Salmos 130 - La'aqtaqa Ñim Lo'onatac 'Enauacna 2013

Da lca'alaqtaxanaxac Ñim Nataxala'

¹ 'Am Nataxala', aỹem sootaña na ỹataqta qaỹoqchiguiña, nache 'am seỹaxanot, sheeta':

² 'Aua'axaỹa qome da iỹaxanaxac 'Am Nataxala', ñaq 'auqocha'a da ỹa'alaxac da 'am seỹaxaatacot.

³ 'Am Nataxala', taxa da 'aulotagui na nasouaxashetpi, nache ¿negue'tom ca ishet da 'am nachatto'ot?

⁴ Qalaxaye 'am hueto'ot da nchoxonnataxanaxa, ỹoqo'oye ishet da huo'o naq 'enec qanqa'en 'am.

⁵ Aỹem, ỹataqta imauec da ñachaalataxac da seuatta'aguet Ñim Nataxala', qataq ỹataqta sepi'iỹa'alo naua la'aqtaqa.

⁶ Aỹem, ỹataqta imauec da ñachaalataxac da seuatta'aguet Ñim Nataxala', ñapacalec ca dauanaxaatac ye nte'eta, qataq ca nauanaxanaxanec da iuatta'aguet ca yo'oxoñi,

⁷ qami' Israel le'ecpi, qauachiỹa'aguet qome Ñim Nataxala', cha'aye Ñimaye hueto'ot da nauotaxanaqtaic qataq da nca'alaxa.

⁸ Ñimaye isoueeguesop qome na Israel le'ecpi 'enauac na lasouaxashetpi.