Salmos 135 - La'aqtaqa Ñim Lo'onatac 'Enauacna 2013

Da ño'oxonnataguec da le'enaxat Ñim Lo'onatac 'Enauacna

¹ Qaỹo'oxoren qome Ñim Nataxala' Qavio'oxoyiñi qome da le'enaxat Ñim Nataxala', qavio'oxoyiñi qome qami' maye qami' lamaxashecpi Ñim Nataxala'.

² Qami' maye qoviita'a naxa añi atamnaxaqui maye lalamaqte Ñim Nataxala', yem nqasoxoc añi atamnaxaqui maye lalamaqte Ñim Qanatamnaxala'.

³ Qavio'oxoyiñi qome Ñim Nataxala', cha'aye Ñimaye ỹataqta soxoraic, qauo'oñeetac qome da le'enaxat cha'aye Ñimaye ỹataqta choxonnataxanaxaic.

⁴ Cha'aye Ñim Nataxala', lca'aguishec co'ollaxa so Jacob, som Israel da yaqto' lalamaxat.

⁵ Aỹem saỹateeta da Ñim Nataxala' maye Qanatamnaxala', ỹataqta lta'araic, nataỹaña 'enauac na laỹepi atamnaxala'pi.

⁶ Ñim Nataxala', maichiñi da ỹo'ot co'ollaxa 'enauac nam huotaique da ỹo'ot, nam hueto'ot na piguem qataq nam huetalec ana 'alhua, qataq na huetangui aso auaxai, qataq na ỹataqta qaỹoqchiguiña asomaye.

⁷ Qataq naỹoxoosheguem naqa'en na lo'oc, chegoqchiguiñalo naqa'en naua loga'te ana 'alhua, qataq ỹo'ot na nqashelgaxa maye ỹa'axata'aguet ca auot, qataq chegoqchiguiñalo naua laponaqa'ate da naỹoxoosheguem naqa'en na la'at.

⁸ Ñimaye nacheñi Ñim ỹo'ot co'ollaxa da l-leuaxa som la'auaxanec llalaqpi so Egipto le'ecpi, som ỹalleppi qataq so shiguiỹacpi.

⁹ Ñimaye namaxa co'ollaxa na na'anecpi, qataq na ỹo'ot da na'aalaxa som netangui na laiñi ye Egipto, da yaqto' dataỹa'aguet so faraón qataq 'enauac so ltauapi.

¹⁰ Qataq qalota so ilaxachigui ỹotta'a't shiỹaxauapi, qataq ỹalauat so 'añaxaicpi nta'alpi.

¹¹ So Sijón maye lta'a so amorreopi, qataq so Og maye lta'a so netaña ye Basán, qataq 'enauac so nta'alpi ye Canaán.

¹² Nache so na'alhuapi se'eso nta'alpi, ỹanem da lalamaxat naqa'en na Israel le'ecpi.

¹³ 'Am Nataxala', da 'are'enaxat chochaq tatec, da 'are'enaxat nache 'eetai' qome da lhuennataxat cam dalaxaicpi.

¹⁴ Ñim Nataxala' ỹo'otec da ỹaỹamaqchiguiñi na lalamaxat nhuo' le'ecpi, qataq huo'o da lchoxonnataxanaxa na lamaxashecpi.

¹⁵ Na natamnaxala'pi na ỹotta'a't shiỹaxauapi, namayepi chegaqaigui na lcat plata qataq na oro, maiche lo'onatac naua lhua'q na shiỹaxauapi.

¹⁶ Namayepi huo'oi naua ala'api qalaq saretaqa, huo'oi naua la'ai'te qalaxaye sa nauaañi,

¹⁷ qataq huo'oi naua ltela qalaxaye sa hua'aqa, qataq qaicaua naua la'a'che.

¹⁸ Qaq namayepi 'eeta'am da lataxac nam ỹo'ot co'ollaxa namayepi, qataq nam ỹa'amaqteetac namayepi.

¹⁹ Qami' Israel le'ecpi, qavio'oxoyiñi qome Ñim Nataxala', qataq qami' llalaqpi so Aarón, qavio'oxoyiñi qome Ñim Nataxala',

²⁰ qataq qami' leviitapi, qavio'oxoyiñi qome Ñim Nataxala', qataq 'enauac nam huo'o naq 'enec naqa'en Ñim Nataxala', ỹo'oxoren qome Ñimaye.

²¹ Qaq huaña qome ye Sión da qaỹo'oxoren Ñim Nataxala', Ñim netaña ye Jerusalén. ¡Qaỹo'oxoren qome Ñim Nataxala'!