Proverbios 9 - La'aqtaqa Ñim Lo'onatac 'Enauacna 2013

Da naỹaanec qataq da qaica ca qaỹaỹaana'a

¹ Da naỹaanec no'oxoosheguem so lma', nache siete naqa'en soua llo'oxoraqte lauoqtel.

² Ime, nache ỹalauat so na'atetpi da yaqto' ỹo'ot so lquia'axac qataq ỹauo'o so no'on lataxa, nache ỹaỹamaxaañi so lquia'axala',

³ nache ỹamaq aso lamaxashepi, da tasheguema so qaỹoqotcheguemec so huaqta'a't nỹecpi da deỹaxan, 'eeta':

⁴ «¡Qauanaỹeecna'a qami' nsoxoppi 'enaqaicpi!» Qataq ỹamaxa so la'aqtac so qaica ca ỹaỹaanapec, 'eeta':

⁵ «Qauanaqui da sacheguenaq na anoq, qataq qanỹomiigui na no'on lataxa maye seqataxaatai'.»

⁶ Qaỹa'axañiiuec qome da qane'enaxaqui yaqto' qarca'alleeuec, qataq qoquiigue da llec da naỹaanataxanaxac.

⁷ Ca iviraxato'ot ca nogaqaic qataq qauemaic, nache camaye ỹe'egueeta'a da qaisheuen qataq qainogoqchet.

⁸ Saishet da 'aviraxato'ot ca nogaqaic ten qom 'am nquiỹa, 'aviraxato'ot qome ca ỹaanaxanaxaic yaqto' 'am ỹauotec.

⁹ 'Auapaxaguen ca ỹaanaxanaxaic nache camaye nquiguec da laỹaanec, 'auapaxaguen ca no'on da lataxac yaqto' nquiguec da laỹaanec.

¹⁰ Da naỹaanec chegoqchiguiña da huo'o naq 'enec qanqa'en Ñim Nataxala', da qaỹauatton Ñim Qui'itta nachera da ỹo'ot da qaỹachiguiñi da naỹaanataxanaxac.

¹¹ Aỹem 'am sanem da logoraic da 'anachaalataxac, qataq da qaỹoqtrec naua vi'iye da 'anachaalataxac.

¹² Da 'am ỹaanaxanaxaic, nache ỹataqta huo'o da 'ana'achecỹaxac, qaq da 'am nogaqaic qalaq maiche 'anque'etaxangui damaye.

¹³ Da qaica ca qaỹaỹaana'a qalaq 'eeta'am aca 'alo na'aqtaqa lo'o', 'oopai qataq qaica ca ỹaỹaanapec.

¹⁴ Acamaye netoigui ca lasom ca lma' da nso'ootañi, qataq huo'o da nso'ootaña ca qaỹoqotcheguema pa'asheguem ca huaqta'a't nỹecpi,

¹⁵ nache iỹaxaatague' na petañepi, maye quetague' so no'on nqa'aic, 'eeta':

¹⁶ «¡Ña qauanaỹeecna'a qami' nsoxoppi maye qaica ca qauaỹaañi!» Qataq ỹanem da la'aqtac na qaica ca ỹaỹaana'a, 'eeta':

¹⁷ «Ca ncachaxat 'etaxat ỹataqta ama, qataq ca nallec maye qoỹoxottañi da qanallec camaye ỹataqta huesotta da lamaic.»

¹⁸ Qalaxaye namayepi sa ỹaỹaten da na icoyeguen asomaye, taỹa'a da ileu tangui na pa'aguiñi aca huachiqui.