Salmos 138 - La'aqtaqa Ñim Lo'onatac 'Enauacna 2013

Da qoỹanot da 'achecỹaxac Ñim Nataxala'

¹ 'Am Nataxala', aỹem imauec da iquiyaqteỹaxac da 'am sho'oxoren, qataq so'on nam no'onecpi qom satato'ot ca atamnaxala'pi.

² Qataq sa'alyiñi qome naua illecte satategue da pa'aỹa'ague añi qui'itta atamnaxaqui maye 'aralamaqte, sho'oxoreetac qome da 'are'enaxat souaxat da 'arauotaxanaqtaic qataq da 'arsoxoyec, cha'aye 'auo'ot da la'amaqchec da 'are'enaxat, qataq naua 'ara'aqtaqa nataỹaña 'enauac na huetalecna.

³ Co'ollaq 'am seỹaxanot qalaq aỹem 'auasateguet, aỹem 'aua'añaqchet qataq dalaxaic 'anqa'en da ỹa'añaxac.

⁴ 'Am Nataxala', 'enauac qome na nta'alpi maye netalec ana 'alhua da 'am ỹo'oxoren, qom na'axaỹaxanalo naua 'ara'aqtaqa.

⁵ Do'onaxaatac qome da ỹo'oxoreetac da 'icỹaxac, cha'aye da 'ayo'oxoyec 'Am Nataxala', ỹataqta lta'araic.

⁶ Ñim Nataxala', qaỹoqotcheguema, qalaxaye ilo'oguet cam qaica ca ye, da lmeenaxanaxac Ñimaye qaỹoqta naqa'en na ño'oxonnaxaicpi.

⁷ Naxa da huo'o da ỹachetataic qalaq aỹem nca'alaxattauec, na 'arhuaq qalaq npaxateguet da layeloxo na ñepa'aguenaxauapi, na 'arhuaq 'oiguishec aỹem nca'alaxatec.

⁸ Ñim Nataxala', ipacchigui qome ca 'eetapeguec dam sheeta, da 'arauotaxanaqtaic 'Am Nataxala', chochaq tatec, qaq saishet qome da qoca'ai nam lo'onatacpi naua 'arhua'q.