Salmos 119 - La'aqtaqa Ñim Lo'onatac 'Enauacna 2013

Ño'oxonnataguec na lqataxacpi Ñim Lo'onatac 'Enauacna

¹ Ỹataqta machiguiñi qome cam quetague' so no'on nqa'aic, cam ỹataqta queteguelo naua lqataxaco Ñim Nataxala'.

² Ỹataqta machiguiñi qome ca ỹaỹamaxatteque naua lamaxasoxonaxaco, qataq imauec da lquiyaqteỹaxac da nmittapigui naamaye.

³ Cam saishet da ỹo'ot ca qauem, nacherata da quetegue da nqa'aicỹaxac Ñim Nataxala'.

⁴ Cha'aye 'Am Nataxala', 'auamaxasoxooleguete co'ollaxa naua 'aramaxasoxonaxaco da yaqto' ỹataqta qaipacchiguilo.

⁵ Ỹoqo'oye da iyaxa da shectalec da salaxagueta naua 'arqataxaco.

⁶ Yaqto' saishet da ña'aloxootac, da ivita da semete'n naua 'aramaxasoxonaxaco.

⁷ Nache imauec da huesota da iquiyaqteỹaxac da 'am sho'oxoreetac, qom ỹataqta saỹateeteguelo naua no'oiteguelo 'arqataxaco.

⁸ Aỹem sauotaique da sepacchiguilo naua 'arqataxaco, saishet qome da aỹem 'aualat.

⁹ ¿Negue'tom ca chegoqchigui da ishet da qui'itta da nachaalataxac ca nsoqolec? Qomye nacherata da ỹalaxagueta naua 'ara'aqtaqa.

¹⁰ Qaq aỹem, ye ỹataqta imauec da iquiyaqteỹaxac da 'am ñimittaique ỹoqo'oye saishet qome da aỹem 'auashenem da sheca'aisalo naua 'aramaxasoxonaxaco.

¹¹ Añi iquiyaqte ỹataqta soxotoiguilo naua 'ara'aqtaqa, yaqto' saishet da 'am hueto'ot ca ỹasouaxashet.

¹² Qaq 'am qaỹo'oxoren qome 'Am Nataxala', aỹem 'auapaxaguenec na 'arqataxacpi.

¹³ Nache sa'axattac qome 'enauac na 'arqataxacpi, maye 'aua'axattac co'ollaxa.

¹⁴ Ỹataqta samachiguiñi qome da shectalec da llecỹaxac naua 'aramaxasoxonaxaco, ỹataqta napacalec ñaqa'en 'enauac da nsallaxa.

¹⁵ Qataq nache ñapaxagueetegalo qome naua 'aramaxasoxonaxaco, qataq ỹataqta selotegue da 'anqa'aicỹaxac.

¹⁶ Qataq ỹo'ot qome da samachiguiñi naua 'arqataxaco, qataq saishet qome da secoua'aisalo naua 'ara'aqtaqa.

¹⁷ Ñaq aỹem 'auaỹamaxatta qome cha'aye aỹem 'aramaxashec, yaqto' nache shecto'ot da salaxagueta naua 'ara'aqtaqa.

¹⁸ Qataq nlorec 'anqa'en naua ỹa'ai'te, yaqto' sela'a da llo'oxoyec naua 'arqataxaco.

¹⁹ Cha'aye aỹem sachegaqauec da soota'a ne'ena 'alhua, qaq saishet qome da aỹem 'oxocheesopa naua 'aramaxasoxonaxaco.

²⁰ Cha'aye imauec ye na'a'q da seuet ana itogue, souaxat da iyaxa da saỹaten ca llec naua 'aramaxasoxonaxaco.

²¹ Cha'aye 'am, 'aviraxato'ot ca saishet da ncherapec qataq na qauemaicpi maye ca'aisalo naua 'aramaxasoxonaxaco.

²² Aỹem 'eltaxaneguet qome da lalemataic qataq da le'enaxanaxac namayepi, cha'aye aỹem ỹataqta sepacchiguilo naua 'aramaxasoxonaxaco.

²³ Ỹoqo'oye na'aictaxa da na 'añaxaicpi aỹem mpa'aguena, qalaxaye aỹem nacherata da ñapaxagueetegalo naua 'arqataxaco.

²⁴ Cha'aye naua 'aramaxasoxonaxaco nachenaua naua ỹo'ot da samachiguiñi, qataq nachenaua nam aỹem huaqattega.

