Salmos 143 - La'aqtaqa Ñim Lo'onatac 'Enauacna 2013

Da qaiỹaxanaique da ltaunaxanaxac Ñim Nataxala'

¹ 'Am Nataxala', ñaq 'aua'axaỹa da ñatamnaxac, ñaq 'aulo'oguet da ñachoxonnaxac, ñaq aỹem 'auasateguet, cha'aye no'on da 'arataxac qataq 'aupacchiguilo naua qona'ape.

² Saishet qome da 'anmittac ne'ena 'aramaxashec, cha'aye qaica ca 'enapec qaica ca ỹasouaxat da 'am datato'ot.

³ Nam ñepa'aguenaxauapi, aỹem icaatac da huotaique da aỹem ỹalauat, qataq da aỹem ỹo'orauga ca napalaxa da yaqto' sheeta'am ca mashe ileu co'ollaxa.

⁴ Aỹem mashe qaica ca ỹa'añaxac, añi iquiyaqte qalaq mashe nquictañi da la'añaxac.

⁵ Qaq tachigui iuel soua hua'au' vi'iye, nache seuennataxaateguelec 'enauac nam 'auo'otpi co'ollaxa, qataq 'enauac na lo'onatacpi naua 'arhua'q.

⁶ 'Am sachaxaato'oto naua ihua'q, cha'aye da ñachaalataxac ỹataqta 'am iuen, sheeta'am ca 'alhua deqaqta maye iuen ca 'etaxat.

⁷ 'Am Nataxala', sa 'anaỹaloxon qome da aỹem 'auasateguet, cha'aye mashe huotaique da vi'iigueta naua ỹa'a'che, saishet qome da aỹem 'oxocheesop da 'artaunaxanaxac, yaqto' saishet da sheeta'am ca taỹa'a aca huachiqui.

⁸ Ñaq aỹem 'auaỹaanaxanaxanec da 'arauotaxanaqtaic ye nte'eta, cha'aye nache 'am sacheto'ot da ipi'iỹaxac, ñaq aỹem 'auachaxanegue qome ca nqa'aic maye ishet da sateuga, cha'aye 'am sanot co'ollaxa da ñachaalataxac.

⁹ 'Am Nataxala', ñaq aỹem 'anqateeguesop qome na ñepa'aguenaxauapi, cha'aye nache 'am maye 'am ỹe'eguenaxala'.

¹⁰ Aỹem 'auapaxaguenec qome da so'ot ca qonetapeguec, cha'aye nache 'Am Ñatamnaxala'. Som no'on Saqcha'a 'Ara'añaxac ñaq aỹem ỹauega qome ca nalochiguiñi 'alhua.

¹¹ Qaq souaxat da 'are'enaxat, 'Am Nataxala', nache aỹem 'anca'alaxattauec qome qataq souaxat da no'on 'arataxac, nache aỹem 'anqateeguesop da ñeque'eenaxac.

¹² Qaq souaxat da lta'araic 'arauotaxanaqtaic, nache 'anlaxaañi qome na ñepa'aguenaxauapi, 'anlaxaañi qome 'enauac na aỹem ipa'agueetacpi, cha'aye maiche aỹem 'aramaxashec.