Salmos 109 - La'aqtaqa Ñim Lo'onatac 'Enauacna 2013

Da ltaunaxanaxac Ñim Lo'onatac 'Enauacna

¹ 'Am 'Aro'onatac 'Enauacna, maye 'am sho'oxoreetac naxa, saishet da sa 'auasateguet da ñatamnaxac.

² Cha'aye na qauemaicpi qataq shepecaicpi, aỹem dataỹa'aguet, ỹauota'aisalo naua saq 'e'n la'aqtaqa da aỹem detaqtega,

³ aỹem nquiỹa da aỹem detaqtega namayepi, qataq qaica ca sasouaxat qalaq aỹem iloquiaxaatac.

⁴ Da ỹauotaxanaqtaic namayepi qalaq nmeneguet naqa'en da lsheunaxanaxac, qalaxaye aỹem ñatameetac.

⁵ Aỹem so'otec da no'on qalaq namayepi aỹem ỹo'otec da qauem, qaq namayepi aỹem ỹauotec taxa qalaq nda'a't da aỹem nquiỹa.

⁶ Ñaq 'auo'ot da nmit 'anqa'en namayepi ca qauemaic, nache que'eca qauemaic ỹauo'o ca nhuaxanaguec cam huo'o da lasouaxashet.

⁷ Yaqto' camaye ỹa'axat ca lasouaxashet namayepi qom qanmit, qataq naua maiche la'aqtaqa nachenaua nam ỹo'o't ca nhuaxanaguec.

⁸ Qataq sa qaỹauec qome da nachaalataxac, nache da lo'onataxanaxac talec qome ca ỹaqa'a.

⁹ Qataq na llalaqpi qaica qome ca lta'a, qataq pa'ai aca lhua.

¹⁰ Nache chochaq tatacra' ca llalaqpi qataq dashelaxaatac, qataq ca'ai qanqa'en ca mashe nlaguiñi lma' da nmitaique ca aloq.

¹¹ Nache ca lavigaqtaxanaxala' ỹacona qome na logoxoshetpi, qataq ca ỹaqa'a ca chegaqa'ague decachiỹa na la'añaqtegueshecpi.

¹² Qataq qaica ca nqouaguec, qataq qaica ca ichoxoren na llalaqpi maye saploqpi.

¹³ Qataq nmichiguiñi qome 'enauac na chegoxoguetpi, qataq qaỹapalaxat qome da le'enaxat qom huo'o ca dalaxaic ñalaqpi.

¹⁴ Qataq Ñim Nataxala' saishet qome da icoua'ai na lasouaxashetpi so lta'a, qataq saishet da icoua'ai na lasouaxashetpi aso late'e.

¹⁵ Qataq Ñim Nataxala' saishet qome da icoua'ai, qataq Ñimaye ỹapalaxat qome da le'enaxat maye huetalec ana 'alhua.

¹⁶ Souaxat da icoua'ai da ỹo'ot da nchoxonnataxanaxa, qataq icaatac nache iviraxatta'a da ỹalauat na choxoraqpi, qataq na huo'o da nque'eenaxac qataq na huo'o da lhuenaxanaxa.

¹⁷ Qaq souaxat da nqopita da lsheunaxanaxac, nache de'era lsheunaxanaxac maiche talec. Qataq souaxat da saỹaconeguet da nchoxonnataxanaxa, nache damaye ca'ai somaye.

¹⁸ Qataq nqopita da 'eco' alogo da ỹaatrañi da nsheunaxanaxac, nache damaye quigui da lo'ocỹaxac 'eeta'am na 'etaxat qataq 'eeta'am na aceite da quiguilo naua lpi'ineqa,

¹⁹ qataq 'eeta'am ca lapo' da napotaña, qataq 'eeta'am ca nsaataxaqui da ỹaxatchiguiñi 'enauaque naua na'axa'te.

²⁰ Qaq 'era da 'eetec qom isheeten Ñim Nataxala' na aỹem ipa'agueetac, qataq nam qauema naua la'aqtaqa da aỹem detaqtega.

²¹ Qalaxaye 'Am Nataxala', aỹem 'auaỹamaxatta qome souaxat da 'are'enaxat, qataq aỹem 'anca'alaxatec souaxat da 'arsoxoyec qataq da lta'araic 'arauotaxanaqtaic.

²² Cha'aye aỹem huo'o da iuogoxo qataq da iuenaxanaxa, qataq añi iquiyaqte que'emaq.

²³ Qataq sheeta'am ca lpaqal da nquicta'a da pal, qataq aỹem ỹache na la'at sheeta'am aca shiiquioxoi.

²⁴ Qataq naua illecte nquictrañi da la'añaxa'c souaxat da qaica ca sachec, qataq na ỹo'oc lapaxagueta naua ipi'ineqa.

²⁵ Nache namayepi aỹem ne'eetapigui, qataq da aỹem ila'a qalaq iconnaxaatac na lqaic.

²⁶ 'Am Nataxala' maye 'Am Ñatamnaxala', ñaq aỹem 'autauan, qataq aỹem 'anca'alaxatec souaxat da 'arauotaxanaqtaic.

²⁷ Yaqto' qaỹaỹateeta de'era 'Am Nataxala', da maiche 'am 'auo'ot damaye.

²⁸ Ỹoqo'oye na'aictoxo' namayepi da aỹem isheueetac, qalaxaye 'am aỹem 'auchoxoren qome. Namayepi ishet da aỹem iloquiaxan, qalaxaye huo'o qome da la'aloxo, cha'aye ne'ena 'aramaxashec huo'o qome da ntonaxac.

²⁹ Qaq na aỹem ipa'agueetac qalaq huetalec qome da la'aloxo, nache damaye 'eeta'am qome ca lapo' da napotaña.

³⁰ Qalaxaye aỹem sanot qome da ña'achecỹaxac Ñim Nataxala', qataq sho'oxoren da salecta'aguet na qalota shiỹaxauapi.

³¹ Cha'aye Ñimaye iueelec na choxoraq, da yaqto' nca'alaxateeguesop nam ỹo'ottac da nhuaxanaguec namayepi.