Rut 1 - La'aqtaqa Ñim Lo'onatac 'Enauacna 2013

So Elimelec qataq aso Noemí nqo'oora ye Moab

¹ Qaq se'esoua vi'iye co'ollaq ye Israel ñaq ilotague' so nataxala'pi, nache huo'o so nqouaxa 'enauac yi'iye qanayeetaña 'alhua. Huaña nache so ỹale maye lma' ye Belén, yem huaigui ye 'alhua Judá, somaye lache, nqo'ona ye lỹa 'alhua le'enaxat Moab, qaq lỹatac aso lhua Noemí qataq soua dos llalqa.

² Qaq somaye le'enaxat Elimelec, qaq aso lhua le'enaxat Noemí, qaq soua dos llalqa le'enaxa't, Majlón qataq Quelión. Qaq soomaye Efrata lashe', maye nacheye ye Belén. Qaq co'ollaq ivitra yi'iye 'alhua Moab, nache neraña soomaye.

³ Qalaxaye so mashe qaỹata'ague da netraña ye Moab, nache ileu so Elimelec, som lhua aso Noemí, huaña nache asomaye nda'agueta soua dos llalqa.

⁴ Qaq co'ollaq mashe ỹe' soomaye, nache huaronegueta soua 'alol maye lma't ye Moab, qaq aso 'oonole soomaye le'enaxat Orfa, qaq aso lỹa le'enaxat Rut. Qalaxaye co'ollaq inoxoorec soua diez vi'iye,

⁵ nache nataqa'en ileu so Majlón qataq so Quelión. Huaña nache aso Noemí nda'a't, cha'aye ileu' soua llalqa qataq so lhua.

Aso Noemí qataq aso Rut taỹalo ye Belén

⁶ Qaq huo'o so na'a'q nache aso Noemí, co'ollaq hueta'a ye Moab, nache hua'axaỹapeguelec da Ñim Nataxala' huo'o da lchoxonnataxanaxa so lalamaxat nhuo' Israel le'ecpi, nache vi'iiguet naqa'en se'eso nqouaxa.

⁷ Huaña co'ollaxa nache asomaye jec da ỹe'eguelaxa ye 'alhua Judá, nache lỹata'ape soua late da quera'ai yi'iye 'alhua maye netraña.

⁸ Qalaxaye co'ollaq mashe quetrague' so nqa'aic, nache 'enapegalo' soomaye, 'eeta': Qavi'iguelaqai qome, qavi'iguelaqaiua'alo caua qarma'achilli' da qoñiỹo'oto caua qarachi'illi', qaq Ñim Nataxala' qami' ỹanema qome da lchoxonntaxanaxa, 'eeta'am da qoñeetec da aỹem qauchoxoyiñi, qataq yeua ỹalqa co'ollaxa.

⁹ Qataq Ñim Nataxala' qami' ỹanema qome da qaltaq qauaroñi, nache qauamaichiguiñi da huo'o ca qarma'ai. Ime, nache aso Noemí ncoyegueneto soomaye, nache napigoqtegueto, qalaxaye soomaye ỹataqta nỹeeta'ape.

¹⁰ Nache soomaye 'ena'apo': ¡'A'i, saishet! ¡Qomi' sauoqtaique da 'am seca'ataxague da yaqto' ñeqo'onaxa ca 'aralamaxat 'arhuo' le'ecpi!

¹¹ Qalaxaye aso Noemí qaltaq 'enapegalo soomaye, 'eeta': ¡Qami' ỹalole, qavi'iguelaqai qome! ¿Ta'ainco' ye qansheetaique da aỹem qauca'acheegue? Ye aỹem mashe saishet da qaltaq huo'oi caua ỹalqa, da yaqto' qaltaq qauaroñiigueta.