²⁵ Cha'aye aỹem mashe soota'aguet na 'alhua, ỹoqo'oye ñaq 'aupacchigui qome da 'ara'aqtac da aỹem 'aỹa'anem da ica'alaxa.

²⁶ Cha'aye mashe aỹem 'auasateguet co'ollaq 'am sa'axatem da ñeqa'aicỹaxac, qaq ñaq aỹem 'auapaxaguenec qome na 'arqataxacpi.

²⁷ Qataq aỹem 'aỹa'anem qome da saỹaten ca llec na 'aramaxasoxonaxacpi yaqto' seuennataxaalec ca ỹo'ot da 'ayo'oxoyec.

²⁸ Cha'aye mashe aỹem nlaqchigui da ỹachetataic, ỹoqo'oye aỹem 'anllechiguiñi qome cha'aye nachera da maiche 'ara'aqtac co'ollaxa.

²⁹ Qataq aỹem 'eltaxaneguet qome na llecpi da natenataxanaxac, nache aỹem 'anqouaguec da aỹem 'auapaxaguenec na 'arqataxacpi.

³⁰ Cha'aye aỹem lleca'aua'a da llecỹaxac da 'eesa lataxac, qataq shecteguelo naua 'arqataxaco.

³¹ 'Am Nataxala', aỹem ỹataqta sa seỹotrec naua 'aramaxasoxonaxaco, saishet qome da 'auo'ot ca ỹa'aloxo.

³² Aỹem ỹataqta seỹalapigui' da shectegue da llecỹaxac naua 'aramaxasoxonaxaco, cha'aye 'anlaxatchigui añi iquiyaqte da ñetonaxac.

³³ 'Am Nataxala', aỹem 'auapaxaguenec qome da shecteguelo naua lleco naua 'arqataxaco, yaqto' ỹataqta sepacchiguilo choche ivitta'a ca loga't.

³⁴ Aỹem 'aỹa'anem qome ca ỹauattonaxanaxac da yaqto' saỹamaxa't naua 'arqataxaco, yaqto' imauec ñaqa'en da iquiyaqteỹaxac da sepacchiguilo.

³⁵ Aỹem 'auauecteuga qome da llecỹaxac na 'aramaxasoxonaxacpi, cha'aye damaye ỹo'ot da samachiguiñi.

³⁶ Qaq da iquiyaqteỹaxac quetegue qome 'anqa'en na 'aramaxasoxonaxacpi, qaq saishet da quetague' aca naueque maye chegaqaigui da ncachaxac.

³⁷ Qataq saishet da aỹem 'auashenem da selogui ca qaica ca naigui, qataq aỹem 'aỹa'anem da ica'alaxa yaqto' shectegue so 'anqa'aic.

³⁸ 'Aupacchigui qome so 'ara'aqtac maye 'aỹa'anem co'ollaxa ne'ena 'aramaxashec, 'eeta'am 'anqa'en da qonetec cam huo'o naq 'enec naqa'en 'am.

³⁹ Aỹem 'anqateeguesop qome na aỹem ipataqtañi maye ỹo'ot da icolanaxa, cha'aye naua 'arhuennataxaco ỹataqta no'oñi.

⁴⁰ Aỹem ỹataqta sauoteque naua 'aramaxasoxonaxaco, ỹoqo'oye aỹem 'aỹa'anem qome da ica'alaxa, cha'aye 'am ỹataqta no'on da 'arataxac.

⁴¹ 'Am Nataxala', aỹem 'anamaxa qome ca 'arauotaxanaqtaic, qataq ca 'arca'alaqtaxanaxac, cha'aye nachera da 'auachaxanapec co'ollaxa.

⁴² Yaqto' ishet da sasateguet ca aỹem nquiỹatega, cha'aye ỹataqta sepi'iỹa'alo naua 'ara'aqtaqa.

⁴³ Qataq saishet qome da 'anqateeguesop na aỹap naua na'aqtaqa maye 'eesora, cha'aye aỹem ñaquita'alo naua no'oñi 'ara'aqtaqa.

⁴⁴ Qataq nache 'eetai' qome da shecto'ot, da salaxagueta naua 'arqataxaco.

⁴⁵ Qaq ỹataqta aỹem huesochiguiñi qome, cha'aye ỹataqta ñemitapigui naua 'aramaxasoxonaxaco.

⁴⁶ Qataq sa'axatem qome naua 'aramaxasoxonaxaco na nta'alpi, qaq saishet qome da ña'aloxootac,

⁴⁷ aỹem ỹataqta sauoteque naua 'aramaxasoxonaxaco, cha'aye naamaye ỹo'o't da samachiguiñi.

