Salmos 118 - La'aqtaqa Ñim Lo'onatac 'Enauacna 2013

Da chochaq tatec lauotaxanaqtaic Ñim Nataxala'

¹ Qavio'oxoyiñi qome Ñim Nataxala' cha'aye Ñimaye ỹataqta soxoraic, qataq chochaq tatec da lauotaxanaqtaic.

² Na Israel le'ecpi ñaq 'enapec qome: «Da lauotaxanaqtaic Ñim Nataxala' chochaq tatec.»

³ Qataq na ntaxaỹaxanaxanecpi ñaq 'enapec qome: «Da lauotaxanaqtaic Ñim Nataxala' chochaq tatec.»

⁴ Qataq nam huo'o naq 'enec naqa'en Ñim Nataxala' 'enapec qome: «Da lauotaxanaqtaic Ñim Nataxala' chochaq tatec.»

⁵ Co'ollaq huo'o da ỹachetataic nache seỹaxanot Ñim Nataxala', qaq Ñimaye aỹem hua'axaỹa nache aỹem huesochiguiñi naqa'en.

⁶ Ñim Nataxala' aỹem hueta'aguet, ỹoqo'oye saishet da she'etac, qataq saishet da she'etega ca aỹem ỹo'otec ca shiỹaxaua.

⁷ Ñim Nataxala' aỹem hueta'aguet, Ñimaye aỹem itauaatac qaq ỹoqo'oye sauaachigui qome da nanoxonaguec na aỹem nquiỹategapi.

⁸ Ỹoqo'oye no'on da qaipi'iỹa'a Ñim Nataxala', qaq saq 'ena'am da qaipe'etega ca choche shiỹaxaua.

⁹ Ỹoqo'oye no'on da qaipi'iỹa'a Ñim Nataxala', qaq saq 'ena'am da qaipe'etega na 'amaqtaqaicpi shiỹaxauapi.

¹⁰ 'Enauac na ỹotta'a't shiỹaxauapi da aỹem coleesop co'ollaxa, qalaxaye serolec da le'enaxat Ñim Nataxala' nache 'enauac da ỹoxonec.

¹¹ Namayepi imauec co'ollaxa da aỹem coleesop, qalaxaye serolec da le'enaxat Ñim Nataxala' nache 'enauac da ỹoxonec.

¹² Namayepi aỹem coleesop 'eeta'am ca te'esaq lta'a lalaxat, qalaxaye da lalemataic 'omañi 'eeta'am ca norec da sa qaỹaloq da no'omñi, qalaxaye serolec da le'enaxat Ñim Nataxala' nache 'enauac da ỹoxonec.

¹³ Namayepi aỹem sa icherapec da aỹem ỹamaxañi da yaqto' souañi, qalaxaye Ñim Nataxala' anac da aỹem itauan.

¹⁴ Qaq ỹoqo'oye aỹem so'onaxaato'ot Ñim Nataxala', cha'aye Ñimaye ỹauo'o da ỹa'añaxac qataq nacheñi ñi ica'alaxaqui.

¹⁵ Na lma'pi na shiỹaxauapi no'on da lataxac, qalaq huo'o da na'alaxac da qantootalec da noxonaxanaxac maye, 'eeta': «Da la'añaxac Ñim Nataxala' ivira'a da doxonaxan.

¹⁶ Da la'añaxac Ñim Nataxala' ỹataqta lta'araic, da la'añaxac Ñim Nataxala' ivira'a da doxonaxan.»

¹⁷ Qaq ỹoqo'oye aỹem saishet qome da seleu, nacherata da ñeca'altauec yaqto' sa'axattac 'enauac na ỹo'otpi Ñim Nataxala'.

¹⁸ Ñim Nataxala' ỹataqta aỹem sa ỹala'ac co'ollaxa da ỹo'ot so ñeuaxanaguec, qalaxaye saishet da aỹem ỹaneguet da nleuaxa.

¹⁹ Ñaq qauauachiỹoiguilo qome naua laso'omi ana atamnaxaqui, cha'aye sauotaique da sepa'auo da sanot da ña'achecỹaxac Ñim Nataxala'.

²⁰ Cha'aye nachenaua naua naso'omi Ñim Nataxala', qataq nachenaua naua lleguereuo ca pe'etega Ñimaye.

²¹ 'Am sho'oxoren qome 'Am Nataxala', cha'aye aỹem 'auasateguet co'ollaxa qataq nache 'am ica'alaxaqui.

²² Qaq so coma' maye ỹo'otan co'ollaxa nam nỹec lo'opi, nacheso nagui som lo'oxonaxala' da huo'o ca qano'oxoosheguem.

²³ Damaye nachera da ỹo'ot co'ollaxa Ñim Nataxala', qaq damaye ỹo'ot da qara'aalaxa.

²⁴ Qaq ne'ena na'a'q nachena na huetoigui co'ollaxa, da Ñim Nataxala' do'onataxan, ỹoqo'oye qomi' ỹataqta qaramachiguiñi qataq ñetonaqtapeguec qome namaye.

²⁵ 'Am Nataxala', ñaq qomi' 'anca'alaxatrec, 'Am Nataxala', qomi' 'anqouagueque, qomi' 'anema da no'on ca qoyecỹaxac.

²⁶ Ỹataqta no'on da lviraxac ca nactaigui da le'enaxat Ñim Nataxala'. Ỹoqo'oye nagui da souaqtaigui na lma' Ñim Nataxala', nache qami' sanaxama da qanchoxonnataguiiqui.

²⁷ Ñim Nataxala' nacheñi Ñim Lo'onatac 'Enauacna, Ñimaye qomi' icoỹattaleguete. Qaq ỹoqo'oye qalapoñiỹa't qome, nache qauacheetauo aca qo'oipaq lcouepi, da qaroiua'alo naua lcoue añi nca'atoxonaxalate.

²⁸ Qaq 'am nache 'Am Ñatamnaxala' ỹoqo'oye 'am sho'oxoren qome, qataq sho'oxoren da 'ara'amaqchec.

²⁹ Ñaq qavio'oxoyiñi qome Ñim Nataxala', cha'aye Ñimaye ỹataqta soxoraic qataq da lauotaxanaqtaic chochaq tatec.