¹² Qavi'iguelaqaiua'alo qome caua qarma'achilli'. Cha'aye aỹem mashe aỹem ỹa'axaino'ole da qaltaq she'eguelaxalec da saron, qataq na'aictoxo' da ñaq huo'o da ñaquitaxac da saron, qataq na'aictoxo' da nachena ne'ena pe, da huo'oi caua ỹalqa,

¹³ ¿qaq peta'a isheto' da qauacheeta'alo caamaye da ỹe'? ¿Nache qataq qauaroñiigueta? ¿Isheto' peta'a da qauacheeta'alo caamaye da sa qauaroñi? 'A'i, qami' ỹalolel, saishet da nache qoñeetec de'era. Ñim Nataxala' aỹem namaxa na qalota ñeque'eenaxacpi. Qalaxaye ỹapactec qome da ñiqui'ic qom qami' selota'alo da qanqui'ichiñiitac.

¹⁴ Nache soomaye qaltaq ỹe'eguelaxarelec da nỹeeta'ape, huaña nache aso Orfa, napigoxoi' aso lachoro qataq ncoyeguene', qalaxaye aso Rut no'ona'aguet co'ollaxa asomaye.

¹⁵ Nache aso Noemí 'enapego' asomaye, 'eeta': Ña 'aula'a aso 'araronaxaua, asomaye ỹe'eguelaxaua'a ye lalamaxat lauo' le'ecpi, qataq ca natamnaxala'pi, qaq 'auca'ategue taxa asomaye.

¹⁶ Qalaxaye aso Rut 'enapeco': «¡Saishettaxa da aỹem 'avi'eguelaqto'ot da aỹem qonetega da 'am sheca'ai! Cha'aye aỹem, saigue ca 'am 'aigue, qataq sonaña qome cam qonaña. Qaq cam 'arhuo' le'ecpi, nacheca qome ca ihuo' le'ecpi. Qataq ca 'Anatamnaxala', nacheca qome ca Ñatamnaxala'.

¹⁷ Qataq cam qouaña da 'aleu, nache souaña qome da seleu. Qataq ca huaña da 'am qailayiñi, nache souaña qome da aỹem qailayiñi. Qaq Ñim Nataxala' ỹataqta lta'araic naqa'en qome ca ñeuaxanaguec, da huo'otaq 'am sheca'ai, da saishet da nachera da nleuaxa da qomi' icolaxachiguilo.»

¹⁸ Qaq aso Noemí co'ollaq ila'a da aso Rut, ỹataqta huesota da lhuennataxa da ca'ategue asomaye, nache saishet da qaltaq ỹe'eguelaxalec da 'enapega.

¹⁹ Qaq huaña nache soomaye je'c, quetregue so nqa'aic nache choche ivittra'a ye Belén. Qaq co'ollaq mashe ivildeua'a ye Belén, nache so shiỹaxauapi ỹataqta huo'o da le'elaxa souaxat soomaye. Nache so 'alpi 'eeta': «¿Saishet peta'a da nachana ana Noemí ana'ana?»

²⁰ Qalaxaye asomaye 'enapeco': «Saishet qome da qauỹaxañiỹa da ỹe'enaxat Noemí, maye nacherata da aỹem qauỹaxañiỹa Mara, cha'aye Ñim Qaica ca Ỹaqalanapec, aỹem ỹo'otec da qalota ỹaquicoxo.

²¹ Cha'aye co'ollaq sachegoqchiguiña ne'ena, qalaq nlaqchiguilo naua ihuaxaye, qaq nagui da ñe'eguelaxa namaye, qalaq qui'itchiguilo naua ihuaxaye, cha'aye Ñim Nataxala' nache 'ena'ac de'era. Qaq ¿ta'ainco' taxa da aỹem qauamachiỹa'ac Noemí, ye Ñim Qaica ca Ỹaqalanapec ỹauo'o da ñeuaxanaguec qataq ỹaquicoxo?»

²² Qaq 'era da 'eetec co'ollaq ñe'eguelaq aso Noemí, chegoqchiguiña ye Moab, nnaictague' aso late Rut, maye Moab lashe. Qaq co'ollaq nvitra ye Belén, nache mashe qanqattac ana ala na cebada.