⁴⁸ Aỹem ỹataqta sauoteque naua 'aramaxasoxonaxaco, qataq sachaxaato'oto naua ihuaxaye naamaye, qaq ỹoqo'oye seuennataxaalec qome ne'enaua 'arqataxaco.

⁴⁹ Qaq 'auennata'a qome so 'ara'aqtac, maye 'aỹa'anem co'ollaxa ne'ena 'aramaxashec, som 'ara'aqtac maye ỹo'ot da ñaquitaxac.

⁵⁰ Qaq damaye nachera da ỹo'ot da ỹa'añaxac da sootaigui da ñiqui'ic, cha'aye naua 'aỹa'a'n 'ara'aqtaqa aỹem ỹanema da ica'alaxa.

⁵¹ Nam qaica ca iren qalaq nache queto'ot da aỹem inogoqchettac, qalaxaye aỹem saishet da saxaarec naua 'arqataxaco.

⁵² 'Am Nataxala', aỹem tachigui ye iuel naua hua'auchiyiñi co'ollaxa 'ara'aqtaqa, nache naamaye ỹo'o't da ỹa'añaxac.

⁵³ Cha'aye aỹem nlaqchigui da inogoxonaxac souaxat na 'etaxaloxoicpi, nam ca'aisalo co'ollaxa naua 'arqataxaco.

⁵⁴ Qalaxaye naua 'arqataxaco nachenaua nam so'oota'ape, ne'ena 'alhua maye choche sachegaqauec da soota'a.

⁵⁵ 'Am Nataxala', ye pe qalaq tachigui ye iuel da 'are'enaxat, cha'aye sauotaique da sepacchiguilo naua 'arqataxaco.

⁵⁶ Cha'aye nachera da sepa'aỹa'aguet da so'ot, da salaxagueta naua 'aramaxasoxonaxaco.

⁵⁷ 'Am Nataxala', nache 'amta da aỹem qoueta'aguet, ỹoqo'oye san co'ollaxa so ỹa'aqtac da salaxagueta naua 'ara'aqtaqa.

⁵⁸ Ỹataqta imauec ñaqa'en da iquiyaqteỹaxac da 'am ñimitaique, ỹoqo'oye aỹem 'auchoxoren qome cha'aye nachera da 'auachaxanapec co'ollaxa.

⁵⁹ Aỹem seuennataxaatapeguelec co'ollaxa da maiche ỹecỹaxac, nache she'eguelaxa da salaxagueta naua 'aramaxasoxonaxaco.

⁶⁰ Nache ỹataqta seỹalapigui', saishet da ñaỹaloxon, da yaqto' sepacchiguilo naua 'aramaxasoxonaxaco.

⁶¹ Na'aictaxa da aỹem coleesop da aỹem nqoviitac na 'etaxaloxoicpi, qalaxaye saishet da secoua'aisalo naua 'arapaxaguenataxanaxaco.

⁶² Qataq da laiñi ye pe qalaq soosheguem da 'am sanot da ña'achec, souaxat naua no'oñi 'ara'aqtaqa.

⁶³ Aỹem ñauochaxaua 'enauac nam huo'o naq 'enec naqa'en 'am, qataq ỹaỹamaxa't naua 'aramaxasoxonaxaco.

⁶⁴ 'Am Nataxala', aỹem 'auapaxaguenec qome naua 'arqataxaco, cha'aye ana 'alhua nlaqtelec da 'arauotaxanaqtaic.

⁶⁵ 'Am Nataxala', ỹataqta 'auaỹamaxatta co'ollaxa ne'ena 'aramaxashec, cha'aye nachera da maiche 'ara'aqtac co'ollaxa.

⁶⁶ Aỹem 'aỹa'anem qome ca naỹaanec qataq ca no'on nhuennataxa, cha'aye aỹem sa'amaqte'n naua 'aramaxasoxonaxaco.

⁶⁷ Cha'aye co'ollaq saxanaxa da huo'o da ñeque'eenaxac nache qalota na isomaxacpi, qalaxaye nagui, aỹem salaxagueta naua 'ara'aqtaqa.

⁶⁸ Cha'aye 'am soxoraic qataq 'auo'ot ca ỹaỹamaqchiguiñi, ỹoqo'oye aỹem 'auapaxagueneque qome naua 'arqataxaco.

⁶⁹ Na qaica ca iren, qalaq aỹem ỹasaxalec na latenataxanaxacpi, qalaxaye aỹem imauec da iquiyaqteỹaxac da saỹamaxa't naua 'aramaxasoxonaxaco.

