Salmos 104 - La'aqtaqa Ñim Lo'onatac 'Enauacna 2013

Da ño'oxonnataguec Ñim ỹo'ot 'enauacna

¹ ¡Ayem, semato'ot da ñachaalataxac da sho'oxoren Ñim Nataxala'! ¡Ỹataqta 'am lta'araic 'Am Nataxala' maye Ñatamnaxala'! Ỹataqta 'aỹa'aatañi da 'ayo'oxoyec qataq da 'ara'amaqchec.

² 'Eeta'am 'anqa'en ca npo' da 'anapogoña na yo'oqchiguiñi. Qataq 'aupiguiisheguem na piguem 'eeta'am ca napoxonaxat.

³ Qataq ca qaỹoqotcheguemec 'arma' na'arelec 'anqa'en na 'etaxat, qataq na lo'oc na piguem nañigui 'anqa'en aca 'annaigona, qaq da qojec qalaq qonetaleguete naua laua't na la'at.

⁴ Nam la'at nachena na 'ara'aqtaxanaxanecpi qataq na le'eraxa na norec nachena na 'aramaxashecpi.

⁵ 'Am, na'attelec co'ollaxa 'anqa'en so lo'oxonaxala' ana 'alhua, da yaqto' saishet da deraỹapigui'.

⁶ Aso auaxai qalaq 'eeta'am ca npo' da ỹapolec 'anqa'en ana 'alhua, na 'etaxat qalaq ỹapotalec ana qasoxonaxapi.

⁷ Qalaxaye co'ollaq 'anlaxa na 'etaxat nache jec, qataq co'ollaq hua'axaỹa da l-llimiaxa da 'arvilỹaxac nache datauec.

⁸ Nache tasheguema ana qasoxonaxapi, qataq ñe'eguelaxañi nache taña na ca'ameguepi, nam 'auachaxana co'ollaxa da lma'pi.

⁹ Qataq 'auauo'oi naua loga'te da yaqto' saishet da napacaleguete, nache saishet da qaltaq ỹe'eguelaxa da ỹapolec ana 'alhua.

¹⁰ 'Am, 'auamaq co'ollaxa na npaxaatasheguem 'etaxat, da yaqto' quegue na la'auaxacpi maye quichiguingui ana qasoxonaxapi.

¹¹ Qaq nachena namaye na nỹomtapigui na shiguiỹacpi no'onaxa le'ecpi, qataq imeuec naqa'en na laquip nam huauec 'ashenapi.

¹² Qaq na qoỹopi maye huaỹotega't na piguem, ỹanaña na lpata'cpi naua loiguiye namaye, nache hueta'a da do'onaxaatagui netaigui ana lauepi ana qo'oipaqpi.

¹³ Chegoqotcheguema 'anqa'en ye qaỹoqotcheguema 'arma', da 'aucottalec ana qasoxonaxapi, ana 'alhua qalaq machiguiñi naqa'en da alaỹaxac da 'aro'onataxanaxac.

¹⁴ Qataq ñaxat 'anqa'en na 'auaqpi da yaqto' aloq na shiguiỹacpi, qataq acam nañiguishe maye ỹaañi ca shiỹaxaua, da yaqto' huo'o ca aloq ỹachegoxotaigui ana 'alhua,

¹⁵ na lataxa maye machiguiñi naqa'en da lquiyaqteỹaxac, qataq na aceite maye no'onaxat da lashiguiỹaxac, qataq na nallec maye ỹo'ot da la'añaxac da nachaalataxac.

¹⁶ Qataq huecottalec ana qo'oipaqpi maye lañiguishe Ñim Nataxala', qataq ana cedro ye Líbano maye ỹaañi co'ollaxa Ñimaye.

¹⁷ Qaq ana qoỹopi nache ỹanaigui na lpata'c anamayepi, qaq ana lamaxañipi qalaq netaigui ana piinopi.

