Salmos 16 - La'aqtaqa Ñim Lo'onatac 'Enauacna 2013

Ca qoỹan nalamaxat maye qaica ca 'ena'am

¹ Ñaq aỹem 'antela'a qome 'Am Ñatamnaxala', cha'aye nache 'amta da 'am ỹe'eguenaxala'.

² Cha'aye 'am shenapega co'ollaxa, sheeta': «Nache 'amta da 'Am Ỹataxala', qaica ca lỹa chegoqo'ot na ỹalamaxatpi.»

³ Na atamnaxala'pi maye huetalec ne'ena 'alhua ỹataqta 'añaxaicpi, cha'aye nache 'enapec na ỹo'oxoreetac namayepi,

⁴ qalaxaye na quetague' ne'ena atamnaxala'pi nquictauec da nqui'ic. Qaq aỹem saishet qome da salegueua'a na icoldec naua ntago'q da lachetaqtaxanaxat. Qataq saishet da ñasaxauec na le'enaxatpi namayepi.

⁵ 'Am Nataxala', nache 'amta da aỹem qoueta'aguet, cha'aye nache 'amta da aỹem 'aỹa'anem da 'archoxonnataxanaxa, da ñachaalataxac qalaq nache huetaiguilo naua 'arhua'q.

⁶ Ỹataqta 'onaxaic ye aỹem taalec da ima', qataq ỹataqta 'onaxaic ye aỹem taalec da ỹalamaxat.

⁷ Sanot da ña'achecỹaxac Ñim Nataxala', cha'aye Ñimaye aỹem hua'aqtega, cha'aye ivira'a ye pe da ỹa'aloqchetta'ape naua iuennataxaco.

⁸ Qaq aỹem qalaq nache 'eetai' naxa da sa seỹotaique Ñim Nataxala', Ñimaye nache huetaua'a ñaqa'en na aỹoic, nache qaica ca ishet da souañi naqa'en.

⁹ Qaq ỹoqo'oye ỹataqta machiguiñi añi iquiyaqte, qataq aỹem nlaqchigui da ñetonaxac. Nache 'enauac da ñachaalataxac qaica ca ndaqtaique,

¹⁰ cha'aye da ñachaalataxac saishet da 'ano'onaxatangui aca huachiqui, qataq saishet da 'aualatangui aca nshere ne'ena 'aramaxashec.

¹¹ Qataq aỹem 'auachaxana da llec da achaalataxac, qataq aỹem nlaqchigui 'anqa'en da ñetonaxac da 'am soota'aguet qataq nache 'eetai' da ỹamaicỹaxac da soota'ague na 'oic.