Salmos 18 - La'aqtaqa Ñim Lo'onatac 'Enauacna 2013

Da qoỹan da 'achecỹaxac souaxat da noxonaxanaxac

¹ 'Am Nataxala', aỹem ỹataqta 'am sauotec, cha'aye nache 'am ỹa'añaxac.

² 'Am, aỹem 'ampaxattalec qoneta'am aca coma' maye ỹe'eguenaxaqui, nache 'am, aỹem 'antela'a qataq aỹem 'anca'alaxattauec, 'am, maye nache 'am ipaqtaxanaxat, qataq ñeqañoxotaqa' maye ỹataqta qaỹoqotcheguemec.

³ 'Am Nataxala', 'am maye 'itchiguiñi da 'am qaỹo'oxoren, cha'aye naxa da 'am seỹaxana nache aỹem 'anca'alaxateeguesop na ñepa'aguenaxauapi.

⁴ Da nleuaxa qalaq aỹem lpachigui naqa'en so lqoinaxanaxat, qataq ỹo'ot da icolanaxa so la'auaxac maye nlaxaañi 'enauacna.

⁵ Qataq na lqoinaxanaxatpi añi huachiqui mashe aỹem loxonec, nache mashe sootaigui aso lqoina maye dalaataxanapec.

⁶ Qaq co'ollaq souaigui da iuogoxo nache seỹaxana Ñim Nataxala', seỹaxanot da aỹem itauan Ñim Lo'onatac 'Enauacna, qaq Ñimaye aỹem hua'axaỹa co'ollaq huaña añi atamnaxaqui maye lalamaqte, cha'aye da ỹa'alaxac ishet da ivira'a da hua'axaỹa Ñimaye.

⁷ Qaq huaña nache daỹapec qataq cholaxan ana 'alhua, qataq daỹa'ape naua na'attaleguete ana qasoxonaxapi, ỹataqta cholaxa'n souaxat da lalemataic Ñimaye.

⁸ Na lmic qalaq naviigui na lmala'q, na alap qalaq chegaqaigui na norec maye davigaqtaxanapec, qataq ana 'ettaigui poqopi.

⁹ Qataq ỹauachigui na piguem nache huenotec, nache petaigui so sansattec lo'oc.

¹⁰ Qataq nelec so huo'oi naua laua't le'enaxat querubín, nache huaỹo quetaigui na la'at.

¹¹ Qataq ỹauo'o nqañoxotaxaqui so lta'araic napalaxa maye coleesop Ñimaye, qataq ỹauo'o lpe'l so sansattec lo'oc maye nlaqchigui na 'etaxat.

¹² Nache na le'eraxa Ñimaye chegaqaigui so lo'oc, qataq aso lache qataq aso 'ettaigui poqopi.

¹³ Ñim Nataxala' maye Nataỹaña 'enauacna ỹalachigui naqa'en na piguem da lavilỹaxac, nache lỹatec ana lache qataq ana 'ettaigui poqopi.

¹⁴ Ñimaye ỹasaxauec na lqashelgaxa 'eeta'am naqa'en ana checna, nache na ñepa'aguenaxauapi datauec qataq nlagaxattac.

¹⁵ Huaña nache yo'oqta na pa'aguiñi aso auaxai, qataq na na'attalec ana 'alhua ishet da qaila'a, souaxat da 'arvilỹaxac dequichoqtaxan 'Am Nataxala', qataq souaxat so lta'araic 'ara'at maye 'auasheerelec anamaye.

¹⁶ Ñim Lo'onatac 'Enauacna ỹauota'a lhuaq da aỹem ỹacona co'ollaq hueta'a ye qaỹoqotcheguema, nache aỹem nqatsheguem da sootangui aso qaỹoqchiguingui auaxai.

¹⁷ Ñimaye aỹem nca'alaxateeguesop na depa'aguenataxaatac maye ỹataqta 'añaxaicpi maye aỹem nquiỹatega qataq aỹem napacalec da la'añaxac.

¹⁸ Qataq aỹem iloquiaxan namayepi co'ollaq sootapoigui da qauem, qalaxaye Ñim Nataxala' aỹem itauan.

¹⁹ Aỹem nqatec nache aỹem ỹanalec ye qalochiguiñi iraqa', aỹem nca'alaxatec cha'aye aỹem ỹauotec.

²⁰ Ñim Nataxala' ỹauo'o da ñesheetenaguec souaxat da qui'itta ỹataxac, qataq souaxat da qui'itte' naua ihua'q,

²¹ cha'aye aỹem ỹataqta shectegue da nqa'aicỹaxac Ñim Nataxala', qataq saỹauanago' da sheca'ai Ñim Lo'onatac 'Enauacna.

²² Ỹataqta 'enauac da ñetoueeta'ac na lapaxañi lataxacpi, qataq saishet da saxanec na lqataxacpi Ñimaye.

²³ Da ỹataxac da sooto'ot Ñimaye qalaq ỹataqta qui'itta ñaqa'en, qataq saishet da so'ot na qauemsat.

²⁴ Ñim Nataxala' ỹauo'o da ñesheetenaguec souaxat da qui'itta ỹataxac.

²⁵ Qataq 'am Nataxala' 'auchoxoren ca choxonnataxanaxaic, qataq 'auo'otec da no'on ca no'on da lataxac,

²⁶ qataq da qui'itta 'arataxac 'auachaxana ca qui'itta da lataxac, qalaxaye sa 'anqalaate' da 'anapacalec ca shepecaiqa naua la'aqtaqa.

