Salmos 11 - La'aqtaqa Ñim Lo'onatac 'Enauacna 2013

Da ỹataqta qaipi'iỹa'a Ñim Nataxala'

¹ Ñim Nataxala' nacheñi Ñim ỹe'eguenaxala'. Qaq ỹoqo'oye qaica ca aỹem 'enapega, 'eeta': «'Aue, 'avi'iguena añi qasoxonaxa qoneta'am qome ca qoỹo.

² Ñaq 'aumeten na qauemaicpi da ỹa'añaxaalec na lchecnec, nache ỹanagui na lquet ana lchecna, qataq hueta'a ca ỹataqta ỹapochiguiñi, da yaqto' ỹaỹen na no'on da lataxac.

³ Qaq da ivita da nlaguiñi na na'attalec 'enauacna, nache ¿hua'ago' ca 'eetec ca ỹale maye no'on da lataxac?»

⁴ Qaq Ñim Nataxala' qalaq hueta'a añi qui'itta lalamaqte atamnaxaqui, Ñim Nataxala' qalaq netaña ca nso'onqa' na piguem, nache saishet da nqachegoxoyiñi naqa'en naua la'ai'te, da nauaatac na shiỹaxauapi.

⁵ Ñim Nataxala' nache nauaatac na no'on da lataxac qataq na qauemaicpi, qataq ỹataqta ỹaỹemec na lqopitaxat da nloquiaxac.

⁶ Qataq talec naqa'en na qauemaicpi, na auot maye 'eeta'am ana 'ettaigui poqo qataq na 'ettaigui quiquiaxaraic, qataq anacot ca la'at maye ỹavigaxat 'enauacna, da ỹanem namayepi da 'itchiguiñi nhuaxanaguec.

⁷ Ñim Nataxala' ỹataqta no'on da lataxac, qataq ỹauotec ca nalochiguiñi da lataxac, ỹoqo'oye na huesota da lataxac ishet qome da ilogui da lashiguiỹaxac Ñimaye.