Salmos 12 - La'aqtaqa Ñim Lo'onatac 'Enauacna 2013

Atamnaxac da qaiỹaxanaique ca ltaunaxanaxac Ñim Lo'onatac 'Enauacna

¹ Ñaq qomi' 'anca'alaxatrec 'Am Nataxala', ten mashe qaica so 'amqaanataxanaxaicpi maye ỹoqta 'am quetegue co'ollaxa, mashe qaica so shiỹaxauapi maye ỹataqta huesota da lataxac.

² Ñi 'oonolec qalaq maiche ỹatenachettac ca lỹa, da detaqa qalaq naua la'aqtaqa ỹataqta ỹagaqnapeguec naqa'en na naigui, qataq saq ỹataxaleguete naua la'aqtaqa.

³ 'Am Nataxala' ỹataqta 'anlaxaañi qome na shepecaiqa naua la'aqtaqa, qataq na na'amqaanaxaiqa naua la'aqtaqa,

⁴ nam 'eeta' naxa da la'aqtac: «'Eeso' ya' ye huo'o na qorap da yaqto' huo'o ca sañoxotaq, cha'aye na qara'aqtaqa maye qomi' mpaxaaleguete, qaq ¿negue't ca ishet da qomi' ỹamaqta'ape?»

⁵ Qaq 'era da la'aqtac Ñim Nataxala', 'eeta': «Nagui maye ñachaañi da ñeca'alaxatec nam qaica ca nyacnataguec, qataq na choxoraqpi maye ỹataqta qanhuottalec nache sanem namayepi, da ntaunaguec maye ỹataqta iuattaique.»

⁶ Naua la'aqtaqa Ñim Nataxala' ỹataqta qui'itte', 'eeta'ama na ỹataqta no'on nda'a't lcat plata, maye siete da qaỹe'eguelaxaalec da qanqatel da yaqto' qui'itta.

⁷ 'Am Nataxala' ỹataqta qomi' 'antela'alo qome, qataq nache 'eetai' qome da qomi' 'antelaqna'agueta ne'ena shiỹaxauapi.

⁸ Cha'aye ne'ena qauemaicpi 'enauac da coleetega't nache na shiỹaxauapi ỹo'oxoreetac na qauemsat.