Salmos 110 - La'aqtaqa Ñim Lo'onatac 'Enauacna 2013

Ñim Lo'onatac 'Enauacna ỹanem da lamaxasoxonaxac so nta'a

¹ Ñim Nataxala' 'enapega ñim ỹataxala', 'eeta': «'Anso'ootaña qome da pa'aigue na aỹoic, nache ivitta'a qome da hueto'oto ñaqa'en naua 'arapia'ate na 'ampa'aguenaxauapi.»

² Qaq Ñim Nataxala' ỹachegoxotchiguiña qome ye Sión, da 'am namaxa aca 'arashelte maye la'anaqte da 'ara'añaxac, nache qonetangui qome na laiñi na 'ampa'aguenaxauapi da 'auamaxasoxootac.

³ Qataq 'am nañanot na 'arhuo' le'ecpi, qom ivita da 'auamaxasoxon da huaña añi qui'itta qasoxonaxa, nache 'eeta'am na 'aỹa maye naañi da yaqta'a yo'oxoñi, dam dalaxaic 'annogotshec 'enauaque naua na'axa'te.

⁴ Ñim Nataxala' mashe ỹan co'ollaxa so la'aqtac, qaq saishet qome da ỹe'eguelaxa da ntogottac, «Da 'am, nache 'eetai' qome da 'am ntaxaỹaxanaxanec, nache qoneta'am da lataxac so Melquisedec.»

⁵ Qaq Ñim Nataxala' huetaua'a qome na pa'aỹa'ague da 'oic, qaq qom ivita ca na'a'q da dalemata nache nlachiguiñi naqa'en na nta'alpi.

⁶ Huaña, nache nmit qome na ỹotta'a't shiỹaxauapi, nache lapoosheguem naqa'en na leuaxaicpi, qataq ilaxachigui na lqaic 'enauac na netalec ana 'alhua.

⁷ Qataq nỹomtapigui qome ca 'etaxat, maye chegaqangui ca la'auaxac maye huetaua'a na laỹe ca nqa'aic, qaq nache chegoqchigui que'eca 'etaxat da dalaxaic da la'añaxac.