Salmos 144 - La'aqtaqa Ñim Lo'onatac 'Enauacna 2013

Da 'eetec ca nta'a da ỹanot da na'achecỹaxac Ñim Nataxala'

¹ Qaỹo'oxoren qome Ñim Nataxala' maye ipaqtaxanaxat, Ñim ỹapaxagueneque naua ihua'q da loquiaxac, qataq naua ỹaxaata da alaataxac.

² Ñimaye aỹem ỹauotec, qataq aỹem mpaxattalec, Ñim qaỹoqotcheguema ñeqañoxotaqa' maye aỹem huesochiguiñi naqa'en. Ñim ipaqtaxanaxat maye aỹem mpaxattalec, Ñim aỹem ỹanem da ỹa'añaxac da selotague' na ihuo' le'ecpi.

³ 'Am Nataxala': «¿Negue'tom ca naigui ca shiỹaxaua da 'auennatega, qataq cam shiỹaxaua llalec da sa 'aucoua'ai?»

⁴ Cha'aye ca shiỹaxaua 'eeta'am da 'oonolec qancosaueegue na na'at, da nachaalataxac qalaq sa ilaua'ague 'eeta'am ca lpaqal.

⁵ 'Am Nataxala', ñaq 'auauatec qome na piguem nache 'aunotec, nache 'apoteua'a ana qasoxonaxapi yaqto' nchisheguem ca lmala'q.

⁶ Ñaq 'auanacot qome ca nqashelgaxa qataq aca 'archecnapi, nache 'aulagaxatapec qome na 'am ipa'agueetacpi.

⁷ Ñaq 'auachegoxotcheguema qome na qaỹoqotcheguema da aỹem 'anachaxaaña na 'arhuaq, nache aỹem 'anca'alaxateeguesop na qalota 'etaxat, qataq da la'añaxac na chegaqauec shiỹaxauapi,

⁸ cha'aye namayepi da detaqa qalaq saq 'e'n naua la'aqtaqa, qataq da ỹachaxaasheguem na lhuaq aloiguishec, qalaq saishet da 'en ca 'enapec.

⁹ 'Am Nataxala', aỹem so'on qome ca dalaxaic ỹo'onec, qataq sauota'a aca ivique arpa da 'am sho'oxoren.

¹⁰ 'Am maye 'aỹa'anem da loxonaxanaxac na nta'alpi, qataq 'anca'alaxateeguesop ca ỹeenolec na 'aramaxashec David.

¹¹ Ñaq aỹem 'anca'alaxatec qome, qataq aỹem 'anca'alaxateeguesop da la'añaxac na chegaqauec shiỹaxauapi, cha'aye da detaqa qalaq saq 'e'n naua la'aqtaqa, qataq da ỹachaxaasheguem na lhuaq aloiguishec qalaq saq 'en ca 'enapec.

¹² Da lañaxataxac da nnogotshec na qoyalaqpi, 'eeta'am qome da lañaxataxac aca nañiguishepi, qataq ana qoyalepi 'eeta'am qome aca qano'onaxatta nhuoqtepi, maye llo'oxoraqte ca nỹec lta'araic.

¹³ Naua naỹamaqtaxaqui' na ala na qorañiguishec, ña nlaqchiguilo qome ca ỹotta'a't ala ca qorañiguishec, qataq ca qana'atetpi ỹataqta nquictauec qome ye lcata, nache ỹataqta nlaqtelec na qano'onaxapi.

¹⁴ Ca qarauegaxanaxala'pi ñaq huo'o qome da la'añaxac da qaỹo'onataxaalec, saishet qome da huo'o ca ñegueuo qataq ca ñeguec, qataq qaica ca na'alaxac naua qanqa'aico souaxat da nachetataic.

¹⁵ Ỹataqta machiguiñi qome ca nhuo' le'ecpi maye hueto'ot 'enauac de'era, ỹataqta machiguiñi qome ca nhuo' le'ecpi maye Natamnaxala' Ñim Nataxala'.