Salmos 148 - La'aqtaqa Ñim Lo'onatac 'Enauacna 2013

Da llo'oxonnataxanaxac nam lo'onatacpi Ñim Nataxala'

¹ ¡Qaỹo'oxoren qome Ñim Nataxala'! ¡Qavio'oxoyiñi qome Ñim Nataxala', qami' maye qoviito'ot na piguem! ¡Qavio'oxoyiñi qome da qoviita'a na qaỹoqotcheguemec!

² ¡Qavio'oxoreñi 'enauac qami' maye qami' lamaxashecpi Ñimaye! ¡Qavio'oxoyiñi 'enauac qami' maye qami' nalleppi Ñimaye!

³ ¡'Am nala', qataq 'am ca'agoxoic, qavio'oxoyiñi qome Ñimaye! ¡Qami' huaqaañipi maye qami' 'ettaiguipi, qavio'oxoyiñi qome Ñimaye!

⁴ ¡'Am piguem maye 'am qaỹoqotcheguemec, 'avio'oxoren qome Ñimaye, qataq 'am 'etaxat maye qouetalec nam piguem!

⁵ Qavio'oxoyiñi qome da le'enaxat Ñim Nataxala', cha'aye Ñimaye co'ollaq ỹan da la'aqtac, nache yo'oq 'enauacna,

⁶ Ñimaye ỹa'ayiñi 'enauac namayepi qaq nache sa deraỹai' naqa'en, qataq lapaxañi da lqataxac maye saishet da qanaralaxat.

⁷ Qavio'oxoyiñi qome Ñim Nataxala', qami' maye qoviitalec ana 'alhua, qami' lta'araicpi shiguiỹacpi maye qoviitangui ana auaxai, qataq 'am qaỹoqchiguingui auaxai.

⁸ Qataq na nqashelgaxa, lache, aloñi qataq na sheue, qataq na lta'araic la'at maye ỹalaxaguet da namaxasaguec.

⁹ Ana qasoxonaxapi, ana lcomaraxalatepi, ana qo'oipaqpi maye huo'o ana ala qataq 'enauac ana cedropi.

¹⁰ Na shiguiỹacpi huauec qataq na ishet da nlo, na maỹopi, qataq na hualectapigui'pi.

¹¹ Qataq na nta'alpi maye netalec ana 'alhua, 'enauac na ỹotta'a't shiỹaxauapi, qataq nam nataxala'pi qataq na nta'alpi ana'ana 'alhua.

¹² Na nsoxoppi qataq na qa'ampi, ỹa'axaiquipi qataq na ñaqpiolec.

¹³ Qavio'oxoyiñi qome da le'enaxat Ñim Nataxala', cha'aye nacherata da le'enaxat Ñimaye da Nataỹaña 'Enauacna, da llo'oxoyec imattalec na piguem qataq ana 'alhua.

¹⁴ Ñimaye ỹanem co'ollaxa da la'añaxac na lalamaxat nhuo' le'ecpi. Qaq ñaq ỹo'oxoren qome 'enauac na pe'etegapi Ñimaye, na Israel le'ecpi maye sa iỹotaique Ñimaye. ¡Qaỹo'oxoren qome Ñim Nataxala'!