Salmos 149 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna nacheñi ñi Nta'a

¹ ¡Qaỹo'oxoren qome Ñim Nataxala'! Qauo'onaxañeeto'ot qome Ñim Nataxala' qauo'oñi qome ca dalaxaic no'onec, qavio'oxoyiñi qome da qaualequiitaigui na ỹa'amaqteetac Ñimaye.

² Qami' Israel le'ecpi, qantoñeetapeguec qome Ñim qami' lo'onataqa, qami' Sión lashe', qantoñiitapeguec qome Ñim Qarta'ai.

³ Qauasocheetac qome da qavio'oxoyiñi da le'enaxat Ñimaye, qataq qauauoita'a aca nasaquiaxanatapi qataq nviquepi arpa da qauo'onaxañeeto'ot Ñimaye.

⁴ Cha'aye Ñim Nataxala', ỹamaateguet na lalamaxat nhuo' le'ecpi, qataq no'on naqa'en da lca'alaxa ca qaica ca la'amaqchec.

⁵ Qaq machiguiñi qome nam ỹa'amaqteetac Ñimaye souaxat da lauegaxanaxac, qataq do'onaxaatac da huetalec ca lmala'.

⁶ Na'axannec da lavilỹaxac da ỹo'oxoreetac Ñim Lo'onatac 'Enauacna, qataq nasoqta'a ca ỹeelonec maye dos naua llaqa'ate,

⁷ da yaqto' ỹo'ot ca lvi' da ỹe'eguelaxateguet na ỹotta'a't shiỹaxauapi, qataq ỹauo'o ca nhuaxanaguec na nhuo' le'ecpi,

⁸ qataq ỹauota'a ca lcat da icoñerai' na lta'alpi namayepi, qataq ỹauota'a ca npaqtac lcat da icoñerai' nam huo'o da la'amaqchec namayepi,

⁹ da yaqto' ipacchigui qanqa'en dam lapaqtañi lataxac maye nanettañi. Qaq damaye nachera da ỹo'ot qome da llo'oxoyec 'enauac nam quetague' Ñimaye. ¡Qaỹo'oxoren qome Ñim Nataxala'!