataxala' ỹataqta saishet da nqochen, cha'aye damaye ỹo'ot da ỹaanaxanaxaic ca shiỹaxaua huesota da lataxac.

⁸ Na lqataxacpi Ñim Nataxala' ỹataqta no'oitegue, cha'aye ỹauo'o da ntonaxac aca nquiyaqte. Qataq naua lamaxasoxonaxaco Ñim Nataxala' ỹataqta qui'itte', qataq ỹataqta nauaachiyiñi naqa'en naua na'ai'te.

⁹ Da huo'o naq 'enec qanqa'en Ñim Nataxala' damaye ỹataqta ỹaỹamaqchiguiñi, qataq nache 'eetai' qaica ca ldaxac. Naua la'aqtaqa Ñim Nataxala' ỹataqta 'eesora, qataq 'enauaque naamaye ỹataqta no'oiteguelo,

¹⁰ qataq ỹataqta napacalec da lashiichiỹaxac ca no'on oro, qataq ỹataqta napacalec da lamaic na te'esaq lli'i maye huetagui ca lte'.

¹¹ Qataq naamaye nataqa'en nache nhuogoctagueeco ne'ena 'aralamaxat 'aramaxashec, qataq ỹataqta huo'o da naigui da qaỹalaxagueta naamaye.

¹² ¿Negue't ca ishet da ila'a ca maiche lalamaxat lsomaxac? Ỹoqo'oye aỹem 'auchoxoren qome, 'am Ỹataxala', souaxat na ỹasouaxashetpi maye saqcha'a.

¹³ Qataq aỹem 'anqateeguesop qome da ña'amqaanaxac, qataq saishet qome da aỹem 'auashenem da ña'amqaanaxac da aỹem loxonec. Yaqto' nalochiguiñi da ỹataxac, qataq saishet da lta'araic ca ỹasouaxashet.

¹⁴ Nache ỹataqta 'auaỹamaxareete' naua ỹa'aqtaqa qataq naua iuennataxaco, 'am Ỹataxala', nache 'am maye aỹem 'aupelteetalec qataq aỹem 'ampaxattalec.