Salmos 108 - La'aqtaqa Ñim Lo'onatac 'Enauacna 2013

Da iquiyaqteỹaxac ỹataqta lhuotta

¹ 'Am Ñatamnaxala', da iquiyaqteỹaxac ỹataqta lhuotta, aỹem so'on qome ca ỹo'onec da 'am sho'oxoren.

² Ñaq 'anlouec qome 'am nvique arpa qataq lira, aỹem, ñelouec qome na dalaxaic ye na'a'q.

³ 'Am Nataxala', 'am sho'oxoren qome da sootangui na nhuo' le'ecpi, so'on ca ỹo'onec da salecta'aguet na ỹotta'a't shiỹaxauapi.

⁴ Cha'aye da 'arauotaxanaqtaic ỹataqta lta'araic, napacalec ye lcata na piguem, qataq da sa nquic 'arataxac iviro'ot na piguem.

⁵ Qaq 'Am Ñatamnaxala', 'anataỹaña na piguem, qataq da 'ayo'oxoyec imattalec 'enauac ana 'alhua.

⁶ Qaq da yaqto' huesouec na 'arauotaxat nhuo' le'ecpi, nache 'anca'alaxatec, 'auauota'a na 'oiguishec 'arhuaq. ¡Ñaq aỹem 'auasateguet!

⁷ Ñim Lo'onatac 'Enauacna detaqa co'ollaq hueta'a so npe'l maye lanataqa', nache 'eeta': «Qom sauegaxan nache ñaloqnec na 'alhua ye Siquén, qataq secolaxatapigui na ca'amapega't 'alhua ye Sucot.

⁸ Aỹem ỹalamaxat ye Galaad qataq ye Manasés, qaq ye Efraín 'eeta'am aca lapoqte na iqaic, qaq ye Judá qalaq 'eeta'am aca ỹashelte.

⁹ Qaq ye Moab qalaq 'eeta'am aca iỹoxonaxaqui, qaq ye Edom qalaq sasaxalec ca ỹapela', qaq ye Filistea qalaq sa'alaxalec da sauegaxan.»

¹⁰ ¿Negue'tom ca aỹem ỹauega ye huaqta'a't nỹecpi maye huo'o na lpaqtaxat? ¿Negue'tom ca aỹem ỹachaxana ca nqa'aic maye taỹa'a ye Edom?

¹¹ Cha'aye 'Am Ñatamnaxala', mashe qomi' sa 'auoonegueta, qataq mashe saishet da 'annaicapegue' na qanalleppi.

¹² Ñaq qomi' 'autaua'n da sataỹaqa'aguet na qampa'aguenaxauapi, cha'aye qaica ca naigui da ltaunaxanaxac ca yo'oqchigui shiỹaxaua.

¹³ Ñim Lo'onatac 'Enauacna nacheñi Ñim qomi' ỹanema da soxonaxanaq, qataq Ñimaye pigui qome na qampa'aguenaxauapi.