Salmos 105 - La'aqtaqa Ñim Lo'onatac 'Enauacna 2013

Nam ỹo'otpi co'ollaxa Ñim Lo'onatac 'Enauacna

¹ Qaỹa'añiỹot da qana'achecỹaxaqui Ñim Nataxala', qauỹaxañiỹa da le'enaxat qataq qaua'aqtaxañim na ỹotta'a't shiỹaxauapi na ỹo'otpi Ñimaye.

² Qauo'onaxañiito'ot da qauo'oñi na no'onecpi, qataq qaua'axache 'enauac na ỹo'otpi maye ỹo'ot da na'aalaxa.

³ Qavio'oxoyiñi da qui'itta le'enaxat Ñimaye, qataq machiguiñi qome da lquiyaqteỹaxac na nmittaique Ñim Nataxala'.

⁴ Qataq qanmichiỹaique qome Ñim Nataxala' qataq da la'añaxac, qataq nache 'eetai' qome da qanmichiitaique da lashiguiỹaxac.

⁵ Qataq qauennachiỹa'a na ỹo'ot da na'aalaxa maye ỹo'ot co'ollaxa, qataq na lapaxañi lataxacpi maye ỹan co'ollaxa Ñimaye.

⁶ Qami' maye qauachegoqoiguet so Abraham som lamaxashec Ñimaye, qataq qami' llalaqpi so Jacob maye qami' lca'aguishecpi Ñimaye.

⁷ Ñimaye nacheñi Ñim Nataxala' maye Qanatamnaxala', qaq Ñimaye ilo'ogue 'enauac ana 'alhua.

⁸ Ñimaye saishet da icoua'ai da naỹamaxataxac, dam ỹan la'aqtac maye ỹamaxalec nam shiỹaxauapi qataq cam chegoxoguetpi.

⁹ Dam naỹamaxataxac co'ollaq naỹamaxate' so Abraham, qataq da ỹan la'aqtac maye ỹanem so Isaac.

¹⁰ Nache lapaxañi damaye da 'eco' lamaxasoxonaxac da ỹanem so Jacob, qataq da 'eco' chochaq tatec naỹamaxataxac da ỹanem so Israel,

¹¹ co'ollaq 'eeta': «Aỹem, 'am sanem qome ye 'alhua ye Canaán, yem 'alhua maye taỹa'a da 'aralamaxat.»

¹² Co'ollaq saq 'amaqtache ye lcate' soomaye, qataq chegoqrauec co'ollaq netralec yi'iye 'alhua,

¹³ qataq chochaq queta'aguelo na na'alhuapi na ỹotta'a't shiỹaxauapi, qataq queta'aguelo na ỹotta'a't nta'alpi,

¹⁴ qalaxaye Ñim Lo'onatac 'Enauacna saishet da ỹashenem da huo'o ca saỹaỹamaxatapec soomaye, nacherata da nhuogaxa so nta'alpi, 'eeta':

¹⁵ «Saishet da qaupocheeua'a na lleca'aguishecpi, qataq saishet da qauo'ochec ca qauem na ỹa'aqtaxanaxanecpi.»

¹⁶ Nache Ñim Lo'onatac 'Enauacna ỹo'otec na lqouaxa 'enauac so netalec yi'iye 'alhua, qataq nlaxaañi 'enauac na lma'pi so trigo.

¹⁷ Qalaxaye Ñimaye ỹa'auaxan da ỹamaq so José, maye qaimen co'ollaxa da yaqto' nlatac.

¹⁸ Qaq somaye qoỹanaguilo co'ollaxa naua lchel so ncoñetaxanaxat lcat, qataq qaicoñe' qoỹanaigui aso ncoñetaxanaxaqui.

¹⁹ Nache ivitta'a da ipacchigui dam ỹa'axata'a co'ollaxa so José, nache da la'aqtac Ñim Nataxala' ỹachaxan da ỹoqta 'eesa somaye.

²⁰ Nache so nta'a damaxasoxoolec da qaisouec somaye, som ilotague' so qalota nhuo' le'ecpi isouec somaye.

²¹ Huaña nache ỹanagui da nataxala' da yaqto' ilo'ogue so lma' somaye, qataq da ilo'ogue 'enauac nam lalamaxatpi somaye.

²² Qataq ỹanem da ỹapaxaguen so nataxala'pi, qataq da ỹapaxaguenec da naỹaanec so nqueroxonecpi.

²³ Huaña nache so Jacob maye nataqa'en le'enaxat da Israel taỹa co'ollaxa ye Egipto, qaq somaye chegaqauec co'ollaq netaña ye 'alhua ye Cam.

