Salmos 101 - La'aqtaqa Ñim Lo'onatac 'Enauacna 2013

Da la'aqtac so nta'a maye ỹanot Ñim Lo'onatac 'Enauacna

¹ Aỹem, sauotaique da so'on da nauotaxanaqtaic, qataq da ỹataqta nalochiguiñi lataxac, sauotaique da so'on na no'onecpi da 'am so'onaxaato'ot 'Am Nataxala'.

² Sauotaique da saỹateeta da ñecỹaxac maye nalochiguiñi, qaq ¿chaq laguio' da aỹem 'anvira? Yaqto' da soota'a ye ima' qalaq nalochiguiñi da iquiyaqteỹaxac.

³ Saishet qome da selotagui ca sa ỹaỹamaxañi lataxac. Aỹem sa seuooneguet na sa ỹalaq, saishet da ñasheeteguet da aỹem naua'a.

⁴ Na qauem nhuennataxacpi qalaq qaỹoqta ñaqa'en qome, saishet qome da sauo'o ca ldaqa' da aỹem hueto'ot ca qauem.

⁵ Ca nqañoxottañi da ỹasaxalec ca qauem la'aqtac ca lỹa, nache aỹem ñeuogaxa, saishet da nache queta ñaqa'en da ltaxaỹaxac, cha'aye aỹem sa sesheteguet ca na'amqaanaxaic da lmeenaxanaxac, qataq ca ño'oxonnaxaic da lquiyaqteỹaxac.

⁶ Qalaxaye huetalec qome da imeenaxanaxac, na laxaraicpi maye netalec ana 'alhua yaqto' iuoreuapi, qaq ca quetague' da ñecỹaxac maye nalochiguiñi, nacheca qome ca aỹem do'onataxaatacot.

⁷ Qataq saishet qome da netaña ye ima' ca tenataxanaxaic, qataq ca saq 'e'n naua la'aqtaqa saishet da nache 'eetai' da aỹem datato'ot.

⁸ Qaq 'enauaque naua na'axa'te da huaiguilo da ñequigaxatta'a't, 'enauac na qauemaicpi maye netalec ana 'alhua, nache ivitta'a da nmichiguiñi ñaqa'en na qauemaicpi, maye netaigui na huaqta'a't nỹecpi maye lalamaxat Ñim Nataxala'.