Salmos 113 - La'aqtaqa Ñim Lo'onatac 'Enauacna 2013

Da qaỹo'oxoren da lsoxoyec Ñim Nataxala'

¹ ¡Qaỹo'oxoren qome Ñim Nataxala'! Qami' lamaxashecpi Ñim Nataxala', qavio'oxoyiñi qome da le'enaxat Ñimaye.

² Qaỹo'oxoren qome da le'enaxat Ñim Nataxala', chegoqchiguiña nagui nache chochaq tatec qome.

³ Chegoqchiguiña da nnoxoosheguem añi nala' nache ivitta'a da inoxooñi, da qaỹo'oxoreetac da le'enaxat Ñim Nataxala'.

⁴ Ñim Nataxala' ilotague' 'enauac na ỹotta'a't shiỹaxauapi, da llo'oxoyec qalaq imattalec na piguem.

⁵ ¿Negue'tom ca 'eeta'am Ñim Nataxala' maye Qanatamnaxala'? Ñimaye netasheguema na pa'asheguem da ilotague' 'enauacna,

⁶ qalaxaye sa na'amaqten da namataña na piguem qataq ana 'alhua.

⁷ Ñimaye chegoqoolec naqa'en na namoxoỹaxa da nauaxaỹaxaasheguem ca choxoraq, qataq nqateeguesop da lachoxoyec ca deuenaxaatac,

⁸ da yaqto' nso'ootañi da ỹalectaigui naqa'en ca 'amaqtaqaicpi, cam 'amaqtaqaicpi maye maiche lauo' le'ecpi.

⁹ Qataq Ñimaye ỹo'ot da huo'o ca lma' aca 'alo maye sa deco'o, qataq ỹanem da ntonaxac da ishet da nate'e acamaye. ¡Qaỹo'oxoren qome Ñim Nataxala'!