Salmos 112 - La'aqtaqa Ñim Lo'onatac 'Enauacna 2013

Da nchoxonnataguec cam huo'o naq 'enec naqa'en Ñim Nataxala'

¹ ¡Qaỹo'oxoren qome Ñim Nataxala'! Ỹataqta machiguiñi ca shiỹaxaua maye huo'o naq 'enec naqa'en Ñim Nataxala', qataq ỹauoteque naua lamaxasoxonaxaco Ñimaye.

² Cam chegoxoguetpi camaye ỹataqta 'añaxaicpi qom huetalec ana 'alhua, qataq ca llalaqpi ca no'on da lataxac qalaq huo'o da nchoxonnataguec.

³ Naua lma'ate qalaq chochaq huañi da lsallaxa, qaq da lqouagaxanaqtaic nache queta.

⁴ Ca no'on da lataxac qalaq qaicoỹattalec da huo'o na napalaxa, nataqa'en cam hualaxaunaxaic, choxonnataxanaxaic qataq ca nalochiguiñi da lataxac.

⁵ Ca shiỹaxaua soxoraic ỹataqta ichoxoren da huo'o ca ỹa'aalaxanaxan, qataq nalochiguiñi naqa'en da lataxac da imen ca lmenec.

⁶ Ỹoqo'oye camaye saishet da huañi, qataq nache 'eetai' da nhuennataxat cam no'on da lataxac.

⁷ Qataq saishet da ñe'etaique ca qauem na'aqtaxanaxac, cha'aye da lquiyaqteỹaxac saishet da deraỹapigui', cha'aye pi'iỹa'a Ñim Nataxala'.

⁸ Da lquiyaqteỹaxac qalaq saishet da deraỹapigui', qataq qaica ca ñe'etaique choche ivitta'a da ỹauaachigui da noxonec ca mpa'aguenaxauapi.

⁹ Qataq itauaatac na choxoraqpi, qaq da lqouagaxanaqtaic qalaq nache queta, qaq da la'añaxac huo'o qanqa'en da llo'oxoyec.

¹⁰ Qaq ca qauemaic da ila'a de'era nache dalemata, nache inaga't naua lhue qalaxaye taỹa'a da imeuo. Qataq da lqopitaxanaqtaic na qauemaicpi taỹa'a da imeuo.