Salmos 132 - La'aqtaqa Ñim Lo'onatac 'Enauacna 2013

Nam ỹachaxanapecpi Ñim Nataxala' da ỹanem so David

¹ 'Am Nataxala', ñaq 'auennata'a qome so David, qataq 'enauac na nque'eenaxacpi.

² Qataq da la'aqtac maye 'am ỹanot co'ollaxa, 'am maye 'am la'añaxanec so Jacob co'ollaq 'eeta':

³ «Saishet qome da senoxonoigui ñi ima', qataq saishet qome da ñenaañi da ñematec.

⁴ Qataq saishet da samaxa't naua ỹa'ai'te, qataq da ñeqachegoxoñi da so'ochetapigui',

⁵ qom saxanaxa da sanata ca sanaña ca lma' Ñim Nataxala', Ñim la'añaxanec so Jacob.»

⁶ Co'ollaq huaña ye Efrata, nache sa'axasoqtega, da qaỹa'axattac aso arca maye laỹe' soua aỹamaxataxaco, qaq co'ollaq huaña ye Jáar nache sanataxa.

⁷ Qaq huaña nache shenaqta': «Ñeqo'onaxaua'a ñi npe'l maye lanataqa' Ñim Nataxala', nache sa'araqoto naua qarllecte Ñimaye.»

⁸ Ñaq 'anachaañi 'Am Nataxala', nache 'auanaua'a yem 'anmataqa', 'am qataq añi arca maye hueta'aguet da 'ara'añaxac.

⁹ Na 'artaxaỹaxanaxanecpi ñaq ỹaayiñi qome, naua no'oñi alogo da ỹo'ot da nalochiguiñi lataxac, qataq na 'am quetague'pi ỹa'alaqtai' qome da ntonaxac.

¹⁰ Qataq souaxat da 'arauotaxanaqtaic so 'aramaxashec David, nache saishet qome da 'aumaqa'aguet so nta'a maye 'arca'aguishec.

¹¹ Ñim Nataxala', ỹanem co'ollaxa so David so la'aqtac, maye saishet da sa ipaguelec, 'eeta': «Ca 'oonolec ca 'aỹa'alaqpi sanagui qome da 'aro'onataxanaxac da nta'a.

¹² Qaq ca 'aỹa'alaqpi qom ipacchigui da ñaỹamaxataxac, qataq na iqataxacpi maye sapaxaguenec, nache nataqa'en ca llalaqpi camayepi talec qome, da 'aro'onataxanaxac nache chochaq tatec qome.»

¹³ Ñim Nataxala', lca'aua'a co'ollaxa añi qasoxonaxa Sión, cha'aye ỹauotaique da lanataqa', co'ollaq 'eeta':

¹⁴ «'Ena qome na chochaq tatec da ỹanataqa', 'ena qome na ỹanataqa' cha'aye namaye ỹataqta saỹamaxareeta.

¹⁵ Namaye sechoxonnec qome da sa qoue ca nallec, qataq na choxoraqpi maye hueta'a namaye sa qoue ñaqa'en ca aloq.

¹⁶ Qataq sanaxanaxangui da nca'alaxa na ltaxaỹaxanaxanecpi, qataq do'onaxaata'ai' da ntonaxac na quetague' namayepi.

¹⁷ Huaña, nache ñaxatec ñaqa'en da la'añaxac so David, qataq se'eraxatoigui qome añi lcoỹaraxanaxaqui, so nta'a maye lleca'aguishec.

¹⁸ Qaq na mpa'aguenaxauapi qalaq talec ñaqa'en da na'aloxonaxac, qalaxaye somaye sanagui qome da llo'oxoyec.»