¹⁸ Qaq ana qaỹoqotcheguemec qasoxonaxapi, qalaq netalec ana quetaq no'onaxa lashe, qaq ana coma'pi qalaq nache nqañoxotaxaqui ana soxonapi.

¹⁹ 'Am 'auo'ot co'ollaxa ñi ca'agoxoic da yaqto' la'anaxat naua na'axa'te, qataq añi nala' maye ỹaỹaten ca lagui da inoxooñi.

²⁰ Qaq da 'auanacot na napalaxa nache nvi' ye pe, qaq namaye nache quetaigui da nqalgoqtega't na shiguiỹacpi maye aviaq le'ecpi.

²¹ Nam llonpi qalaq desoqo da iỹaxaataique ca loxonec, iỹaxaato'ot Ñim Lo'onatac 'Enauacna da ỹanem namayepi ca aloq.

²² Qalaxaye da nnoxoosheguem añi nala', nache namayepi taỹa na lauacpi da yaqto' nnaañi.

²³ Qaq na shiỹaxauapi qalaq inoxonec da do'onataxan, nache ivitta'a ye pe da ỹo'ottac na lo'onatac.

²⁴ Qaq ỹataqta qalota na 'auo'otpi co'ollaxa 'Am Nataxala', qaq 'enauac namayepi 'auauota'a da 'araỹaanec co'ollaq 'auo'ot, ana 'alhua qalaq nlaqtelec nam 'auo'otpi.

²⁵ Qaq 'aye aye auaxai maye ỹataqta late'erai qataq qalochiguiñi, maye huetangui na shiguiỹacpi, na lta'araic qataq na qapio'olecpi, maye qaica ca ivi' da naloqten.

²⁶ Qaq ayemaye nache quetangui naxa ana notaxaquipi da qanayiguingui na 'etaxat, qataq nache huetangui so shiguiỹac lta'araic le'enaxat Leviatán, maye 'auo'ot co'ollaxa da yaqto' da'aistapiguingui ayemaye.

²⁷ Qaq 'enauac namayepi da 'am iuatta'aguet, da yaqto' 'aỹa'anem ca aloq da ivita ca laloqo' da 'auquia'axan.

²⁸ Qaq da 'aỹa'anem nache namayepi ỹaconeguet, da 'auauachigui na 'arhuaq lauel, nache namayepi icomatec na ỹataqta no'on nallec,

²⁹ qaq da 'aỹo'oxocheesop da 'arashiguiỹaxac nache huo'o da lcolanaxa, qaq da 'anqa't naua la'a'che nache ileu, nache qaltaq ỹe'eguelaxa da lsoche na 'alhua.

³⁰ Qalaxaye da 'anamaxa naua 'ara'a'che maye ỹo'ot da nca'alaxa nache qaltaq nca'alec, qaq 'era da qonetec da 'anaralaxat da lataxac ana 'alhua.

³¹ Qaq da llo'oxoyec Ñim Nataxala' choche tatec qome, qataq machiguiñi qome Ñim Nataxala' souaxat na lo'onatacpi.

³² Qaq Ñimaye da ỹamatalec ana 'alhua nache anamaye cholaxan, qataq da ipoteua'a ana qasoxonaxapi nache nchisheguem naqa'en.

³³ Qaq aỹem so'onaxaato'ot qome Ñim Nataxala' qom ñaq huo'o da ñachaalataxac, nache so'ootac na no'onecpi da sho'oxoreetac Ñim Ñatamnaxala' da ñaq ñeca'altauec.

³⁴ Qaq no'ono' da ỹamaategueta Ñimaye naua iuennataxaco, cha'aye nacheñita Ñimaye da chegoqtacot da ỹamaicỹaxac.

³⁵ Qaq ña imeuo qome na 'etaxaloxoicpi maye netalec ana 'alhua, qataq qaica qome na qauemaicpi. Ayem, semato'ot da ñachaalataxac da sho'oxoren Ñim Nataxala'. ¡Aja', qaỹo'oxoren qome Ñim Nataxala'!