Salmos 17 - La'aqtaqa Ñim Lo'onatac 'Enauacna 2013

Atamnaxac da qaiỹaxanaique ca nalochiguiñi lataxac

¹ 'Am Nataxala', ñaq 'aua'axaỹa qome da ñachoxonnaxac, qataq 'aulo'oguet da ñatamnaxac cha'aye saishet da choche satenataxaatac.

² Nache 'am qome da aỹem 'ampaxaalec, cha'aye 'am maye 'auaỹateeta ca nalochiguiñi lataxac.

³ Cha'aye 'am 'auaỹateete' naua iuennataxaco, qataq ye pe qalaq aỹem 'auchemaxattac qataq aỹem 'avi'egueetac, qalaxaye saishet da 'auanata ca saỹaỹamaxañi de'era ñachaalataxac. Qataq na aỹap saishet da chegaqaigui ca saỹaỹamaxañi,

⁴ da sheeta'am na laỹepi ỹalleppi, cha'aye mashe sheca'ai da loquiaxac da yaqto' sepacchigui da 'aramaxasoxonaxac.

⁵ Cha'aye ỹataqta shectegue da 'anqa'aicỹaxac, qataq saỹauanega da sheca'ai damaye.

⁶ 'Am Ñatamnaxala', 'am seỹaxanot cha'aye aỹem 'auasateguet naxa, ñaq aỹem 'auqocha'a qataq 'aua'axaỹa da ñatamnaxac.

⁷ Ñaq aỹem 'auachaxana qome da llec da 'arsoxoyec, 'am maye 'anca'alaxateeguesop naxa na mpa'aguenaxauapi, na nmittaique da 'ara'añaxac da yaqto' 'ampaxattalec.

⁸ Aỹem 'antela'a qome, 'eeta'am 'anqa'en da 'artelaxa naua 'ara'aillalel, aỹem 'auacho'ot qome na lpaqal naua 'araua't da aỹem 'oxocheesop

⁹ na qauemaicpi maye aỹem iloquiaxaatac, qataq na ñepa'aguenaxauapi maye aỹem coleesop.

¹⁰ Qaq namayepi ỹataqta sa detelaqtaxan, qataq da detaqa qalaq ỹataqta na'amqaanaxaiqa naua la'aqtaqa,

¹¹ qataq saqaỹapeque da nauaata'ape naua iqauaxaqui', nache iyaqtai' da aỹem ỹasaxaguet na 'alhua.

¹² Namayepi 'eeta'am na llonpi maye huo'o da lyaxa da huo'o ca loxonec, da dauanaxaatac hueta'a ca nqañoxotaqa'.

¹³ Ñaq 'anachaañi qome 'Am Nataxala', ñaq 'anachaateguet namayepi nache 'auamaxañi, qataq 'auo'ogoxona ca 'ainec da aỹem 'anca'alaxateeguesop ne'ena qauemaicpi.

¹⁴ 'Aurolec qome da 'ara'añaxac, 'Am Nataxala' da aỹem 'anca'alaxateeguesop namayepi, qataq ca'ai 'anqa'en ana'ana 'alhua maye nhuanaua'a de'era nachaalataxac. Ỹoqo'oye 'aua'axaỹa'a qome namayepi da yaqto' qalota da lsallaxa, qataq da ỹataqta icoma' na llalaqpi da deque'etac, qataq da ivirauga 'anqa'en da lquia'axac ca laualpi.

¹⁵ Qalaxaye aỹem, qom saỹaten da qaica ca sasouaxat nache samachiguiñi da selogui da 'arashiguiỹaxac, na'aictaxa da choche 'am samato'ot da ñelouec.