Salmos 114 - La'aqtaqa Ñim Lo'onatac 'Enauacna 2013

Da qaiuennate co'ollaq qanayeca'ai ye Egipto

¹ Qaq so Israel le'ecpi maye lauo' le'ecpi so Jacob, co'ollaq ca'ai ye Egipto maye saishet da lalamaxat lma'.

² Ye Judá ivira'a da naña so lanataqa' Ñim Nataxala', qataq ivira'a da ilo'ogue ye na'alhua so Israel.

³ Aso auaxai co'ollaq ila'a de'era, nache datauec, qaq so tala Jordán qalaq ỹe'eguelaq na 'etaxat.

⁴ Ana qasoxonaxapi qalaq parenaxaatagui 'eeta'am ca qagueta peenaqpi, qataq ana lcomaraxalatepi parenaxaatagui 'eeta'am ca qagueta llalaqpi.

⁵ ¿Negue't ca qouaigui 'am auaxai ye 'auatauec, qataq ta'ainco' 'am tala Jordán ye 'avi'eguelaqot?

⁶ ¿Qataq qami' qasoxonaxapi ta'ainco' ye qaparenaxañeetagui qoñiita'am ca qagueta peenaqpi? ¿Qataq qami' lcomaraxalatepi ta'ainco' da qaparenaxañeetagui qoñiita'am ca qagueta llalaqpi?

⁷ 'Am 'alhua ñaq 'am cholaxan da qoueto'ot Ñim Nataxala', ñaq 'am cholaxan da qoueto'ot Ñim Natamnaxala' so Jacob.

⁸ Cha'aye Ñimaye nañigui naqa'en da laỹe' na 'etaxat aca coma', qataq nañigui naqa'en da mpaxaatasheguem na 'etaxat aca coma'.