Salmos 122 - La'aqtaqa Ñim Lo'onatac 'Enauacna 2013

Da ño'oxonnataguec ye Jerusalén

¹ Aỹem, ỹataqta samachiguiñi da aỹem qoỹenapega, qoỹeeta': ¡Qolaq ñeqo'onaxaua'a añi atamnaxaqui maye lalamaqte Ñim Nataxala'!

² Qomi' mashe souaqta'a na 'anasom, 'am Jerusalén.

³ 'Am Jerusalén, 'am qano'oxoosheguem co'ollaxa, da yaqto' 'am laponqa' na shiỹaxauapi.

⁴ 'Am, nache 'am natapegueua'a na maiche nhuo' le'ecpi maye lalamaxatpi Ñim Nataxala', da yaqto' ỹo'oxoren da le'enaxat Ñimaye, cha'aye nachera da ỹamaxalec co'ollaxa so Israel.

⁵ Qataq nache 'am naña ye no'onataxanaqa' da qaỹo'ot da nalochiguiñi lataxac, qataq nache lo'onataxanaqa' na nta'alpi maye chegoxoguetpi so David.

⁶ Qaq qaỹaxañiiua'a qome da nlagaxayec na Jerusalén, yaqto' lactapiguiñi 'enauac nam ỹauotec ne'ena Jerusalén.

⁷ Ñaq huo'o qome da l-lagaxayec na huetaigui na pa'auo na lpaqtaxat namaye, qataq no'on da nmataxac ca netaiguilo naua nỹeco lta'al.

⁸ Qaq souaxat da ỹauotaxanaqtaic na ỹaqaỹañicpi, qataq na ñauochaxauapi, nache sheeta': «Ñaq huo'o qome da nlagaxayec, 'am Jerusalén.»

⁹ Qaq souaxat da ỹauotaxanaqtaic añi atamnaxaqui, maye lalamaqte Ñim Nataxala' maye Qanatamnaxala', nache ñimitaique qome da qaica camachaqca da qoneta.