⁷⁰ Cha'aye da lhuennataxac namayepi mashe sa ỹaỹamaxañi, qalaxaye naua 'arqataxaco ỹo'ot da samachiguiñi.

⁷¹ Qaq aỹem no'onaxat co'ollaxa da huo'o da ñeque'eenaxac, cha'aye nachera da ỹo'ot da sauatto'n naua 'arqataxaco.

⁷² Cha'aye aỹem, ỹactec ñaqa'en da no'o'n naua 'arqataxaco, qaq napacalec aca qalota anom oro qataq plata.

⁷³ Cha'aye naua 'arhua'q maiche aỹem lo'onatac qataq 'enauac da ỹataxac, ỹoqo'oye aỹem 'aỹa'anem qome ca ỹauattonaxanaxac yaqto' saỹate'n naua 'aramaxasoxonaxaco.

⁷⁴ Yaqto' cam huo'o naq 'enec naqa'en 'am, machiguiñi da aỹem ilota'a, cha'aye ỹataqta huo'o da ñaquitaxac naua 'ara'aqtaqa.

⁷⁵ 'Am Nataxala', aỹem saỹaten da naua no'oñi 'arhuennataxaco ỹataqta ỹaỹamaqchiyiñi, qaq ỹoqo'oye 'itchiguiñi da 'auo'ot da ñeque'eenaxac.

⁷⁶ Qaq da 'arauotaxanaqtaic nachera qome da ỹo'ot da samachiguiñi, cha'aye nachera da 'ara'aqtac maye 'aỹa'anem co'ollaxa ne'ena 'aramaxashec.

⁷⁷ Ñaq 'auanacot qome da 'archoxonnataxanaxa, yaqto' aỹem ỹanem da ica'alaxa, cha'aye naua 'arapaxaguenataxanaxaco ỹo'o't da samachiguiñi.

⁷⁸ Ñaq huo'o qome da la'aloxo ca qaica ca iren, cha'aye qaica ca sasouaxat qalaq aỹem sa iyacnapec, qalaxaye aỹem ñapaxaguenalo qome naua 'aramaxasoxonaxaco.

⁷⁹ Qaq ñaq aỹem naua'a qome ca huo'o naq 'enec naqa'en 'am, cam ỹauatto'n naua 'aramaxasoxonaxaco.

⁸⁰ Qaq da iquiyaqteỹaxac ỹataqta queteguelo qome, naua 'aramaxasoxonaxaco, yaqto' saishet da huo'o ca ỹa'aloxo.

⁸¹ Aỹem, nquictañi da la'añaxac da ñachaalataxac, souaxat da seuattaique ca 'arca'alaqtaxanaxac, qalaxaye huo'o da ñaquitaxac naua 'ara'aqtaqa.

⁸² Qataq nquictrañi da la'añaxa'c naua ỹa'ai'te, souaxat da seuatta'aguet cam 'auachaxanapec co'ollaxa, nache sheeta': «¿Chaq laguio' da 'auanac da aỹem 'aua'añaqchet?»

⁸³ Qaq na'aictaxa da sheeta'am aca lota maye ỹaueraqchet na lmala'q, qalaxaye saishet da secoua'aisalo naua 'aramaxasoxonaxaco.

⁸⁴ ¿Chaq lcate' caua na'axa'te da seuataxaatac? ¿Chaq laguio' qaq 'anmit nam aỹem icaatac?

⁸⁵ Nam qaica ca icherapec qalaq ỹo'ot ana lshere da aỹem nqovin, nam saishet da queteguelo naua 'arqataxaco.

⁸⁶ Cha'aye 'enauac na 'aramaxasoxonaxacpi ỹataqta 'eesa. Qalaxaye aỹem qaicaatac qamaq qaica ca sasouaxat, ỹoqo'oye aỹem 'autauan qome.

⁸⁷ Aỹem mashe huac da aỹem qaỹapalaxat ana'ana 'alhua, qalaxaye saishet da saxaarec naua 'aramaxasoxonaxaco.

⁸⁸ Ñaq aỹem 'anca'alaxatec qome, souaxat da lta'araic 'arauotaxanaqtaic, nache aỹem sepacchiguilo qome naua 'aramaxasoxonaxaco.

⁸⁹ 'Am Nataxala', naua 'ara'aqtaqa chochaq tatrec, sa nqui'c da hueto'oto na piguem.

⁹⁰ Qataq da sa nquic 'arataxac chochaq tatec, 'am 'alapaxañi co'ollaxa ana 'alhua, nache saishet da deraỹai'.