²⁴ Nache Ñim Nataxala' ỹo'ot da nquictauec ye lcata som lalamaxat lauo' le'ecpi somaye, qataq napacalec naqa'en da la'añaxac so mpa'aguenaxauapi,

²⁵ ỹoqo'oye na Egipto le'ecpi nquiỹa se'eso nhuo' le'ecpi maye lalamaxatpi Ñimaye, nache ỹataqta dataỹa'aguet se'eso lamaxashecpi Ñimaye.

²⁶ Huaña nache Ñim Lo'onatac 'Enauacna ỹamaq so lamaxashec Moisés qataq so Aarón maye lca'agui'she co'ollaxa,

²⁷ nache soomaye ỹo'o't na la'anaxatpi nam ỹo'otpi Ñim Lo'onatac 'Enauacna, qataq na ỹo'ot da na'aalaxa co'ollaq huaña ye 'alhua ye Cam.

²⁸ Ñimaye namaq co'ollaxa so napalaxa nache imauec da napalñi naqa'en yi'iye 'alhua, qalaxaye so Egipto le'ecpi saishet co'ollaxa da iqocha'a da la'aqtac Ñimaye.

²⁹ Qataq nañigui naqa'en na ntago'q so 'etaxat, nache ỹalauat so nỹaqpi.

³⁰ Qataq 'enauac ye Egipto nlaqtelec ana miỹo, nache iviraigui na pa'auo naua lma'ate so nta'alpi.

³¹ Qataq co'ollaq detaqa Ñim Lo'onatac 'Enauacna, nache imattalec 'enauac yi'iye 'alhua ana lotaxañipi qataq ana 'aỹatpi.

³² Qataq so auot nañigui naqa'en ana lache, qataq talec naqa'en na norec le'eraxa yi'iye 'alhua,

³³ Qataq nlaxaañi aso nañiguishe uva qataq aso higo, qataq huacac naqa'en aso qo'oipaqpi yi'iye 'alhua.

³⁴ Qaq co'ollaq qaltaq detaqa Ñim Lo'onatac 'Enauacna, nache anac aso qalota shiiquioxoipi.

³⁵ Nache chec 'enauac so ñaxattalecpi yi'iye 'alhua, qataq ỹauta 'enauac so chegaqaigui yi'iye 'alhua.

³⁶ Qataq ỹo'otec da l-leuaxa som la'auaxanec llalaqpi so Egipto le'ecpi, som la'auaxanec llalaqpi som chegoxoguetpi somayepi.

³⁷ Ñim Lo'onatac 'Enauacna nqatec co'ollaxa so lalamaxat nhuo' le'ecpi, lỹatec naqa'en so qalota oro qataq plata, nache qaica ca nqanaxattac somayepi.

³⁸ Nache so Egipto le'ecpi ỹataqta ntootapeguec da ỹauaateueegue da jec somayepi, cha'aye ỹataqta ñi'iỹa somayepi.

³⁹ Qaq Ñim Nataxala' ipelteetalec naqa'en somayepi so lo'oc, qaq ye pe qalaq icoỹattalec na le'eraxa so norec.

⁴⁰ Qaq co'ollaq iỹaxanaique aloq somayepi, nache Ñimaye namaq so qalota dachemipi, qataq ỹo'ot da icomatec naqa'en so nallec piguem le'ec.

⁴¹ Qataq chegaqaigui naqa'en aso coma' so 'etaxat, nache 'eeta'am na tala da quelec so toolec 'alhua.

⁴² Cha'aye Ñim Lo'onatac 'Enauacna saishet da icoua'ai som ỹan la'aqtac, maye ỹanem co'ollaxa so lamaxashec Abraham.

⁴³ Qaq 'era da 'eetec Ñim Lo'onatac 'Enauacna, co'ollaq nqatec so lalamaxat nhuo' le'ecpi maye lca'aguishecpi, ỹataqta ỹa'alaqtai' naqa'en da ntonaxac.

⁴⁴ Qataq Ñimaye ỹanem somayepi so na'alhua som ỹotta'a't shiỹaxauapi, qataq da alaỹaxac da lo'onataxanaxac som ỹaqa'a nhuo' le'ecpi,

⁴⁵ da yaqto' ỹaỹamaxattec qataq ilotelec da llec na lqataxacpi, qataq na lapaxaguenataxanaxacpi Ñim Nataxala'. ¡Qaỹo'oxoren qome Ñim Nataxala'!