Salmos 142 - La'aqtaqa Ñim Lo'onatac 'Enauacna 2013

Atamnaxac da qaiỹaxanaique da nchoxonnataxanaxa

¹ Aỹem, ỹataqta ña'axannec da ivilỹaxac da seỹaxanot Ñim Nataxala', ỹataqta ña'axannec da ivilỹaxac da seỹaxanaique da ñechoxonnataguec.

² Ayem sa'aqtaxanem Ñimaye na sasaỹamaxaren, aỹem sa'aqtaxaatem Ñimaye da ỹaquicoxo.

³ Naxa da mashe qaica ca ỹa'añaxac, qalaq 'Am Nataxala', aỹem 'auachaxana so nqa'aic, cha'aye so nqa'aic maye shectague' qoỹanangui aso nqoinapi.

⁴ Ñaq 'auamata'ague qome na aỹoic, yaqto' 'aula'a da qaica ca aỹem itauan, qaica ca ỹe'eguenaqa', qataq qaica ca aỹem huapegue'.

⁵ 'Am Nataxala', 'am seỹaxanot, sheeta': «'Am nache 'am da aỹem 'ampaxattalec, nache 'amta da aỹem qoueta'aguet, da sootalec ana 'alhua maye huetalec na huo'o da lca'alaxa.»

⁶ Ñaq 'aua'axaỹa qome da iỹaxanaxac cha'aye mashe qaica ca ỹa'añaxac, aỹem 'anca'alaxateeguesop qome na aỹem icaatacpi, cha'aye namayepi ỹaguec da 'añaxaicpi, aỹem napacalec.

⁷ Aỹem 'anqateeguesop qome da ñecoñetaguec, yaqto' sho'oxoreetac qome da 'are'enaxat. Ca no'on da lataxac qalaq aỹem coleesop qom ila'a da 'archoxonnataxanaxa da sheeta.