⁹¹ Qataq 'enauac nam huo'o, saishet da deraỹai', cha'aye nachera da 'aramaxasoxonaxac co'ollaxa, qaq 'enauac namayepi 'am do'onataxaatacot.

⁹² Naua 'arqataxaco taxa da saishet da ỹo'ot da ỹamaicỹaxac, nache sogote taxa da aỹem imeuo naqa'en da ỹaquicoxo.

⁹³ Ỹoqo'oye saishet qome da secoua'aisalo naua 'aramaxasoxonaxaco, cha'aye naamaye chegoqchiguilo da 'auauo'o da ica'alaxa.

⁹⁴ Ñaq aỹem 'anca'alaxatec qome cha'aye aỹem 'aralamaxat, qataq ỹataqta shectelec da ñapaxaguenalo naua 'aramaxasoxonaxaco.

⁹⁵ Na qauemaicpi aỹem iuatta'aguet da huotaique aỹem nlaxaañi, qalaxaye aỹem ỹataqta selotegueta naua 'aramaxasoxonaxaco.

⁹⁶ Cha'aye sauaachigui da 'enauac na ỹaỹamaqchiguiñi da lataxac huo'o ye loga't, qalaxaye naua 'aramaxasoxonaxaco qaica ca loga't.

⁹⁷ Aỹem ỹataqta sauoteque naua 'arqataxaco, ỹoqo'oye 'enauac ye na'a'q da ñapaxagueetegalo.

⁹⁸ Qaq naua 'aramaxasoxonaxaco ỹo'ot da aỹem ỹaanaxanaxaic, nache ñapacalec na ñepa'aguenaxauapi, cha'aye naamaye nache 'eetai' da aỹem hueto'oto.

⁹⁹ Da ỹaỹaanataxanaxac napacalec 'enauac na ñapaxaguenaxala'pi, cha'aye ñapaxagueetegalo naua 'aramaxasoxonaxaco.

¹⁰⁰ Da ỹaỹaanataxanaxac napacalec na ỹa'axaiquipi, cha'aye salaxagueta naua 'aramaxasoxonaxaco.

¹⁰¹ Qataq ca'aisalo ñaqa'en naua ỹapia'ate 'enauac na qauem nqa'aicpi, da yaqto' sepacchiguilo naua 'ara'aqtaqa.

¹⁰² Qataq saishet da sheca'aisalo naua no'oñi 'ara'aqtaqa, cha'aye nache 'am da aỹem 'auapaxagueetac.

¹⁰³ Ỹataqta amai' naua 'ara'aqtaqa da huetaiguilo na aỹap, napacalec da lamaic ca te'esaq lli'i da taigui na aỹap.

¹⁰⁴ Naua 'aramaxasoxonaxaco nache sachegoxotaiguilo da ỹaỹaanataxanaxac, ỹoqo'oye ỹataqta saỹemec da llecỹaxac da natenataxanaxac.

¹⁰⁵ Naua 'ara'aqtaqa 'eeta'ama aca ncoỹaraxanaxaqui da icoỹatta'aguelo naua iqauaxaqui', qataq icoỹatta'ague so ñeqa'aic.

¹⁰⁶ Aỹem san co'ollaxa so ỹa'aqtac da yaqto' sepacchiguilo naua nalochiyiñi 'ara'aqtaqa.

¹⁰⁷ 'Am Nataxala', aỹem ỹataqta qalota da iuogoxo, aỹem 'anca'alaxatec qome, cha'aye nachera da 'ara'aqtac co'ollaxa.

¹⁰⁸ 'Am Nataxala', 'auaconeguet qome da ỹachetaqtaxanaxac maye chegaqaigui na aỹap, nache aỹem 'auapaxagueneque naua 'ara'aqtaqa.

¹⁰⁹ Cha'aye da ñachaalataxac nache queta da huetaigui da lchecỹaxac, qalaxaye saishet da secoua'aisalo naua 'arqataxaco.

¹¹⁰ Na qauemaicpi qalaq ỹauo'o ana lqoina da aỹem nqovin, qalaxaye aỹem saishet da sheca'aisalo naua 'aramaxasoxonaxaco.

¹¹¹ Cha'aye naua 'aramaxasoxonaxaco naamaye chochaq tatec da ỹalamaqa'ate, qaq nachenaua na ỹo'ot da ntonaxac da iquiyaqteỹaxac.

¹¹² Aỹem, ỹataqta iquiyaqteỹaxac da sasateguet da sepacchiguilo naua 'arqataxaco, qaq damaye nache shecto'ot, choche ivitta'a ca loga't.

