Salmos 103 - La'aqtaqa Ñim Lo'onatac 'Enauacna 2013

Aỹem sho'oxoren Ñim Nataxala'

¹ Aỹem semato'ot da ñachaalataxac da sho'oxoren Ñim Nataxala', qataq semato'ot da la'añaxac da ñachaalataxac da sho'oxoren dam qui'itta le'enaxat Ñimaye.

² Ỹataqta semato'ot da ñachaalataxac da sho'oxoren Ñim Nataxala', qataq saishet da secoua'ai ca 'oonolec na ltaunaxanaxacpi Ñimaye.

³ Cha'aye Ñimaye nacheñi ñi ỹapalaxat 'enauac na ỹasouaxashetpi, qataq nataren 'enauac na ỹalolaxasat.

⁴ Qataq nacheñi ñi aỹem nca'alaxateeguesop añi huachiqui, qataq aỹem ỹanem da lauotaxanaqtaic qataq da lchoxonnataxanaxa,

⁵ qataq aỹem ỹanem naxa 'enauac na no'on, qataq naralaxat da ỹataxac 'eeta'am naqa'en na vi'ic.

⁶ Ñim Nataxala' nacheñi ñi ỹo'ot ca nalochiguiñi lataxac, da iueelec 'enauac na nque'etaxaatapigui da nloquiaxanataguec.

⁷ Da llecỹaxac Ñimaye ỹachaxana co'ollaxa so Moisés, qataq nam ỹo'otpi co'ollaxa Ñimaye ỹachaxana so Israel le'ecpi.

⁸ Ñim Nataxala' ỹataqta sa da'angui da lataxac qataq choxonnataxanaxaic, Ñimaye ỹataqta qaỹoqchiguinguit da lalemataic, cha'aye lta'araic da lauotaxanaqtaic.

⁹ Ñimaye saishet da imerauec naua na'axa'te da qomi' nhuogoqtegalo, qataq saishet da chochaq tatec da layeloxo,

¹⁰ qataq saishet da ipacchigui naqa'en ca lashiichiỹaxac na qarasouaxashetpi, qataq na qaye'etaxaloxopi,

¹¹ cha'aye ỹataqta lta'araic da lauotaxanaqtaic 'eeta'am na qalochiguiñi piguem da imattalec ana 'alhua, da ỹauotec cam huo'o naq 'enec naqa'en Ñimaye.

¹² Qataq qaỹoqta naqa'en da shenaqta na qarasouaxashetpi, 'eeta'am da yo'oxoñi qataq da avit da qaỹoqtache.

¹³ Ñim Nataxala' ichoxoren cam huo'o naq 'enec naqa'en Ñimaye, 'eeta'am ca nta'a da ichoxoren ca llalaqpi,

¹⁴ cha'aye Ñimaye ỹaỹateeta da qarataxac, ỹaỹateeta da sachegoxosoxoigui ana 'alhua.

¹⁵ Da nachaalataxac ca shiỹaxaua 'eeta'am ana huoue, da dasovi ye na'a'q qalaq 'eeta'am aca huoue no'onaxa lashe,

¹⁶ qaq da anac na la'at da iraxan acamaye nache qaca naqa'en, nache qaica ca ỹaỹaten ca taigue acamaye.

¹⁷ Qalaxaye da lauotaxanaqtaic Ñim Nataxala' chochaq tatec da huetalec nam huo'o naq 'enec naqa'en Ñimaye. Qataq da nalochiguiñi lo'onataxanaxac, nache huetalec qome cam llalaqpi namayepi,

¹⁸ cam ipacchigui da naỹamaxataxac Ñimaye, qataq ca sa icoua'ai da ỹo'ot na lamaxasoxonaxacpi Ñimaye.

¹⁹ Ñim Nataxala' ỹanaña na piguem añi nso'onaxaqui, qataq da lo'onataxanaxac ilo'ogue 'enauacna.

²⁰ Qavio'oxoyiñi qome Ñim Nataxala' qami' namaxashecpi piguem le'ecpi maye qami' 'añaxaicpi qataq qaupaquiichiguilo naua la'aqtaqa, qataq qaualaqaigueta naua lamaxasoxonaxaco Ñimaye.

²¹ Qataq qavio'oxoreñi Ñim Nataxala' 'enauac qami' maye nalleppi Ñimaye, qataq lamaxashecpi maye qauo'ocheetac na 'eetapeguec Ñimaye.

²² Qataq ỹo'oxoren qome Ñim Nataxala' 'enauac nam lo'onatacpi Ñimaye, qataq 'enauac nam pa'aiguelo nam ilotague' Ñimaye. ¡Ayem, semato'ot da ñachaalataxac da sho'oxoren Ñim Nataxala'!