²⁷ Qataq 'am 'anca'alaxatec ca ỹataqta choxoraq, qalaxaye ỹataqta huetaiya' 'anqa'en na ño'oxonnaxaicpi.

²⁸ 'Am Nataxala', aỹem 'ettalec 'anqa'en, 'Am Ñatamnaxala', aỹem 'aucoỹattalec da sootaigui na napalaxa.

²⁹ Qaq de'era 'artaunaxanaxac ỹo'ot da ishet da seloquiaxan ca alleppi, qataq ishet da senoxotaueegue da laỹe ca lpaqtaxat ca huaqta'a't nỹecpi.

³⁰ Da nqa'aicỹaxac Ñim Lo'onatac 'Enauacna ỹataqta ỹaỹamaqchiguiñi, qataq naua ỹachaxana'ape Ñim Nataxala' ỹo'o't da aquitaxac, Ñim Lo'onatac 'Enauacna mpaxattalec nam ỹataqta pi'iỹa'a Ñimaye.

³¹ ¿Negue'tom ca lỹa Lo'onatac 'Enauacna ye nacheñita Ñimaye? Qataq ¿negue'tom ca lỹa qaramta ye nacheñita Ñim Qanatamnaxala'?

³² Qaq Ñim Lo'onatac 'Enauacna, nacheñi ñi ỹo'ot da ỹa'añaxac, qataq ỹo'ot da nalochiguiñi da ỹecỹaxac,

³³ qataq ỹo'ot da sailaua'aguelo naua ichel, 'eeta'am naqa'en ana chegaxango, qataq ỹo'ot da aỹem qaramchiguiñi da shectalec na qaỹoqotcheguema 'alhua,

³⁴ qataq aỹem ỹapaxaguenec da iloquiaxac, qataq ỹauo'o da ỹa'añaxac da sauec na checnec maye lcat bronce.

³⁵ 'Am, aỹem mpaxattalec 'anqa'en da 'arca'alaqtaxanaxac, qataq aỹem 'anasoqtañi 'auauota'a na 'arhuaq 'oic, da 'arauotaxanaqtaic ỹo'ot da qaica ca seueetac.

³⁶ No'oitegue 'anqa'en da ỹecỹaxac, ỹoqo'oye naua ichel saishet da salleerauec.

³⁷ Co'ollaq secaatac so ñepa'aguenaxauapi nache ishet da sevi', qataq saishet da ye'eguelaq co'ollaq saxanaxa da nlachiguiñi ñaqa'en somayepi.

³⁸ Ỹataqta huetaiya' ñaqa'en somayepi. Nache saishet da qaltaq ñisheguem. Huañi nache 'enauac hueto'oto naua ichel.

³⁹ 'Am aỹem 'aỹa'anem co'ollaxa da ỹa'añaxac da seloqui qataq 'auo'otec da aỹem ỹa'aroto naua l-llecte na 'etaxaloxoicpi,

⁴⁰ qataq dataueeguesop 'anqa'en aỹem na ñepa'aguenaxauapi. Ỹoqo'oye ishet da ñelaxaañi na aỹem nquiỹatapega.

⁴¹ Nache iỹaxaataique da qaitauan, qalaxaye saishet da huo'o ca itauan, qataq iỹaxaatega Ñim Nataxala' qalaxaye saishet da ỹasateguet.

⁴² Ỹataqta selaxachigui 'eeta'am ñaqa'en na lsoche na 'alhua maye huaỹoxon naqa'en na la'at, qataq sapetapigui 'eeta'am ñaqa'en na nshaxa na nqa'aic.

⁴³ Aỹem 'anca'alaxateeguesop da l-loquiaxac na shiỹaxauapi. Qataq aỹem 'aỹa'anem da aỹem lataxala' na ỹotta'a't shiỹaxauapi ana 'alhua, qataq aỹem do'onataxaatacot na shiỹaxauapi maye saishet da sauatton.

⁴⁴ Qaq da aỹem hua'axaỹa nache aỹem ỹalaxaguet, qataq na chegaqauec shiỹaxauapi aỹem ỹo'oxoreetac,

⁴⁵ qaq na shiỹaxauapi maye chegaqauec qalaq nlauchiguiñi, qataq iviloxol da jec da ca'ai ca lle'eguenaxaqui.

⁴⁶ Ñim Nataxala' maye aỹem mpaxattalec nache 'eetai' qome da qaỹo'oxoreetac, qataq 'amaqtaqaic qanqa'en Ñim Lo'onatac 'Enauacna maye ica'alaxaqui.

⁴⁷ Ñim Lo'onatac 'Enauacna nacheñi ñi aỹem iueelec co'ollaxa, qataq hueto'ot naqa'en aỹem na shiỹaxauapi.

⁴⁸ Ñimaye aỹem nca'alaxateeguesop da lalemataic na ñepa'aguenaxauapi, nam saỹalaqpi maye aỹem mpa'aguene'. 'Am Nataxala' 'am maye aỹem 'anca'alaxateeguesop na shiỹaxauapi maye qaica ca iren.

⁴⁹ Qaq ỹoqo'oye ỹataqta 'am sho'oxoren da sootaigui na ỹotta'a't shiỹaxauapi, qataq so'ootac da llo'oxoyec da 'are'enaxat.

⁵⁰ Qataq ỹataqta 'aỹa'anem da lta'araic loxonaxanaxac na nta'a maye 'arca'aguishec, qataq nache 'eetai' qome da 'arauoche na David qataq ca chegoxoguet llalaqpi.