¹¹³ Aỹem ỹataqta saỹemec na saq ỹataxalec da lataxac, qalaxaye sauoteque naua 'arqataxaco.

¹¹⁴ Cha'aye nache 'am ñeqañoxotaqa' qataq ipaqtaxanaxat, qataq naua 'ara'aqtaqa ỹataqta sachetaleguete da ñaquitaxac.

¹¹⁵ Ñaq aỹem qauỹocheelec qome qami' qauemaicpi, cha'aye sauotaique da sepacchiguilo naua lamaxasoxonaxaco Ñim Ñatamnaxala'.

¹¹⁶ Ñaq aỹem 'anasoqchiguiñi qome, cha'aye nachera da 'auachaxanapec co'ollaxa, yaqto' nache ñeca'altauec, qataq saishet da ỹauo'o ca ña'aloxonaxac de'era ñaquitaxac.

¹¹⁷ Aỹem 'anasoqchiguiñi qome yaqto' ñeca'alec, yaqto' sepacchiguilo qome naua 'arqataxaco.

¹¹⁸ 'Am, saishet da 'auooneguet ca ca'aisalo naua 'arqataxaco, cha'aye ỹataqta saq'e'n naua lhuennataxaco.

¹¹⁹ Na qauemaicpi maye huetalec ana 'alhua 'eeta'am 'anqa'en ca lasogoñi, qaq ỹoqo'oye aỹem sauoteque naua 'aramaxasoxonaxaco.

¹²⁰ Da ỹo'ocỹaxac ỹataqta iviloxol souaxat da icolanaxa da qoneta, cha'aye huo'o naq 'enec ñaqa'en naua 'arqataxaco.

¹²¹ Aỹem so'otta'ape naua ỹaỹamaqchiyiñi qataq naua nalochiyiñi lataxaco, qaq ỹoqo'oye saishet qome da aỹem 'aỹa'aneguet, nam nshetaique da aỹem ỹachetaiya'.

¹²² Ñaq 'auo'otec qome ca no'on ne'ena 'aramaxashec, yaqto' saishet da aỹem ỹachetaiya' ca qaica ca iren.

¹²³ Cha'aye naua ỹa'ai'te mashe qaica ca la'añaxa'c souaxat da seuattaique ca 'arca'alaqtaxanaxac, qataq da seuattaique da 'aupacchigui da 'auachaxanapec co'ollaxa.

¹²⁴ Qaq ỹoqo'oye 'auo'otec qome da 'arauotaxanaqtaic ne'ena 'aramaxashec, qataq aỹem 'auapaxagueneque naua 'arqataxaco.

¹²⁵ Qaq cha'aye aỹem 'aramaxashec, ỹoqo'oye aỹem 'aỹa'anem qome ca ỹauattonaxanaxac, yaqto' sauattoote' naua 'aramaxasoxonaxaco.

¹²⁶ 'Am Nataxala', mashe ivita ye laloqo' da huo'o ca 'auo'ot, cha'aye mashe sa qaỹalaxagueta naua 'arqataxaco.

¹²⁷ Ỹoqo'oye aỹem ỹataqta sauoteque naua 'aramaxasoxonaxaco, napacalec ñaqa'en da lyac ca ỹataqta no'on oro.

¹²⁸ Ỹoqo'oye ỹataqta sauoteque naua 'aramaxasoxonaxaco, qaq ỹoqo'oye sa sesheteguet 'enauac da ñecỹaxac maye saq 'en.

¹²⁹ Ỹataqta huo'o da lyacỹaxac naua 'aramaxasoxonaxaco, ỹoqo'oye aỹem ỹataqta salaxagueta.

¹³⁰ Cha'aye da qaỹa'axatte' naua 'ara'aqtaqa nache ỹo'ot da yo'oqchiguiñi, qataq ỹanem da lauattonaxanaxac ca huesota da lataxac.

¹³¹ Qaq ỹoqo'oye sauachigui na aỹap da setaqa, cha'aye ỹataqta huo'o da ỹauoche naua 'aramaxasoxonaxaco.

¹³² Qaq aỹem 'anamata'a qome, ñaq aỹem 'auchoxoren, 'eeta'am da qonetec naxa cam ỹauotec da 'are'enaxat.

¹³³ Qataq 'auo'ot qome da shecteguelo naua 'ara'aqtaqa, qataq saishet da aỹem loxonec 'anqa'en na qauemsat.

