Salmos 10 - La'aqtaqa Ñim Lo'onatac 'Enauacna 2013

Da atamnaxac da qaiỹaxaataique da ltaunaxanaxac Ñim Lo'onatac 'Enauacna

¹ 'Am Nataxala', ¿ta'ainco' da ỹataqta 'am qaỹoqta? ¿Ta'ainco' da 'anqañoxooñi da ivita da huo'o da que'eenaxac?

² Ỹataqta na'amaqten na qauemaic da icaatac na qaica ca ye, qalaxaye maiche que'emaxam qome aca lqoina.

³ Na qauemaic qalaq ño'oxoreetapigui na maiche 'eetapeguecpi, qaq na qopitaxanaqtaqaic qalaq ilattapiguiñi qataq ỹo'otan Ñim Nataxala'.

⁴ Na qauemaic souaxat da na'amqaanaxac nache, 'eeta': «Qaica ca Lo'onatac 'Enauacna. Qaica ca ishet da aỹem ichemaxata.» Qaq 'era 'enauac da lhuennataxac.

⁵ Nache 'eetai' naxa da ỹañoxot da huo'o na ỹo'ot. Qataq qaỹoqtaique naqa'en da 'eetec da huo'o na 'anmit, qataq qaỹoqta naqa'en da 'armeenaxanaxac. Qataq ỹe'enai' na mpa'aguenaxauapi,

⁶ qataq lhuennataxa da qaica ca ishet da huañi naqa'en, qataq nache 'eetai' da machiguiñi, qataq da saishet da huo'o ca nqalana'ai'.

⁷ Na alap qalaq da'aichigui da lsheunaxanaxac, latenataxanaxac qataq mpa'aguenaxac, naua la'aqtaqa qalaq ỹoxottrañi na qauemsat, qataq da loquiaxac.

⁸ Qataq dauanaxaatac huetauga na nỹecpiolec, nache nqañoxottañi da nauaataique ca loxonec, qataq ỹalauat na qaica ca ỹasouaxat.

⁹ Qataq 'eeta'am ca quiyoc da huetaigui ca lauac, nauaatac na choxoraqpi hueta'a ca nqañoxotaqa', iuatta'a ca laloqo' da nqapaxanot qaq da loxonec, nache ỹauogonnaua'a ca lquia'aqa'.

¹⁰ Nqapaxaañi qataq vi'iỹa't da yaqto' nqapaxaalec da loxonec na qaica ca iueelec.

¹¹ Na qauemaic da detaqa qalaq, 'eeta': «Ñim Lo'onatac 'Enauacna decouaqtaxan, qataq ỹapogui na lashec da yaqto' saishet da huo'o ca ila'a.»

¹² Ñaq 'anachaañi, 'am Nataxala', 'anauaxaỹaxaasheguem na 'arhuaq, saishet da 'aucoua'ai na choxoraqpi.

¹³ 'Am Ñatamnaxala' ¿ta'ainco' da 'am ỹe'eetac na qauemaicpi, souaxat da 'eetega saishet da 'anmit namayepi?

¹⁴ Cha'aye mashe 'auauaachigui qataq 'aumeteetac na ỹo'ottacpi, ỹoqo'oye maiche 'aupa'aiguet da 'auo'ot ca nhuaxanaguec, cha'aye 'am ỹe'egueetacot na qaica ca mpaxattalec, qataq 'autauan na qaicaua caua lta'al.

¹⁵ Ñaq 'aunoxon na lhuaq na 'etaxaloxoicpi, ñaq 'anmit na qauemsat maye ỹo'ottacpi choche 'aviraxatta'a da qaica ca no'onañi 'anqa'en.

¹⁶ Ñim Nataxala' choche tatec da lo'onataxanaxac da Nta'a, qaq na ỹotta'a't shiỹaxauapi qalaq imeuo qanqa'en ana 'alhua.

¹⁷ Qaq 'Am Nataxala', qalaq 'aua'axaỹa da natamnaxac na choxoraqpi, 'aua'añaqchet qataq 'aulo'oguet da lỹaxanaxac.

¹⁸ 'Auo'otec qome ca ỹaỹamaqchiguiñi ca qaicaua caua lta'al qataq na huetaiya' qanqa'en, yaqto' ca ỹale maye choche chegaqaigui na 'alhua, saishet da ỹe'eguelaxalec da ỹo'ottac da ncolanaxa.