¹³⁴ Qataq aỹem 'eltaxaneguet qome da layeloxo na shiỹaxauapi, cha'aye sauotaique da salaxagueta naua 'aramaxasoxonaxaco.

¹³⁵ Qataq 'ano'onaxat da 'armeenaxanaxac da 'anamata'a ne'ena 'aramaxashec, qataq aỹem 'auapaxagueneque naua 'arqataxaco.

¹³⁶ Cha'aye naua lache' naua ỹa'ai'te qalaq 'eeta'am ca tala da ipaxaalec, souaxat da sa qaỹalaxagueta naua 'arqataxaco.

¹³⁷ 'Am Nataxala', ỹataqta nalochiguiñi da 'arataxac, qataq no'oiteguelo naua 'alapaxayiñi lataxaco.

¹³⁸ Qataq 'enauac na 'aramaxasoxonaxacpi, ỹataqta nalochiguiñi qataq 'eesa.

¹³⁹ Da ica'alaxanaxac ỹataqta aỹem nlaxaañi, cha'aye na ñepa'aguenaxauapi icoua'aisalo naua 'ara'aqtaqa.

¹⁴⁰ Naua 'ara'aqtaqa ỹataqta qui'itte', ỹoqo'oye ne'ena 'aramaxashec ỹataqta ỹauoteque.

¹⁴¹ Aỹem qaica ca ỹa'amaqchec qataq aỹem no'otanec, qalaxaye saishet da secoua'aisalo naua 'aramaxasoxonaxaco.

¹⁴² Naua nalochiyiñi lataxaco maye 'auo'o't chochaq tatrec, qataq naua 'arqataxaco ỹataqta 'eesora.

¹⁴³ Aỹem huo'o co'ollaxa da iuogoxo qataq da ñeque'eenaxac, qalaxaye naua 'aramaxasoxonaxaco ỹo'o't da ỹamaicỹaxac.

¹⁴⁴ Naua 'aramaxasoxonaxaco nache 'eetai' da nalochiyiñi, ỹoqo'oye aỹem 'aỹa'anem qome ca ỹauattonaxanaxac yaqto' ishet da ñeca'altauec.

¹⁴⁵ 'Am Nataxala', ỹataqta imauec da iquiyaqteỹaxac da 'am seỹaxanot, ñaq aỹem 'auasateguet qome yaqto' salaxagueta naua 'arqataxaco.

¹⁴⁶ Aỹem, 'am seỹaxanot: «Ñaq aỹem 'anca'alaxatec qome.» Yaqto' sepacchiguilo naua 'aramaxasoxonaxaco.

¹⁴⁷ Aỹem soosheguem ye nte'etom da 'am seỹaxanot da aỹem 'autauan, cha'aye naua 'ara'aqtaqa ỹataqta sachetaleguete da ñaquitaxac.

¹⁴⁸ Da ñaq taỹa'a ye pe qalaq ñelotec, da yaqto' ñapaxaguenalo naua 'aramaxasoxonaxaco.

¹⁴⁹ 'Am Nataxala', ñaq 'aua'axaỹa qome da ivilỹaxac cha'aye huo'o da 'arauotaxanaqtaic, ñaq aỹem 'aỹa'anem qome da ica'alaxa, 'aupacchigui da nalochiguiñi 'aro'onataxanaxac.

¹⁵⁰ Cha'aye mashe sa qaỹapeque nam qauemaicpi maye aỹem icaatac, qalaxaye namayepi qaỹoqtalo naqa'en naua 'arqataxaco.

¹⁵¹ Qalaxaye 'am saqaỹapeque, 'Am Nataxala', qataq 'enauaque naua 'aramaxasoxonaxaco ỹataqta 'eesora.

¹⁵² Qataq mashe qaỹoqtegue da sauatto'n naua 'aramaxasoxonaxaco, maye chochaq tatrec 'anqa'en co'ollaq 'alapaxayiñi.

¹⁵³ Qaq ña 'aumeten qome da iuogoxo nache aỹem 'anca'alaxatec, cha'aye aỹem sa secoua'aisalo naua 'arqataxaco.

¹⁵⁴ Ñaq aỹem 'aueelec qome qataq aỹem 'anca'alaxatec, qataq aỹem 'aỹa'anem da ica'alaxa, cha'aye nachera da 'auachaxanapec co'ollaxa.

¹⁵⁵ Da nca'alaxa qalaq qaỹoqta naqa'en na qauemaicpi, cha'aye namayepi sa nmitapigui naua 'arqataxaco.

¹⁵⁶ 'Am Nataxala', ỹataqta lta'araic da 'archoxonnataxanaxa, ñaq aỹem 'aỹa'anem da ica'alaxa, ñaq 'aupacchigui qome da nalochiguiñi 'aro'onataxanaxac.

¹⁵⁷ Aỹem, ỹataqta qalota na ñepa'aguenaxauapi qataq na aỹem icaatacpi, qalaxaye aỹem saishet da sheca'aisalo naua 'aramaxasoxonaxaco.

¹⁵⁸ Da selota'a na que'elaqtaxanaxaicpi qalaq ỹataqta sa saỹamaxaren, cha'aye sa ỹalaxagueta naua 'ara'aqtaqa.

¹⁵⁹ 'Am Nataxala', ñaq 'aula'a da ỹataqta sauoteque naua 'aramaxasoxonaxaco, qaq aỹem 'anca'alaxatec qome 'aupacchigui da 'arauotaxanaqtaic.

¹⁶⁰ Cha'aye naua 'ara'aqtaqa na'attaleguete da 'eesa lataxac, qataq chochaq tatec 'enauac na ỹaỹamaqchiguiñi 'aramaxasoxonaxacpi.

¹⁶¹ Aỹem, qaica ca sasouaxat qalaq aỹem icaatac na 'añaxaicpi, qalaxaye añi iquiyaqte huo'o naq 'enec naqa'en naua 'ara'aqtaqa.

¹⁶² Cha'aye naua 'ara'aqtaqa ỹo'o't da samachiguiñi, 'eeta'am ca ilalec ca qalota nogoxoshetpi.

¹⁶³ Aỹem, ỹataqta saỹemec qataq seqaiga da natenataxanaxac, qalaxaye sauoteque naua 'arqataxaco.

¹⁶⁴ Ỹoqo'oye siete da she'eguelaxalec ye na'a'q da 'am sho'oxoren, souaxat naua nalochiyiñi 'aramaxasoxonaxaco.

¹⁶⁵ Cha'aye qalota da l-lagaxayec, cam ỹauoteque naua 'arqataxaco qataq qaica ca ishet da huañi naqa'en.

¹⁶⁶ 'Am Nataxala', aỹem seuatta'aguet ca 'arca'alaqtaxanaxac, cha'aye so'otta'ape naua 'aramaxasoxonaxaco.

¹⁶⁷ Aỹem ỹataqta imauec da ñachaalataxac da sepacchiguilo naua 'aramaxasoxonaxaco, qataq ỹataqta sauoteque.

¹⁶⁸ Qaq ỹataqta salaxagueta naua 'aramaxasoxonaxaco qataq naua 'arqataxaco, cha'aye da ñeqa'aicỹaxac 'enauac da 'auaỹateetac.

¹⁶⁹ 'Am Nataxala', ñaq 'am iviro'ot qome da iỹaxanaxac, ñaq aỹem 'aỹa'anem ca ỹauattonaxanaxac, cha'aye nachera da 'ara'aqtac co'ollaxa.

¹⁷⁰ Ñaq 'am iviro'ot qome da ñatamnaxac, nache aỹem 'anca'alaxatec, cha'aye nachera da 'auachaxanapec co'ollaxa.

¹⁷¹ Ñaq nauoigui qome na aỹap ca ỹo'oxonnataxanaxac, cha'aye aỹem 'auapaxagueneque naua 'arqataxaco.

¹⁷² Ñim ỹachaxat ñaq ỹo'o'n qome naua 'ara'aqtaqa, cha'aye 'enauac na 'aramaxasoxonaxacpi ỹataqta ỹaỹamaqchiguiñi.

¹⁷³ Qataq sanaỹaloxon qome na 'arhuaq da aỹem itauan, cha'aye lleca'ateua'alo co'ollaxa naua 'aramaxasoxonaxaco.

¹⁷⁴ 'Am Nataxala', huo'o da iyaxa da saconeguet ca 'arca'alaqtaxanaxac, cha'aye naua 'arqataxaco ỹo'ot da samachiguiñi.

¹⁷⁵ Qaq ñaq aỹem 'anem qome ca ica'alaxa, yaqto' 'am sho'oxoreetac, qataq ñaq aỹem itaua'n qome naua nalochiyiñi 'arhuennataxaco.

¹⁷⁶ Cha'aye aỹem ñesomaxaatapigui' co'ollaxa sheeta'am aca qagueta da deqat, qaq ỹoqo'oye 'auanac qome da 'anmitaique ne'ena 'aramaxashec, cha'aye aỹem sa secoua'aisalo naua 'aramaxasoxonaxaco.